Эркенаб гугари Олимпиадаялде тlадбуссинабуна (видео)

8 сентябралда Буэнос –Айрес шагьаралда халкъазда гьоркьосеб Олимпиадаялъул комитеталъ хIукму гьабуна эркенаб гугари 2020 ва 2024 соназда тIоритIулел олипиялъул хIяздаса нахъе бахъичIого тезе. Исана февралалда баккун букIана хабар (FILA) Эркенаб гугариялъул рахъалъ халкъазда гьоркьосеб гIуцIиялъ гугари Олимпиадаялъул хIаязул программаялда гьоркьоса бахъизехъин бугилан. Гьеб хабар рагIун хадуб эркенаб гугариялда жидерго гIумру хурхинабурал спортсменаз гIемераб хъуй бахъинабуна гьелда рази гьечIолъи загьир гьабун, гIемарал кIалъаял гьаруна информ.алатаздаса цере рахъун батIи-батIияб заманалда батIияб даражаялъул турниралда чемпионаллъун рахъарал спортсменаз гьезул тренераз. Гьедин мисалалъе 2000 соналъ Сиднеялда тIоритIарал Олимпиялъул хIаязул чемпион МуртазагIалиев Сагидица МОКалъул хIумуялда жив тIуванго дандечIун вукIин бихьизабизе тIадбусссинабуна жиндирго меседил медаль.

Дагъистаналда бищун гIемер руго Олимпиадаялъул хIаязда меседил медалал щварал гугарухъаби. Гъоркьисала Лондоналда гьабураб Олимпиадаялда Россиялъул гугарухъабазе щвана 11 меседил медаль. Гьезда гьоркьоса ункъо месед щвана дагъистаниязе.

Дагъистаналъул тIасабищараб командаялъул бетIерав тренер Сажидов Сажидица абун букIана доб мехалъ «Эркенлъи» радиоялъе кьураб баяналда жинда кIоларин чIванкъотIун кинаб хIукуматалъул гьединаб мурад бугебали абизе, регби, лъадал поло гIадал цо гьедигIанго жидер машгьурлъи щвечIел, Олимпиадаялъул программаялда гьоркьоса нахъе гьаризе хIисабалде росарал цо-цо спортивиял тайпабазда гьоркьоб рехсон бугин щаялиго эркенаб гугариги, амма гьединал гIиси-бикъинал спортивиял тайпабазда гьоркьоб рехсезе гIадаб спорт кколарин эркенаб гугари.

Сажидица рикIкIунеб буго FILA абураб эркенаб гугариялъул рахъалъ халкъазда гьоркьосеб гIуцIиялъул нухмалъулев Рафаэль Мартинетица гьабулеб хIалтIуда ракIги рекъечIого гьабураб хIукму батизе бугин гьебилан:

Киналго ралагьун чIун рукIана сентябралда Халкъазда гьоркьосеб Олимпиялъул комитеталъ кинаб хIукму къотIилебали.

FILA абураб халкъазда гьоркьосеб эркенаб гугариялъул гIуцIиялъул нухмалъулев Рафаэель Мартинеттил бакIалда Ненада Лалович вищиялъ квербакъанищ гьединаб битIараб хIукумуялъе ян нижер суалалъе гьадинаб жаваб кьуна Сажидица:

Сажидов Сажид: «Дида ккола батIаго хас гьабун я гугарухъабазда я гьезул спорталда дандечIун гьабулеб хIукму букIун батиларин гьезул гьебилан. Гьезул жидерго нухмалъиялда жанирги, FILA ялъул нухмалъулев Рафаэль Мартиннеттил хIалтIуда ракIрекъечIого лъугьарал дандеккунгтIиязул хIасилги букIана гьениб. Гьанже цIияв президентги вищана, гьесги гIемераб хIалтIи гьабун гьел хиса-басияздаса разиго спортсменалги руго. Мисалалъе рукIана дандеккунгутIиял гугариялда гьоркьор хIалтIизарулел къагIидабазда тIасан. Гьанже гьел хисизарун руго. Гьеб киналъго квербакъун батилин ккола дида гьел битIараб хIукмуялде рачIине».

ГьатIан къоялъ МОК-алъул вакилзабаз гьабураб хIукмуялда тIасан «Кавказская Политика» сайталъе кьураб баяналда цIакъ кIудияб рохел загьир гьабулеб буго Олимпиязул хIаязул лъабцIул чемпион машгьурав гугарухъан Бувайсар Сайтиевас Эркенаб гугари гьеб кколин жиндир тIолабго гIумруян абулеб буго спортсменас. Олимпиадаялъул хIаязул программаялдаса гьеб махIрум гьаби гьеб кколин гIумруялъул анищалдаса жив махIрум гьави гIадаб жо. МОКалъ битIараб хIукмуги нилъ киналго рохизе гьарунин, амма кIочон тезе бегьуларин кинал гIиллабазе гIололъун гугри олипиялхул хIаязда махIрум гьаризехъин букIарабли. Гьел гIунгутIаби лъугIизариялде кIвар кьезе кколин нилъецаги. Гьел гIунгутIабазул хIакъалъулъ гьадин бицана Сажид Сажидовас:

Сажидов Сажид: «ГIунгутIаби гъора гIемер рукIана, гьел хисизаризе заман гIолеб букIинчIо МОКалъул нумалъиялъ. Гугариялда жанир хIалтIизарулел къагIидаби рукIана гIемерисел спортсменазе дандекколарел, щибниги жидер мунпагIатлъи гьечIел гьадингояб жо сабаблъун щоланин дандиясе бергьенлъи. Гьеб кинабго бихьарал спортсменазда рихунеб букIана эркенаб гугари. Гьединго гьелъухъ балагьизе рачIаразги рагьун абулеб букIана жидер рокьи бичулеб бугин гьелдаса, тIокIаб балагьизе бугеб гъираялдаса махIрум гьарулел ругин жалилан къваридго. Гьанже гьеб дандеккунгтIиялъул гIурхъиги бахун цIиял хиса-басиязде рачIана ниж».

Буэнос-Айрес шагьаралда букIараб данделъиялда загьир гьабуна 2020 соналъ Олимпиялъул хIаязул тахшагьарги. МОК-алъул вакилзабазул 46 гьаракьги кьун бергьенлъи щвана Япониялъул тахшагьар Токиоялъе.