«Надирия» мажгиталъул имам хисулев Аскандаров Къурбан 27 маялдаса бахъун ккун вугин МахIачхъалаялъул Советский мухъалъул Жанисел ишазул бутIаялда, гьеб къоялъ радалидаса бахъун гьев кив вугевали чIезабизе кIолеб букIун гьечIин гьесул гIага-божараздайин лъазабулеб буго жамгIияв хIаракатчи Идрис Юсуповас. Жанисел ишазул бутIаялда Аскандаров кквеялъе гIилла изну гьечIого цIунараб ярагъ батиялда щаклъи букIин бугин лъазабунила.
28 маялда ккурасул эбелалъ ихтиярал цIунулеб «Мемориал» гIуцIиялде гIарза кьун буго кумек гьарун, жиндир васасда хурхун такъсир гьабиялъул иш гIуцIун букIиналда бан. ГIарзаялда хурхун халгьаби тIобитIулеб бугилан лъазабулеб буго ихтиярал цIунулеб гIуцIиялъул вакилзабаз. Гьебго къоялъ, Дагъистаналъул ЖамгIияб халгьабиялъул комиссиялъул вакилзаби Нелли Раджабова ва Руслан Расулов щвана Советский мухъалъул Жанисел ишазул бутIаялде ккуравгун дандчIвазе. ЖамгIиял вакилзабаз баян гьабухъе, Аскандаровасе кинабгIаги хIал-зулму гьабиялъул лъалкIал гьечIо, амма гьев тIамураб бакI кколел шартIал чIезарураб гьечIин лъазабулеб буго. ГьабсагIаталда Дагъистаналъул Прокуратураялде ккурав хIебтIун вугев бакIал кколел шартIал чIезабураб гьечIолъиялда бан гIарза кьун бугилан лъазабулеб буго Дагъистаналъул ЖамгIияб комиссиялъ.
28 маялда къасиялдехун, жидер рокъоре Экстремизмалда данде къеркьолеб идараялъул хIалтIухъаби ва низам цIунулел рачIун чIухь банин баян гьабуна «Эркенлъи» радиоялъе ккурасул эбел Сакинат Аскандаровалъ. Амма щибгIаги гьукъараб жо гьезда батичIила, гIицIго чанабе босулеб тумаркI гурого, гьеб цIунизе изнуги бугила Къурбанилин лъазабуна эбелалъ.
Советский мухъалъул Жанисел ишазул бутIалда ккун вугев Аскандаров жинда вихьзе толев гьечIин лъазабулеб буго гьесул адвокат Руслан Чупановас. Жанисел ишазул бутIаялъул хIалтIухъабаз гьенив вукIине кколев сурав босулев чи гьечIин гIилла бачунеб бугила.
Руслан Чупанов: «Полициялъул бутIаялда цеве чIун вуго дун, сон бакъанида ункъо тIубаралдаса нахъе, дица цIунулевгун дандчIвазе виччалев гьечIо дун. Дица 28 маялдаго гьев цIунулев вукIин мухIкан гьабулеб ордер кьуна ва гьесул иш кодобе босана, амма сонго гьесухъа сурав босун буго, ва цогидал цIех-рехалъул тадбирал тIоритIун руго. Гьел тадбирал тIоритIулаго вукIине ккола адвокат. Жакъаги, радал сагIат ичIго тIубаралдаса нахъе Жанисел ишазул бутIаялъул кIалтIа вуго дун, амма жеги виччачIо Къурбанихъе, гьенив вукIине кколев сурав босулев чи гьечIилан абун».
Къаде, сагIат цо тIубараб мехалъги жинца цIунулев вихьизе теялъе квекIен Жанисел ишазул бутIаялъул хIалтIухъабаз гьабулеб букIиналда бан, Дагъистаналъул Прокуратураяде гIарза хIадурулеб бугин тIаде жубана адвокатас. Аскандаров цIунизе гьеб ишалда гъорлъе лъугьарав цогида алвокат, Рашид Джафаровас лъазабулеб буго Аскандаров жиндаги вихьизе течIилан. Жанисел ишазул бутIаялъул сурав босулев чияс лъазабухъе, щаклъи бугесе тамихI гьаби чIезабизе кколила Советский мухъалъулаб диваналъ 29 маялда, бакъанидехун.
Аскандаров кквеялъе гIилла цо бихьулин, гьев салафияв вукIинин абулеб буго гьев лъалел–хъвалел гIадамаз.
