Мигрантазул кIудияб къадаралъ Германия «цIезабизе ва хисизабизе» буго чанго сонида жанибин, лъазабуна итни къоялъ журналистазда канцлер Ангела Меркелица. Евроцолъиялъул цогидал пачалихъалги гьелъ ахIана мигрантал къабул гьариялде.
Меркелица лъазабуна, Германия хIадураб бугин гьел къабул гьаризе, гьезие дагьалъ бигьаяб къагIидаялда лъутун чIезе бакI кьезе, минаби раялъул проектал гIумруялде рахъинаризе. Амма жиндир улкаялда жибго чIун гьединаб масъала тIубазабизе бажаруларин. Гьединал мурадал тIуразаризе бажарулин, Европаялъул улкаби цадахъ лъугьун хIаракат бахъулеб бугонийин, жубана Меркелица.
Арал гIодоркъоязда Германиялда вачIана 20 азарго гIанав иммигрант. Нухмалъуда бугеб Меркелил коалиция разилъун буго жидерго бакIаздаса лъутизе ккаразе квербакъи гьабиялъе анлъго миллиард евро биччазе.
Цолъарал миллатазул гIуцIиялъул лъутизе ккаразул ишазул идараялъ Евроцолъи ахIулеб буго 200 азарго иммигрант къабул гьавиялде.
ГIагараб Машрикъалдасаги Африкаялдасаги лъутизе ккаразе кумек гьабиялъул рахъ кколеб букIиналъул хIакъалъулъ лъазабуна Испаниялъул къватIисел ишазул министр Хосе Мануэль Гарсия Морайо.