Россия - къватIиса фотографазул бераздалъун

Гьал къоязда Москваялда академик Сахаровасул Централда рагьана къватIиса пачалихъаздаса фотографаз рахъарал суратазул экспозиция. 20 соналда жанир Нидерландиялдасаги Фламандиялдасаги 10 фотографас Россиялъул батIи-батIиял регионазда рахъарал суратал ккола гьел (Бертинван Манен (Bertien van Manen), Роб Хорнстра (Rob Hornstra), Карлде Кайзер (Carl de Keyzer), Питертен Хупен (Pieter Ten Hoopen), Герт Йохемс (Gert Jochems), Гертьян Корнелиссен (Geertjan Cornelissen), Райнирде Влаам (Reinier de Vlaam), Павел Прокопчик (Pavel Prokopchik), Збышек Косч(Sbignew Kosc), Лео Эркен(Leo Erken). Экспозиялда лъурал суратал рихьизаризе руго жеги Россиялъул анцIго шагьаралдаги (Москва, Екатеринбург, Пермь, Чебоксары, Самара, Тверь, Углич, Санкт-Петербург, Новосибирск, Красноярск). Гьел суратазда гъоркь хъван гьечIо Россиялъул кинаб бакIалда, щиб махщел-пишаялъул яги кинаб ахIвал-хIалалде ккарал гIадамал гьелали. Амма хъвачIониги бичIчIула гьенир рихьулел киналго гIадамал чара къосарал, рес къотIарал гIадамал рукIин. ТIад балагьун бичIчIула гьез гIумру гьабулеб заманги. Аслияб куцалда гьел ругин ккола советияб пачалихъ биххулеб заман ва гьелдаса хадусеб мех. Экспозиялде ун йикIана нижер мухбир Зульфия ХIажиева.