МагъчIваялъе рес

«Анжиялъ» галаби нахъехун тIамулел руго


МахIачхъалаялъул «Анжи» клубалъул иргадулав бетIерав тренерасги къо-лъикI гьабуна командаялъулгун. Чанго моцIалъ цеве гьениве тIамун вукIарав Юрий Семин гIодов чIана гьеб хъулухъалдаса. Гьев нахъе иналъе аслияб гIиллалъун рехсолеб буго премьер лигаялде тIадбуссаралдаса МахIачхъалаялъул клубалъ цониги ракIчIараб бергьенлъи босичIолъи.

Гьединго хабар буго клубалъул хважаин, Дагъистаналдаса олигарх Сулейман Керимовас Анжиялдаса дагь-дагьккун инкар гьабулеб бугиланги. Уяб букIине бегьулищ гьеб хабар ва кинаб ккезе бегьулеб гIагараб заманалда МахIачхъалаялъул футболалъул клубалъул къисматали лъазе къасд гьабуна нижеца.

Юрий Семин «Анжиялъул» бетIерав тренерлъун тIамун вукIана исана риидал 18 июналда. Гьелде щвезегIан гьес нухмалъи гьабулеб букIана «Мордовия» абураб Россиялъул футболалъул клубалъе. Алияб куцалда Семин лъалаан Москваялъул Локомотив абураб клубалъул бетIерав тренерлъун. Гьеб командаялъе гIемерал соназ нухмалъи гьабуна гьес ва гьев бетIерав тренерлъун вугеб мехалъ чанги батIи-батIиял турниразда бергьенлъиги босун букIана гьелъ.

Анжиялъул бетIерав тренерлъун гьев тIамулеб мехалъги гIемерисезул пикру букIана гьес МахIачхъалаялъул клубги кIудияб даражаялде бахинабилан абун. Амма гьезул анищал хIорлъанин абизе бегьула жакъа, щайгурелъул премьер лигаялде нахъбуссаралдаса «Анжиялда» цо гурони бергьенлъи босизе кIвечIо, рокъоб, Каспийскаялда бугеб Анжи-Аренаялда тIоритIарал хIаязда абуни Анжиялъ цониги бергьенлъи босичIо.

ХIасил-калам 29 сентябралда МахIачхъалялъул клубалъ лъазабуна Анжиялъул бетIерав тренер Юрий Семин гьеб хъулухъалдаса нахъе унев вугилан, гьенибго гьез тIаде жубана гьеб хIукму кIиябго рахъги разилъун гьабураб бугилан.

Футбол бокьулезулги, гьелдехун кIудияб гъира гьечIелги дагъистаниязул суал бижулеб буго щибха букIараб Семин нахъе иналъе бищун кIудияб гIиллаян? Команда цебехун бачине гьесул бажари гIечIолъийиш гьелъул магIна кколеб?

«Эркенлъи» радиоялъ цIех-рех гьабурал, «Анжиялъул» хIаязда хадуб гьоркьоб къотIичIого халкколел цо-цо дагъистаниязул пикруялда рекъон, Юрий Семинил щибниги гIайиб ккун гьечIо «Анжи» гьедин тIатIалаго къеялъе. ГIайибги хатIаги бугин жибго клублада, ай гьелъул хIалел футболистаздаян абулеб буго гьез. Мисалалъе гьадинан бицунеб буго Эркенлъи радиоялъе, Анжиялъул цониги хIай гьоркьоса биччаларев МахIачхъалаялдаса Халитов Сиражудиница.

Халитов Сиражудин: «Юрий Семин лъикIав тренер ккола, гьесда бараб жо гьениб букIинчIо. Команда лъикI хIалеб букIинчIо. Гьенире ракIарун руго цоялдаса цоял хашал футболистал ва дида кколеб буго Семинидасаги лъикIав тренер гьениве вачаниги гьесдаги щибниги гьабизе кIвезе гьечIилан».

