МагъчIваялъе рес

Муниципалиял бутIрул рищизе руго хасал комиссияз


Хадусеб нухалда муниципалиял гIуцIабазул бутIрул Дагъистаналда рищизе бегьула гьелъие хас гьабун гIуцIараб конкурсазул комиссиялъул кумекалдалъун. Гьединал хиса-басиял гьарун рагIула рищиязул къануналда. Гьединаб къагIидаялъ лъикIаб хIасил кьезе бегьулин рикIкIунеб буго инициативаялъул автор ГъазимахIмад ГIабдулаевас. Кинаб бугебали гьелде бербалагьи цогидал гIадамазул.

Гьеб конкурсазулаб комиссиялда гъорлъе ине ругел гIадамазул бащадаб къадар бихьизабизе буго бакIалъулаб нухмалъиялъ, хутIарал бащадал живго республикаялъул нухмалъулес. Нижеца бухьен гьабуна Халкъияб Мажлисалда гьеб къануналъул проект хIадур гьабуразул цояв, «Единая Россия» партиялъул вакил ГIабдулаев ГъазимухIамадилгун. Гьединго гьев ккола бакIалъул нухмалъиялъул рахъалъ Халкъияб Мажлисалда бугеб комитеталъул нухмалъулев хисулев.

Муниципалиял мухъазул нухмалъулел рищиялъул хIакъалъулъ бугеб федералияб къануналъ рес кьолин гьел рищулеб лъабго батIияб къагIида хIалтIизабизеян бицана гьес «Эркенлъи» радиоялъе. ТIоцебеселда рекъон нухмалъулев вищулин халкъалъ гьарулел рищиялги тIоритIун, кIиабилеб, мухъалъулаб мажлисалъул депутатаз гьаркьалги кьун ва лъабабилеб нух бугин бицен гьабулеб конкурсазулаб комиссияги гIуцIун гьарулел рищиял. Гьеб лъабалдаго гьоркьосан бокьараб къагIида хIалтIизабизе рес кьолин регионалъе.

Халкъияб Мажлисалъ тIаса бищанин лъабабилеб, конкурсазул комиссияги гIуцIун гьарулел рищиязул. Гьединаб къагIидаялъул лъикIал рахъал ругилан абулеб буго ГIабдулаев ГъазимухIамадица. ТIоцебесеб иргаялда гьеб кколин демократиял рищиял тIоритIиялъе кьураб рес. Гьелъул цогидалги лъикIал рахъазул гьадин бицунеб буго гьес «Эркенлъи» радиоялъе

ГIабдулаев ГъазимухIамад: «Цебе муниципалияб мухъалъул нухмалъулев вищулелъул гьесул квалификациялъул, кинаб лъай гьесул бугеб ва цогидалъулги миллат гьабулеб букIинчIо, гьес кандидатура лъураб гIолеб букIана. Гьедин чанги хIужаби рукIана кинабниги махщалил хIалбихьи гьечIев, нухмалъулесул практика гьечIев чи мухъалъул нухмалъулевлъун вачIараб. Гьанже конкурсазул комиссиялъ хал гьабизе буго гьелъул рагIа-ракьанде щун. Бокьарав гражданинас лъезе бегьула гьенибги кандидатура. Гьесул рахъкквезе бегьула батIи-батIиял партиялъул вакилзабазги. Амма конкурсазулаб комиссиялда цере лъурал тIалабазда рекъон, гьез мухIканго хал гьабизе буго гьесул документазул ва конкурсазул комиссиялъги кинабго рахъ дандекколев чи гурони гьениве восуларо кандидатлъун».

Муниципалиял рищиязул хIакъалъулъ къануналда гьабураб гьеб хиса-басиялъул рахъ ккун, Халкъияб Мажлисалъ кIиабилеб цIалиялдалъун къабул гьабун буго гьеб къануналъул проект. Гьанже хIалтIи гьабулеб бугин конкурсазул коммисссиялде гъорлъе унел чагIи тIасарищиялъул ва цогидалги масъалабзда хурхунилан бицана ГIабдулаев ГъазимухIамадица.

Гумбет мухъалъул рищиязулаб комиссиялъул нухмалъулев, Амагаев ГIабдулмажидица гьадинаб къимат кьолеб буго конкурсазул комиссиялда рекъон бакIалъул нухмалъулел рищулеб къагIидаялъе.

Амагаев ГIабдулмажид: «Гьенир цо-цо дандеккунгутIиял рихьулел руго дида. Мисалалъе конкурсазул комиссиялда рекъон вищарав чи росдал нухмалъулевлун вачIине бегьулиш ва гьел гурел цогидалги суалалги хутIулел руго. Амма жибго гьеб лъикIаб пикру бугилан кколеб буго дида, гьединаб буго халкъалъулги пикру. Дида ккола лъикIаб хIасил кьелин гьелъилан. Конкурсалдеги хIадурарав чи гурони вачIинаро, мустIахIикъав чи гурони гьенивеги вачIинаро. Нижер мухъалдаги I5 муниципалияб гIуцIи буго, анцIила щуялдаго росдал мажлисалъул вакил вищизе ккола, I3 бакIалда нухмалъулев вищизе ккола»

ГIадатиял гIадамазги, гьединго цо-цо жамгIиял хIаракатчагIазги, журналистазги, халкъалъ гьарулел рищиязул цIикIкIун рахъкколин Дагъистаналда, амма гьединал рищиязул рукIарал хIасилалги рихьанин нилъедаян абуна хадубги «Эркенлъи» радиоялъе, Халкъияб Мажлисалъул депутат ГIабдулаев ГъазимухIамадица. Жинца абиларин бицен гьабулеб конкурсазул комиссиялъ гьарулел рищиялги щвалде щварал рукIинилан, амма ккарал гъалатIазда тIадги хIалтIун гьезул даража борхизабизеги бегьулин абулеб буго гьес.

Гьеб къануналда гъоркь жиндиро гъулбас лъун, гьелъул рахъккун буго республикаялъул нухмалъулев Рамазан ГIабдулатIиповасги.

XS
SM
MD
LG