Алексей Навальныясул Коррупциялде данде къеркьеялъул фондалъ рикIкIунеб буго, Россиялъул президент Владимир Путинил пресс-секретарь Дмитрий Песковас «Сумма» абураб группаялъул бетIергьан МахIамадов Зиявудинихъа кIудияб ришват босанин.
«Гьеб ришват кьунин натуралияб къагIидаялда, ай ригьиналъул моцI тIобитIиялъе дунялалдаго бищунго кIудияблъун рикIкIунеб Maltese Falcon абураб яхта ижараялъе босунин», абулеб буго фондалъул лъазабиялда. Яхта ижараялъе босун букIарабани, живго Песковасе моцIрое гьеб чIезе букIанин 26 миллион гъурущалъейин, жубалеб буго лъазабиялда.
Фондалъул экспертаз Россиялъул ЦIех-реххалъул комитеталдаса тIалаб гьабулеб буго гьеб хIужжаялда хурхун цIех-рехх байбихьи.