МагъчIваялъе рес

Россиялъул Почта: балъгояб видеоялъ гьабураб ахlи-хlур (видео)


Россиялъул почта хIалтIулеб куц бихьизабулеб Новосибирскалда балъго бахъараб ахирисеб видеоялъ интернет гIатIилъи хехго кверде босанин абизе бегьула. YouTube сайталда лъураб гьеб видеоялъухъ кIиго къоялда жаниб валагьун вуго 46 азарго чи.

Щибха бихьулеб бугеб YouTube сайталда лъураб гьеб видеоялда? Вокзалалда чIараб цо поездалъун нуцIихъан бахъулеб буго дандбитIун чIараб поездалъул вагоналда жаниса гIадамаз цоцае битIараб къайи лъурал къалал тIалабаго гьабичIого вагоналдаса гъоркье ралеб куц.

https://www.youtube.com/watch?v=wOe3eloICT4

Гьезда жаниб нагагь бекулеб жо лъун букIарабани, биччулеб бугин гьелъул жавабги лъицаго кьезе букIинчIеблъиян бицана нижее гьеб видео бихьарай Юсупова Алжанатица. Гьей кIиго соналъ хIалтIулей йикIана Гъизилюрт шагьаралъул почтаялъул бутIаялда ва гьелъ абулеб буго аслияб къагIидаялда гьедин битIараб къайиялъе зарал-зиян кколин ва жаниб букIараб билулин нухдасанин. Почтаялъул бутIаялде щваралдаса гьел къалиязе щибниги лъугьине рес гьечIин бицана Алжанатица, щайгурелъул гьел къалиял нагагь рагьарав чи бигьаго тIатинавизе кIолев вукIунин.

Юсупова Алжанат: «Почтаязул бутIаязда гьел къалиял рагьизе кинго рес гьечIо. Гуро, рес буго, амма гьеб рагьарав чи бигьаго тIатинавизе кIола».

Алжанатица бицухъе, почтаялъул бутIаялда цIи бачIараб къайи хъвалев чияс ай операторас щибаб кагъаталъул щибаб къалиялъул кинаб цIуни-къаялда гьеб жидехъе щварабали хал гьабизе ккола. Гьеб бихъун батани, гьедин хъвала, бичIчIун яги турун батани-гьедин хъвала. Хъвазе кколеб буго къалиялъул бакIлъиги. Гьелда цадахъ кьолел кагътазда бихьизабун букIана къали битIулев чияс гьелда жаниб лъураб къайиялъул бакIлъи кигIан бугебали. Почтаялъул бутIаялде щварабго гьелъул бакIлъи батIияб батани, гьелда жаниб букIараб жо нахъе босун букIин бихьулин ва гьеб босизе чи вачIараб мехалда гьеб почалдаго рагьулин гьеб хIужаялда сверун хасаб актги гьабулин бицана Алжанатица. Амма киб ва лъица къалиялда жаниб букIараб жо нахъе босарабали жакъасеб Россиялда лъазе кIоларин абуна гьелъ.

Юсупова Алжанат: «Почтаялде хIалтIизе ячIараб мехалда бищунго дун гIажаиблъизабураб жолъун ккана щибаб кагътида яги къалиялда сверун гьабизе кколеб хIалтIи. Гьеб къабул гьабизе ккола, гьелъул щибалъул хъвай-хъвагIай гьабизе ккола компьютералда, бакIалдаго толеб бугони-бикь-бикьун рекъезабизе ккола, дагьабги рикIкIаде битIулеб бугони, къачIан битIизе ккола».

БитIулеб къайиялъе нухдасан щиб кколебали бихьизабулеб буго нижеца тIадехун рехсараб видеоялдаги гьелда хадурго рагьун рачIунел гIемерал цогидал видеояздаги.


YouTube сайталда кьураб видеоялда бан Почта России идараялъ лъазабуна жидеца лъазабизе бугин гьеб видео бахъараб къоги, поезд унеб букIараб бакIалги, гьелъул номерги ва цогидабги, щайгурелъул Почта России идараялъул логотип гьеб вагоналда гьечIин.

http://izvestia.ru/news/498377

Рехсараб идараялъ лъазабулеб буго гьеб къайи почтаялдасан битIараб букIанищалигицин лъазабизе кколин жидецайин.

Новосибирскаялда бугеб маххул нухазул станция Россиялдаго бищун кIудиязул цояб буго. Гьелъул цо аслияб минаялъ кколеб буго 30 азарго квадратияб километр ва гьеб кколеб буго Транссибиралъул магистралалда бугеб кIвар кIудияб станция.

Диана Кюка ва Павел Буторин
XS
SM
MD
LG