Пакистаналъул шималиябгун-магърибалъул рахъалда хамиз къоялда рагъулаб авиациялъ кьаби щвезабун буго Афгъанистаналъулгун гъорхъода аскIоб экстремистазул чIей бугел бакIазда. Лъазабулеб буго гьенив чIварав 43 чиясул.
Гьеб кьабиялъул мухIканлъабазул ва гьенир чIварал киса рукIаралали жеги къватIибе бицунеб гьечIо. Магърибалъул информ-агентлъияз лъазабулеб буго гьел официалиял баянал уял ругелищалиги лъаларин, щайгурелъул гъорхъоде аскIоре ине журналистазе гьукъун бугин.
Араб соналъул июналдаса нахъе Пакистаналъул аскарияз кIудияб рагъулаб операция гьабулеб буго Шималияб Вазиристаналда. Гьезул мурад-гьенир Пакистаналдаса ва къватIисел улкабаздаса гIадамаздасан гIуцIун ругел рагъулал къукъаби тIагIинари.
Пакистаналъул хIукуматалъ лъазабулеб буго операция байбихьаралдаса гьеб территориялъул 90% изну гьечIого яргъидгIуцIарал къукъабаздаса «бацIцIад» гьабизе кIванин жидедайин ва гьелъул хIасилалда чIван вугин 3000-гIан экстремистин.