МагъчIваялъе рес

Кирпич къотIулел заводал къалел руго


Дагъистаналъул тIабигIиял сурасатазул ва эколоргиялъул министерлъиялъул тIалабалда рекъон кирпич къотIулеб 76 заводалъул хIалтIи чIезабун буго. Амма тIабигIат цIуниялъул прокуратураялъ абулеб буго гьеб гIицIго министерлъиялъул тIалаб гIоларин завод къазе ккани.

Амма гьезул ихтияр букIунарин заводалъул хIалтIи чIезабизе, гьелъие диваналъул чIванкъотIараб хIукму хIажалъолин абуна «Эркенлъи» радиоялъе МахIачхъалаялъул тIабигIат цIуниялъул прокурор НурмухIамадов ГIалица. Мисалалъе гьезул идараялъ халгьабиялги тIоритIун, гьелъул материал диваналдеги кьун, чанго завод къан буго церегIан соназ Гъизляр шагьаралда, Тарумовка мухъалда ва цогидал бакIаздаги. Каспийскалда аскIор ругел заводазулги хал гьабун буго гьез, амма гьел къазе гIураб гIунгутIаби гьезул хIалтIулъ ратичIилан абуна НурмухIамадов ГIалица. Гьел халгьабиял исана цIигьарун руго, щайгурелъул цересел соназда гьаз хIалтIи гьабулаго ратун рукIинчIел, тIаде цIиял рагьарал чанги заводал ратун руго гьезда Каспийскалда аскIор. Гьезда тIад гьабураб халгьабиялъул хIасил чанго моцIидасан лъазе бугилан бицана гьес.

НурмухIамадов ГIали: «Гьез гIемерал документал хIадуризе ккола нижеда рихьизе. Гьел заводаз къватIире кьолел хутIелазул ракь хIалтIизабиялъул ва гь.ц. Мисалалъе гьез хIалтIизабулеб ракьалъул категория дандеккезе ккола магIишаталъулаб категориялда. Гьел гурелги санэпиднадзоралъул, экологиялъул ва цогидалги иадарабздасаги рукIуна гьездаса тIалаб гьарулел документал. Гьезул цонигияз гIунгутIи тIатинабуни административияб гIакIаги къотIула гьезда тIад.

ЭР: «Мисалалъе чанго соналъ цебе Каспийскалда гIумру гьабун ругел гIадамазул гIарз букIана, кирпич къотIулел заводаздаса бачIунеб кIкIуялъ битIахъе накIкI лъун бугила шагьаралда тIадилан».

НурмухIамадов ГIали: «Каспийскалде цониги кирпич къотIулеб заводалдаса кIкIуй унаро, гьеб уна кьищни-къул бухIулеб бакIалдаса. Гьеб дида лъала. Нижеца гьарурал халгьабиязул цонигиялда батичIо заводалдаса Каспийскалде яги цогидаб бакIалда сверухъ гьаваялъе зарал гьабизе бегьулеб хIужа. Гьел заводазда кирпич бухIизе хIалтIизабула хъахIилаб цIатари, гьеб бухIун хадуб хутIелазул миллиграммазул хIисаб гьабуни гьеб буго чанго азарго нухалъ дагьаб, гьелъул зарал бицине гIураб гьечIо».

Республикаялда кирпич къотIулел заводазул бугеб хIажалъиги бихьун ункъо завод танин жидеца хIалтIизеян абулеб буго ТIабигIаталъул рахъалъ министерлъиялъ.

Дагъистаналъул кирпич къотIулел заводазул «Эркенлъи» радиоялъ гIемер бицана жиндирго эфиралда, гьенир лагъзал гIадин хIалтIизарулел ратарал гIадамазул хIакъалъулъ. Гьел гIадамал хвасар гьариялда тIад хIалтIулеб «Альтерантива» абураб къукъаялъул гIахьалчи ИсмагIилов Закирица бицунелда рекъон гьел заводазул хIакъикъияб къадар бахчулеб буго информ.алатаздаса. Гьедин 76 гуреб гьединал заводал 180 ниги ругин республикаялда.

XS
SM
MD
LG