«Россиялъул спортсменаз цIигьабулеб буго жидерго бергьенлъабазул сияхI». Гьединан байбхьулеб буго киналниги спортивиял ва цогидалги информ.алатаз жидерго цIиял харбазул баян. РечIчIухъабаз, лъетIахъабаз, гимнастаз, боксераз, гугарухъабаз ва гьел гурел цогидазги жиб-жиб къоялъ гIадин меседил медалазул бачIин бакIарана кIудияб спорталъул вакилзабаз Казаналда тIобитIараб универсиадаялда.
Казаналда тIоритIулел студентазул хIаязда гIахьалъи гьабулеб буго 663 Россиялъул спортсменас. Гьединаб кIудияб къадар спортсменазул жеги букIун гьечIин трихаялдаян абулеб буго , универсиадаялда гIахьаллъулел Россиялъул делегациялъул нухмалъулев Сейранов Сергейица.
Хасго лъикIал хIасилал гьенир рихьизаруна Дагъистаналъул спортсменаз. БатIи-батIияб пачалихъалъе церерахъунелги малъун кинавниги къого дагъистаналъул спортсменас гIахьаллъи гьабун буго гьениб ТIоцере дагъистаниял рохизаруна боксалъул церехъабаз. ичIабилеб июлалда финалияб дандчIваялда Армениялдаса спортсменасда тIад ракIчараб бергьенлъиги босун 64 кг гьоркьохъеб цIайиялда меседил медаль босана дагъистанияв Бутаев Ражабица. Гьединго кIиабилеб меседил медаль щвана бакIаб цIайиялда цевевахъарав Гъизилюрт шагьаралдаса ГIумаров МухIамадица.
Амма бищунго лъикIал хIасилал дагъистанияз рихьизаруна эркенаб гугариялда жанир. Универсиадаялда гIахьалъи гьабурал щуго спортсменасул ункъоясе щвана меседиль медаль. Гьел ккола Гъаякент мухъалдаса Исрапилов Нариман, Хасавюрталдаса КъурбангIалиев МухIамад ва Гойгереев Бекхан, гьединго 96 кг цIайиялда цевевахъунев Лондоналда тIоритIарал Олимпиязул хIаязул гIахьалчи ХIадисов ГIабдусалам. ХIамид ХIамидовасул цIаралда бугеб спортшколалъул вакил КIудиямухIамадов Шамилие щун буго гIарцул медаль.
ГIолохъабазул щивас хIакъикъаталдаги рази гьарунин универсиадалдаян бицан «Эркенлъи» радиоялъе машгьрав гугарухъан Сажид Сажидовас Гьанже гьев ккола Дагъистаналъул тIасабищараб командаялъул бетIерав тренер.
Эркенаб гугариялъул халкъазда гьоркьосел турнирал тIоритIулаго гIемер загьирлъулел хIужаби ккола къецазул диванчагIаз Дагъистаналъул спортсменасе шолеб бергьенлъиялдаса гьев махIрум гьавун хIила-макраби гьари. Казаналда тIобитIараб Универсиада дагъистаниязе рокъоб тIобитIараб гIадаб турнир кколелъул гьаб нухалъ дагъистаниязухъа бергьенлъи бахъиялъул хIужабазда жаниб хиса-басиго загьирлъанищан гьикъана нижеца Сажид Сажидовасда. Гьел хиса-басиял загьирлъанин эркенаб гугариялда жанир ругел къагIидаби хисизарураб мехалдагоян абуна Дагъистаналъул тIасабищараб командаялъул тренерас. Гьанже спорталдасацин рикIкIадав чиясе расги захIмалъуларин гьел къагIидаби ричIчIизе. Къецазда диванчагIаз гьарулел хIилла-макруялда бан жиндирго гьадинаб пикру буго гьесул:
Сажид Сажидов: «Спортивиял къецазда диванчIагIаз гьарулел хIилла макрабазул рахъкколаро дицаги. Амма дица кидаго рикIкIуна дандиясда тIад бергьенлъи босизе дур рес бугони дуе квал-квал гьабун лъихъаниги бажаруларин. Дандиясда тIад дур бугеб къуват, дур бажари бетIералъгIан тIокIаб бугони дуда кIола гьесдаса бергьине, кIолеб гьечIони мунго къеялъе гIилла дуца балагьизе ккола дудаго жаниб».
Казаналда тIоритIулел универсиадаялъул хIаял рагIалде рахъуна июлалъул анцIила анкьабилеб къоялъ. Медалазул бачIиналъул рахъалъ сияхIалъул тIоцебесеб бакIалда буго Россия. Талат къоялде дандеккун ругел хIасилазда рекъон Россиялъул тIаса бищараб командаялъе щун буго 127 меседил, 67 гIарцул ва 57 мазгарул, кинабниги 251 медаль.
Гойгереев Бекхан финалалда речlчlулев вукlана Ираналдаса атлетгун
