МагъчIваялъе рес

ШугIайбов адвокатазда вихьизе толев гьечIо


Владикавказалъул туснахъалдагойищ телев, яги къватIивейищ виччалевали Советский мухъалъул диваналъ хIукму къотIизе 20 февралалда МахIачхъалаялде вачун вачIана ШугIайбов Мурад.

Гьев туснахъ гьавиялъе гIиллалъун ккана гьесул рокъоб таманча бати. Гьеб хIужа ккана гъоркьисала 20 декабралда. Рагъулаб таманчаялде сверизабураб газалъул таманча жидер рокъобе жалго низам цIунулез реханилан рикIкIунеб буго гIагарлъиялъги адвокатазги.

ШугIайбов цIунулев вуго лъабго адвокатас. Гьезул цояв ккола ГIумаров ГIадилгерей. ЭР-ялъе гьес бицана 31 январалдаса нахъе цIех-рехчияс жинда вихьизе толев гьечIин ШугIайбов.

ГIумаров ГIадилгерей: "МоцI ана цIех-рехчияс гъов дида вихьизе толарого. Цинги диваналде щведал рукIуна диванчиги прокурорги ахIдолел, гьедин гьабунилан гIарзаби щайин хъвачIел. Дица хъвалеб буго киса-кибего. ГIакъубаги кьолеб буго. Ниж щай гьесухъе риччаларел? Альберт Хасаувов абун вуго цIех-рехчи...".

Адвокат ГIадилгерей ГIумаровасда лъалеб гьечIо жеги чIванкъотIун кина-кинал гIайибал ШугIайбовасде гIунтIизарулел ругелали. Щайин абуни цIех-рехчияс гьесухъе кьун гьечIо Мурад ШугIайбовасде гIайиб гIунтIизабиялъул документ.

ГIумаров ГIадилгерей: "Гьебцин кьолеб гьечIелъул нижехъе. Гъосде гIунтIизабулеб гIайибалъул кагъат кьезе ккола, гьесухъа босараб сурав лъазе ккола нижеда. Гъобги-добги кьоларелъул нижехъе".

Цебехун бицухъе, Мурад ШугIайбов ккун вачун ун вуго ярагъ батанилан. Амма гьеб букIанин багьанадай гьабураб жо, хIакъикъаталда гьесде гIунтIизарулел гIайибал батIиял рагIулин абуна адвокатас. Цо-цо баяназда рекъон, гьесде гIунтIизаризе рес рагIула цойгидал гIайибалги. Гьедин ШугIайбовасул росулъа гIадамазгицин рехсолеб буго гъоркьисала МахIачхъалаялда журналист Камалов ХIажимурад чIвай. Жиндир цIар бицине разилъичIев росуцояс гьединго абуна гьесда нахъа гIезегIан къуватал чагIи ругин. Амма адвокатал чIун руго ШугIайбовасе гIакъуба кьолеб бугин туснахъалда. Гьелъие гIоло электротокгицин биччалеб бугин гьесде.

Гьелда тIасан гIарз бахъун ГIумаров ГIадилгерей ЖамгIияб палатаялъул нухмалъулев ХIамзат ХIамзатовасухъеги ун вукIана 20 февралалда. Амма гьединан гIакъуба кьезе рес гьечIин низам цIунулезилан божизавизе кIолев вукIинчIин жинда гьевилан бицана адвокатас ЭР-ялъе.

ГIумаров ГIадилгерей: "Щив гъос чIварав, чIвазе вугев, щиб гъосда ракIалда бугебали бихьизабулеб гьечIелъул. Цо нухалъ цIех-рехчигун цадахъ кабинеталда вихьун вукIана дида гьев. Цинги гьикъун букIана дуе гьениб гIакъуба кьолеб бугищали. Гьеб мехалда бицун букIана гьес кинабго. Гьеб букIана 31 январалда. Гьелдаса нахъе тIокIалъ дида гьев вихьизе течIо доз. ЦIех-рехчиясги тIокIалъ телефоналъе жаваб кьечIо".

Туснахъалда Мурад ШугIайбовасе гIакъуба кьолеб букIиналъул суал борхизе рагIула 28 февралалда МахIачхъалаялда тIобитIизесеб митингалда.

XS
SM
MD
LG