Россиялъ жавабиял галаби гьаризе ккезе ругин, Цолъарал Штатаз Германиялде жидерго къого атомияб бомба щвезабулеб бугониян, лъазабуна Россиялъул президентасул пресс-секретарь Дмитрий Песковас. Цолъарал Штатазул цIиял атомиял бомбаби Германиялъул авиабазаялде щвезаризе ругел планазул хIакъалъулъ лъазабун букIана немцазул ZDF телеканалалъ.
Гьеб телеканал гьединаб пикруялде бачIун буго хадусеб соналъе Америкаялъул гьаваялъул рагъул къуватазе биччалеб гIарцил къадаралде балагьун. Песковасул рагIабазда, Германиялда цIиял атомияб бомбаби лъеялъул галиялъ биххизабизе бегьула Европаялда стратегияб баланс. Гьеб рукIалиде бачиналъул мурадалда Россиялъ гьаризе ккезе руго жиндирго жавабиял галаби.
Хадуб Россиялъул рагъулаб дипломатиялъул вакильзабаз баянлъизабуна, бицен гьабулеб букIине бегьулин Калининград областалда «Искандер-М» абурал оперативиялгун тактикиял ракетабазул комплексал лъеялъулин.