Халкъаздагьоркьосеб атомияб энергиялъул агентлъиялъул инспекторазухъе Парчин абураб базаялдаса ракь кьунин Ираналъул атомияб энергиялъул экспертазин, лъазабуна халкъаздагьоркьосеб идараялъул вакил Бехруз Камальвандица.
Гьесулго рагIабазда, гьеб ракь бакIарулеб мехалда рагъулаб базаялда рукIун гьечIо МАГАТЭялъул инспекторал.
Халкъаздагьоркьосеб атомияб энергиялъул агентлъиялъул специалистаз чанго соналъ гIамал гьабулеб буго объекталде щвезе, ругищали гьенир уран бечелъиязабиялъул лъалкIали баянлъизабиялъул мурадалда.
Цебе МАГАТЭялъул инспектораз лъазабулеб букIана Парчин абураб рагъулаб базаялда объектал ралел ругин. Гьелъул хIакъалъулъ лъазабулеб букIана гьединго Цолъарал Штатазул хасал хъулухъазги.
ГьатIан къоялда гьеб объекталде щвана МАГАТЭялъул бетIер Юкия Амано. Гьеб кколеб рагIула Тегераналдаги асар кIудияб анлъго улкаялдаги гьоркьоб гьабураб къотIи-къаялъул хIасил.
Халкъаздагьоркьосеб атомияб энергиялъул агентлъиялъул бетIерас лъазабуна, жиндир хьул бугин соналъул ахиралде ираналъул ядерияб программаялда хурхун тIолабго инспеция гьабизе рес щвезе букIиналъулин.