Россиялъ улкаялдаса нахъе гъуна Петербургалда хIалтIулев вукIарав Украиналъул консул Игорь Федикевич, ян лъазабулеб буго Россиялъул информалатаз къватIисел ишазул министерлъиялъул цо-цо вакилазул баяназда мугъ чIвай гьабун.
Гьеб букIанин жавабияб тадбир. Дагьалъ цебе Украиналъул тIадтараз Одессаялдаса нахъе гъуна гьенив генералияв консуласул ихтиярал тIуразарулев Валерий Шибеко.
Гьадинаб хIукму гьабун бугоан Украиналъул ХIинкъи гьечIолъи цIунулеб хъулухъалъул тIалаб гIадахъ босун. Низам цIунулезул баяназда рекъон Шибекоца дипломатиялде данде кколарел ишал гьарулаан.