Псков икълималъул диванханаялъ Эстониялъул хIинкъигьечIолъи чIезабулеб полициялъул хIалтIухъан Эстон Кохверие кьун буго кьварараб низамалъул колониялъул 15 сон ва гьесда тIад къотIун буго 100 азарго гъурщил гIакIа. Гьедин диванханаялъ Кохвер лъазавуна жасуслъи гьабиялъул, яргъил контрабанда гьабиялъул ва къунуналде данде кколареб куцалда гIурхъи бахиналъул гIайиб бугевлъун.
Россиялъул ФСБ-ялъ Кохвер ккун вукIана араб соналъул сентябралда. Гьесухъ батун букIана гулбигун таманча, 5000 евро, балъго аудио хъвалеб техника ва жасуслъи гьабиялъе хIажатал гIадинал материалал. Кохверица живго гIайиб гьечIевлъун рикIкIунев вуго. Таллиналъ абулеб буго Россиялъул хасал хъулухъаз гьев жидер территориялда ккуни ва хадув Россиялде вачанин. Кохвер вукIине вуго Россиялъул туснахъалда.