Каспий ралъдалъан Сириялда ругел «Исламияб пачалихъ» абураб террористияб гIуцIиялъул позициязде 26 ракета биччан буго Россиялъул ункъго гамидаса. Гьелъул хIакъалъулъ Россиялъул улка цIуниялъул министр Сергей Шойгуца лъазабуна президент Владимир Путинида Бочаров Ручей абураб резиденциялда ахирисевгун дандчIвалеб мехалда.
Сириялда ругел ишаназда щвелалда цебе Каспиялдаса риччарал ракетабаз нахъ танин 1500 километралъул манзилин, мухIканлъизабуна Шойгуца жиндиирго лъазаби.
Ракетабазул маршруталъул гьес щибниги бицинчIо. Амма информалатазул лъазабиязда рекъон, гьел ине кколел рукIана Ираналъулги, ГIиракъалъулги Туркиялъулги гьаваялъул гIатIилъияздасаххун.
Путиница Шойгуе жаваб кьолаго абуна, гьанжеги ригьго бугин Сириялда Россиялъ гьабулеб хIаракатчилъиялъул хIасилал рачинейин ва министрасе буюри кьуна Цолъарал Штатазулгун, Турциялъулгун, СагIудиязул ГIарабиялъулгун, Ираналъулгун ва ГIиракъалъулгун гьоркьорлъаби халат рахъинариялъул.