ЦIех-рехалъул идарабаз рикIкIунеб букIана гьес прокуратураялда хIалтIулеб заманаялъ жиндир хъулухъалдаса пайдаги босун документ хисизабун бугин, изну гьечIого ярагъ босун бугин ва жиндир рокъоб гьеб цIунун бугин. 20I3 соналъул ноябралда гьесул рокъоб чIухь бан хадуб батун букIун бугин гьеб ярагъ.
Диванчияс сагIатгун бащдаб заманаялъ цIалана гьесие тамихI гьабиялъул документ ва ахиралдаги хIукму гьабуна документ хисизабиялъулъ ва ярагъ цIуниялъулъ гьесул гIайиб бугин, амма ярагъ босун букIин гьес цIех-рехалъ чIезабун гьечIин. Адвокатазин абуни рикIкIунеб букIана, ярагъ гьесул рокъобе рехун бугин жалго цIех-рехчагIаз гьев тамихIалде цIаялъул мурадалда. Диванчи гьелда разилъичIо.
Оруджевасул адвокат Таибат Салмановалъул рагIабазда рекъон, диваналъул хIукмуялда гьей рази гьечIо, амма тамихI жеги кьварараб букIине бегьилаанин абуна гьелъ. Гьелъул пикруялда рекъон, ярагъ прокурорас босунги букIун батичIони, гьесухъе гьеб щвараб куцги цIех-рехалъ чIезабун батичIони, ярагъ цIуниялъул гIайиб гьесда гIунтIизаби мекъаб буго, гьелъ бицунеб буго ярагъ гьесул рокъобе гьесда лъачIого ккезе рес букIин. Гьединлъидал, диваналъул хIукмуялда ниж рази гьечIо ва тIадехун бугеб диваналде гIарза кьезе бугилан абуна гьелъ.
ХIукмуялдаса рази гьечIоан Дагъистаналъул прокуратураялдаги. Гьеб идараялъул пресс-хъулухъалъул нухмалъулей Татьяна Голубовалъул рагIабазда рекъон, тамихI цIакъго тамахаб буго ва гьелда дагIба базе буго прокуратураялъ.
Татьяна Голубова: «Дир хIисабалда нижер идараялъ гьеб тамихIалда рази гьечIолъи загьир гьабун тIадегIанаб диваналде гIараза кьезе буго. Диваналъ цо-цо гIайибал гьесда тIаса рахъана ва тамихI тамах гьабуна. Амма гьасагIаталда кинабго тамихIалъул документ нижехъе щвечIого мухIканаб жаваб кьезе кIоларо, кинаб къануналда рекъон кинаб тамихI гьесие къотIизе ккун букIарабали.
Гьелдаса хадуб кинабго нижер позиция бихьизабураб информация прокуратураялъул сайталда лъезе буго. Гьев цеве вукIарав прокуратураялъул хIалтIухъан вуго ва нижеца нижерго идараялда жанир ругел къанун хвезабулел хIалтIухъабазул цохIо гьев гуро тамихIалде цIалев.
РакIалде щвезаре МахIарамкенталдаса прокурор Ханамиров хъулухъалдаса нахъе витIун вукIана гьесул вас – гьевги прокуратураялъул хIалтIухъан - кьвагьа-гIанхъи бугеб тунка-гIусиялде гьоркьове жуван вукIиналъ. Гьединабго къагIидаялъ хъулухъалдаса нахъеги гьавун тамихIалде цIан вуго Гъуниб мухъалъул прокурорлъун вукIарав МухIамад Шапиев».
РагIалде щвезабилин, МахIачхъалаялъул прокурорасул кумекчи Фарид Ханамировасда ва гьесул вац Амирида тIад уголовияб хIалтIи гьабун буго полициялъул хIалтIухъанасде кьвагьдон рукIиналъ. Гьезул эмен – МахIарамкент мухъалъул прокурор Гюльмет Ханамирова гьелдаса хадув хъулухъалдаса нахъе витIун вуго.
МахIачхъалаялъул Советский мухъалъул прокурор МухIамад Оруджевасда тIад уголовияб хIалтIи гьаби цо-цояз рикIкIунеб буго жибго прокуратураялда жинаб бугеб конфликталъул хIасиллъун. Ай, Оруджевасулгун республикаялъул прокурор Рамазан Шахнавазовасулгун дагIба ккун хадуб байбихьанин цIех-рехчагIаз Оруджевасда тIад уголовияб хIалтIи гьабизе. Адвокат Расул Къадиевасул пикруялда рекъон, 2013 соналъул ноябралда Оруджевасда абун буго хъулухъ теян, гьесул бакIалда цогидав тIамиялъул мурадалда. Гьев абуни гьебго Советский прокуратураялда гIодобегIанаб цоги хъулухъалда толев вукIана.
Гьес инкар гьабун хадуб гьесда тIад тIоцебе административияб хIалтIи гьабун буго. Хадуб Оруджевас диваналде гIарза кьун буго Шахнавазовас жинда тIад бугьтан лъун бугин, гьев тамихIалде цIайин. Гьелдаса хадуб прокурорасде къуваталъул идарабазул интерес бижанилан рикIкIунеб буго адвокатас.
