Гепатит А вирус бугел 23 чи ватун вуго Гъарабудахкент мухъалъул Доргели росулъ, гьезда гъорлъан гIемерисел лъимал руго. Гьебго диагноз букIине рес буго инфекциялъулаб азарханаялде анализал кьезе рачIарал 18 чиясулги.
Сахлъи цIуниялъул министерлъиялъ лъазабухъе, росдалчагIазе прививкал гьарулел руго, унтаразе букIине кколеб медикияб кумекги чIезабун буго. Министерлъиялъул вакилас абухъе, тохтураз халгьабулеб буго гепатит бугищали цогидал чагIазул. Мисалалъе, 1025 лъимадуе вакцинация гьабун буго.
Доргели росдал нухмалъулев ХIамзат Мурзаевас абухъе, росулъ гьекъезе бегьулеб бацIадаб лъим гьечIо, гьелдалъун гепатиталъул эпидемия ккезе рес буго гьениб. Лъим бацIад гьабулеб система къваригIун буго росуе. Мурзаевас бицухъе, «бацIадаб лъим» абураб республикаялъул хасаб программаялъул сияхIалда букIана росу, амма гьеб гьениса щаялиго нахъбахъана хIакимаз.