Юрий Семин Анжиялъул тренасул хъулухъалдаса гIодов чIолев вугилан абураб хабар къватIибе лъалелде чанго къоялъ цебе хабар баккун букIана гьединго клубалъул хважаин, дагъистанияв Сулейман Керимовас дагь-дагьккун Анжиялдаса квер босулеб бугилан, дагьабги бичIчIуледухъ абуни Керимовасда ракIалда рагIулин тIубанго клубалдаса инкар гьабизеян. Уяб букIине рес бугиш гьеб хабарали «Эркенлъи» радиоялъе бицунеб буго, футболги гьелда сверухъ лъугьунебщинабги рагIа-ракьанде щун бичIчIулев ва лъалев МахIачхъалаялдаса Темиркъаев Ильясица.

Ильяс Темиркъаев: «Киназдаго ккун букIана премьер-лигаялде нахъбуссун хадуб кIиго соналъ цере рукIаралго гIадал кIудияб даражаялъул футболисталги росизе ратилин гьанже Анжиялде ва гьеб дагь-дагьккун цебе инилан.

Амма Европаялъулаб даражаялъулцин гурел, Россиялъул клубаздасаги гьунар бугел футболистал рачIинчIо Анжиялде ва рокъор тIоритIулел хIаяздацин бергьинеги кIвечIо гьелда. Гьединлъидал дида кколеб буго Керимовас дагь-дагьккун Анжиялдаса инкар гьабулеб бугин абураб хабаралда жанибги цо кьучI букIине бегьулилан.

Гьеб гуребги гъоба цо гьадинаб гIунгутIиги буго. Гьанже Россиялъул киналго клубазда билъинабулеб буго финансовияб фэйр-плэй абураб программа. Гьеб сабаблъун кIун батизеги бегьуларо командаялде цIиял гIолохъаби росизе. Ратизе бегьула цогидал гIиллабиги. Гьеб гуребги гьанже экономикаялъе захIматаб заман бачIун буго. Жиндирго бизнесалда кIудиял квал-квалал дандчIвалел рукIиналъги чIалгIун батизеги бегьула Керимовасда «Анжи».

Гьаниб дагьаб баян гьабизе ккола Ильясица бицунеб буго финансовияб фэйр-плей абураб жоялъул магIна. Гьане киналниги Россиялъул футболалъул клубазда тIадаб рагIула лъагIалида жаниб клубалъ харж гьабурабги, гьелъие хайиралъе щварабги гIарац бащадаб роцада чIезабизе.

Гьеб масъала гIумруялде бахъинабизе захIмалъизе бугин Анжиялъеян рикIкIунеб буго Ильясица. Кинаб букIине бегьулеб гьалдаса хадуб Анжиялъул къисмат бажаризе бугиш гьелде цебе букIараб борхалъиялде бахинеян гьикъидал гьадин бицана Ильяс Темиркъаевас.

Ильяс Темиркъаев: «Цебе букIараб даражаялде Анжи гIагараб заманалда бахинилан абизе дида кIоларо. Гьаб соналда мухIканго лъугьонаро гьеб иш. ТIоцебесеб ирграялда цо лъабго лъикIав, цеветIурав футболист хIажалъула Анжиялъе гьеб даражаялде бахине ккани. ГьабсагIатин абуни гьенир хIалел руго гIолохъанал, амма лъикIаб хIалбихьи гьечIел гIолохъаби.

Анжиялда гьабсагIат цебечIараб масъала буго премьер-лигаялдаса нахъе инчIого гьениб жидерго бакI щула гьабизе кIвей. Гьелдаса хадуб пикру гьабизе бегьила бергьенлъабазулги, турниралъул сияхIалъул цебесеб кьерде рорчIизе хIаракат бахъиялъулги».

ГьабсагIат Анжи буго футболалъул турниразул сияхIалъул 16-абилеб бакIалда. Гьеб ккола аххадаса байбихьун кIиабилеб бакI.

XS
SM
MD
LG