Борис Немцов чIвана политикияб режималъ-лъица кьвагьарали батIалъ гьабичIого. Гьедин лъазабуна Эркенлъи Радиоялъул гIурус хъулухъалъе гьесул вукIарав адвокат Вадим Прохоровас.
РПР-ПАРНАС партиялда Немцовасда цадахъ рукIарал гьесулгун пикру гIахьалаз абулеб буго Кремлалда аскIов оппозициялъул лидер чIваялъ бихьизабулеб бугин улка кIкIалахъе хъущтIулеб букIин ва гьелъул политикияб жавабчилъи тIалъиялда бугин. Америкалъул президент Барак Обамаца ва магърибалъул цоги лидераз гьеб такъсир кьварун какулеб буго ва Россия ахIулеб буго гьелъул кколеб цIех-рех гьабизе. Борис Немцов чIван вукIана 27 февралалъул сардилъ кватIараб гIужалда Кремлалда аскIоса гIебеде тирулаго. АскIосан араб автомашиналдасан кьвагьараб анлъго гуллаялъул гьесда ункъгояб щун бугин лъазабулеб буго низам цIунулез. Немцовасе букIана 55 сон ва гьев вукъизе вуго 3 марталда.