Йеменалъул тIадтараз хIукму гьабуна Ираналъулгун дипломатикиял бухьенал гьоркьоса къотIизе. Гьадин лъазабун буго рузман къоялъ гьеб улкаялъул телевидениялъ.
ТIокIаб мухIканлъи лъазабун гьечIо. Reuters агентлъиялъул баяналда рекъон 1 октябралда Бахрейналъ Ираналдаса жиндирго илчи нахъе ахIана. Исана март моцIалда СагIудиязул ГIарабиялъ коалицияги гIуцIун Йеменалда бугеб конфликталде гъорлъе жубана шиитазул къеркьохъаназде данде.
Персиялъул лиманалъул улкабазул рахIат хвезабун буго Ираналъ гьеб регионалъе гьабулеб асар цIикIкIун букIиналъ.