Избербаш шагьаралдаса МухIамадова Зарема рос кколев вуго низам цIунулезул сияхIалда вукIарав чилъун. Рос туснахъ гьавуралдаса нахъе МухIамадовалъухъе рокъоре рачIунел руго низам цIунулел, батIи-батIиял суалалгун, 2015 сон байбихьаралдаса экстремизмалде данде къеркьолеб бутIаялъул хIалтIухъан вачIун вуго лъималгун кIалъазе хIажат бугилан абун. Заремал руго кIиго лъимал, лъабго ва ункъо сон бугел.
Рокъоре рачIун полициялъулаз тIалаб гьабулила лъимал хасаб сияхIалде роси. Гьелгун гара-чIвари гьабизе кколин абун рачIунин хIалтIухъаби, кинаб гара-чIвари ва сундул бицинеб низам цIунулез 3 сон бугеб лъимергунали жинда бичIчIуларилан абулеб буго лъималазул эбелалъ.
2015 сон байбихьаралдаса вагьабиязул сияхIалде гIадамал росун, гьезул ихтиярал хвезариялъул 20 гIанасеб гIарз бачIанин, гьелдаго цадахъ ругин гIарзал низам цIунулезул сияхIазде вагьабил абун сияхIазде ккаразул ва хасал операцияби тIоритIулаго чIваразул лъимал сияхIазде росиялъулгийилан лъазабулеб буго инсанасул ихтиярал цIунулеб «Мемориал» гIуцIиялъ
ГIемерисеб мехалда гIадамазда щибго лъалеб гьечIо жалго сияхIалде росун рукIиналъул, нухда унаго, халгьабизе чIезарун, цинги гьенир сагIатаз чIезарун, яги бокьараб бакIалда полициялъул аскIоре рачIун жанисел ишазул бутIаялде рачин лъалеб буго профучеталда лъун рукIин.
СияхIазде росарал гIадамазухъе рокъоре низам цIунулел ва Балугълъиялде рахинчIезул ишал кодосел инспекторал рачIун, цIех-рех гьабулеб буго хъизамалде тIаде бачIунеб мухьалъул, хIалтIулеб бакIалъул, лъималазул цIалулеб бакIалъул. Цо-цо бакIазда гьединал хъизамазде раккизе рачIунел ругила моцIи-моцIиеги.
Изну гьечIогон яргъидгIуцIаразулгун бухьен букIиналда бан туснахъ гьарурал, яги хасал операциялда чIварал эбел-эмен ругел, яги профилактикияб сияхIалда низам цIунулезухъ ругел гIадамазул рокъоре хьвадулел руго Балугълъиялде рахинчIезул ишал кодосел инспекторал
Избербаш шагьаралдаса цогидай гIадан, МухIамадова Сапиятица баян гьабухъе, 2011 соналъ гьелъул рос туснахъ гьавидал, гьелъухъа ДНК анализал росун руго ва гьей сияхIалде йосун йиго жийгоги.
2015 соналъул ихдал гьелъухъе рокъое ячIун йиго Балугълъиялде рахинчIезул ишал кодосеб нухмалъиялъул хIалтIухъан ва тIалаб гьабун буго гьелъул кIиго сон бараб лъимадул документал, гьел хIажат ругилан абун.
ТIоцебе эбелалъ инкар гьабидал, хIалтIухъаналъ нахъеги ячIун абун буго гьединаб тIалаб бугин Дагъистаналъул Жанисел ишазул министрасул, сияхIазде росарал эбел-инсул лъимал сияхIалде росейилан абун. Гьелдаса хадуб Сапиятица жиндирго ва васасул документал кьун руго ва гьездасан хъвй-хъвагIай гьабураб кагътида гъулбасги гьабун буго.
ХIакъикъаталдаги Дагъистаналда лъимал сияхIалде роси щуго соналъ цебе байбихьанин абулеб буго «Черновик» газеталъул журналист МухIамад МухIамадовас. Гьеб иш байбихьулила аслияб куцалъ школабаздасан.
МухIамад МухIамадов: «5-6 соналъ цебе байбихьана вагьабиязул сияхIазде росарал чагIазул лъимал, салафиязул лъимал, эбел-эмен хасаб операция тIобитIулаго чIварал улбузул лъимал хасал сияхIазде росизе. Полициялъулал, яги Балугълъиялде рахинчIезул ишал кодосел инспектораз школазда ва лъималазул ахазда хал гьабун, эбел эмен салафиял ругел ва цогидал хъизамаздасан лъимал росула гьединал сияхIазде.
Масала, школазда гьеб гьадин букIуна: участковый вачIунев вуго школалде ва директорасда абун яги жинцаго хал гьабулеб буго лъималазул, хIижаб чIварал ясал ругищали, мисалалъе. Гьединал лъималазул рокъо-рокъоре ун, гьес хал гьабулеб буго суфиязуллищ гьеб хъизам яги салафиязулищ, салафиязул батанани, гьел лъимал сияхIаздеги росулел руго.
Гьеб учеталда вагьабиязул оперативияб учет бугилан абизе бегьуларо, гьеб буго батIияб сияхI, лъикIаб гьечIеб хIал бугеб хъизамалдаса лъималазул гIадинаб, амма низам цIунулезда лъала, гьеб пуланаб лъимер гьединаб сияхIалда букIин ва балугълъиялде бахун хадуб гьединаб лъимер вагьабиязул сияхIалде ккезеги рес буго».
Балугълъиялде рахинчIезул ишал кодосел инспектораз гьеб сияхIалде лъимал роси ва гьелгун хIалтIи гьаби бичIчIизабулеб буго лъимал улбузул лъалкIаздасан инчIого рукIиналдаса цIуниялъе гьабулеб хIалтIи бугилан абун.
Гьанибго абизе ккола, Цо-цо экспертазул баяназда рекъон, Дагъистаналда тIурарал росабиго руго профилактикаялъул сияхIазде росарал. Масала, отставкаялда вугев полициялъул полковник СалихI ХIажиевас «Черновик» газеталъе баян гьабухъе, Унсоколо мухъалда руго гьединал росаби ва гьединаб сияхIалде чи восун, гьенисан нахъе вахъизе кканани 70 азарго гъурущ кьезе кколеб буго.
Профилактикаялъул сияхIал гIуцIи инсанасде тIадецуй, хIал гьабиялдаго цадахъ бизнесги кколин баян гьабулеб буго гьес.
