МагъчIваялъе рес

«ФСИН Pismo»-туснахъазде СМС


Россиялъул тIамихI тIубазабиялда сверун федералияб хъулухъалъ риччан руго смартфоназе тIадеги хъулухъ. Гьез рес кьола туснахъазда жанир тIамун ругезе кагътал, суратал ва хIатта кванил-нигIаматал ритIизе. Туснахъалъул хIалтIухъабаз абулеб буго дунялалда тIокIаб кибниги гьечIин гьединаб хъулухъин.

Россиялъул туснахъалда нужер гIагарав яги нужее вокьулев чи вугони ва гьесул хIал цIехезе яги сурат битIизе нужее бокьун бугони гьанже буго гьединаб рес.

Россиялъул тIамихI тIубазабиялда сверун федералияб хъулухъалъ гьаб моцIалда къватIибе биччан руго смартфоназе тIадеги хъулухъ. Гьездасан рес буго туснахъазда тIамун ругезде лъазаби, кагъат хъвазе яги сурат битIизе.
Туснахъазул цензураялъ хал гьабун хадуб, кагътидеги босун, лъабго коялъул болжалалда жаниб кьолеб буго гьеб жанир тIамуразухъе.

Москваялъул №5 цIех-рехалъул изоляторалъул хIалтIухъан Александр Полькиница абун буго РИА-Новости агентлъиялъе дунялалда тIокIаб кибниги гьединаб хъулухъ гьечIилан. ТIамчил цо гьумералда хъвараб яги 1000-гIан ишара бугеб кагъат яги цо сурат кьолеб буго жанив тIамурасухъе цо долларалъухъ.

Гьеб хъулухъалде цIар буго «ФСИН Pismo». Гьеб хIалтIула Android смартфоназда. Гьанжеялде гьенисан битIун буго 180.000 лъазаби.

ФСИН Pismoялъул буго россиялъул почалъулалда релъараб логотип. ТIоцебе гьелъул хIалбихьи гьабулеб букIана Санкт-Петербургалъул «Кресты» абулеб туснахъалдаги Москваялъул «Водник» абулеб цIех-рехалъул изоляторалдаги.
КIватIичIого гьеб хъулухъ хIалтIизе буго улкаялда ругел киналго туснахъазда.

Гьединаб пикру бижун буго 2008 соналдаго. Гьеб мехалда кагътал рачIунел рукIун руго компьюторалде. Полькиница бицана, гьеб мехалда жидеда бихьанин кагътазул 30 процент телефоназдасан рачIунел рукIин ва гьеб пикруги гьеб мехалда бижун букIанин.

"ФСИН Pismo" абулеб хъулухъалъул кумекалда жанир тIамуразде кагъат хъвазе гурониги гьезие кванил-нигIматал росун ритIизеги бегьулеб буго.

http://fsin-zakaz.ru/Order-Client/main.html#step1

Том Балфморт
XS
SM
MD
LG