МагъчIваялъе рес

Киназего цогояб гуреб къанун


Хасавюрталъул мажгиталда аскIор полициялъулал хьвадула щибаб къоялъ.

Хасавюрт шагьаралдаса маскаби хураз ккун арав Ибрагьимов Сабир вугеб бакI лъазе толеб букIун гьечIо гьесул гIага-божаразда. ГьабсагIат гьев заманалъул туснахъалда вугин баян гьабулеб буго гьесул адвокатас. Амма адвокатасда гьев вихьизе толев гьечIила. Гьединго адвокатас лъазабулеб буго низамцIунулезул рахъалъ ругел къанун хвезабиялъул хIужабазул.

27 декабрaлъ ккун вачун арав Ибрагьимов Сабир вугеб бакI лъалеб букIинчIин нахъияб къоялъ лъагIан. 28 декабрaлъ гьев Хасавюрт шагьаралъул заманалъул туснахъалда ватанин лъазабулеб буго гьесул гIага-божараз.

Хасавюрт шагьаралдаса Ибрагьимовазул рокъоре 27 декабрaлъ полициялъул хIалтIухъангун рачIун руго руго маскаби хурал. Гьез танкан Сабир кверал кьурун ккунин ва жиндаги ягъаругейин лъазабунин баян гьабулеб буго гьесул чIужу ГIайнаца.

Гьелъул рагIабазда рекъон, рачIаз валагьулев вукIун вуго гьезул гьенив вахчарав вагьабияв. Гьеб релълъун букIанила гьезухъе лъица букIаниги гьединаб информация кьун букIиналда. Рокъоса полицялъул бутIаялдейин вачун арав гьев кив вугевали лъачIила жидеда.

Къаси Ибрагьимовасул инсуца шагьаралъул жанисел ишизул бутIаялда гIарза хъван буго чи тIагIун вукIиналда хурхун. Кире кIалъаниги гьев гьенив гьечIилан лъазабулеб букIанила жидеда, амма 28 къоялъ Сабир шагьаралъул заманалъул туснахъалда вукIин лъанила.

НизамцIунулез лъазабухъе, Ибрагьимов гьениве щвезавун вуго цIех-рех гьабизе ва сияхI босиялъе. Гьеб цIех-рех тIобитIулаго гьенив хIукуматалъул адвокатас гIахьаллъиги гьабун бугила, амма жидеца гьеб параялде адвокат валагьун вугонигийин лъазабулеб буго ГIайна Ибрагьимовалъ.

Ибрагьимовасул гIага-божараз Сабирил ихтиярал цIунизе ккурав адвокат ГIабдулла Гъазиевасул рагIабазда рекъон, жакъа къоялъги гьесда жеги жинца ихтиярал цIунулев вихьун гьечIо.

Гъазиевас «Эркенлъи» радиоялъе кьурал баяназда рекъон, гьесда щиб гIилла батунги вихьизе толев гьечIо Ибрагьимов. Гьедиго, низам цIунулез къанун хвехабиялъул хIужабазда хурхун ЦIех-рехалъул идараялде гIарза кьунила жинцайин лъазабулеб буго адвокатас.

Гъазиев ГIабдулла: « Хасавюрт шагьаралъул цIех-рехалъул идараялъул нухмалъулесул цIаралда гIарза кьун буго дица. Ибрагьимов кив вугевали лъаларого вугеб мехалъ дида гьев кивго гьечIилан лъазабуна. Шагьаралъул прокурорасда лъалеб букIана дица Ибрагьимовасул ихтиярал цIунулел рукIин.

Дир щаклъи букIана гьев Дагъистан тун къватIивехун ватилин, амма 28 къоялъ гьев заманалъул тунахъалда вукIин лъана. Гьесухъа цIех-рех босулаго хIукуматалъ тарав адвокат вукIун вуго, амма гьеб къануналда рекъараб гьечIо. ХIукуматалъ адвокат тола ккурасул адвокат гьечIонани ва гьев кквезе рес гьечIони.

Гьезда лъалеб букIана дица гьеб иш тIаде босун букIин ва дида лъазе гьабизе кколаан, гьеб цIех-рех бугеб мех. Гьеб ккола битIарал федералияб къанун хвезабиялъудл хIужа.

Гьев туснахъалда вихьизе толев гьечIо дида, гьелъие цIех-рех чиясул изну хIажалъулилан. Шагьаралъул прокурорасухъе ун гьеб къанун хвезаби, низамцIунулезул рахъалъ такъсир бугин абидал, гьес квер хьвагIулеб буго.

Кинаб ритIухълъи гьеб. ГьабсагIат дица цIех-рехчиясул изну тIалаб гьабулеб буго Ибрагьимов вихьизе рес щвезе».

Гьединго адвокатас гьел киналго къанун хвезабиялъул хIужабаздасан гIарзаби кьун руго цIех-рехалъул идараялде. Гъазиевас баян гьабухъе, Ибрагьимов вихьизе тунгутIиялъе гIилла батизе бугила гьесие хIал-зулму гьабун букIин.

ГьабсагIат Ибрагьимовасде г1айиб г1унт1изабун гьеч1о, амма изну гьечIого яргъидгIуцIцIаразулгун бухьен букIиналда хурхун г1унт1изабизе батизе рес бугила.

Ибрагьимовасул хъизамалъул рагIабазда рекъон, гьел гьелдаса цереги жанисел ишазул бутIаялде рачун рукIун руго, гьеб мехалъ гьезул цIарал сияхIалде росун рукIун руго.

XS
SM
MD
LG