Россиялъул Федерациялъул 76 субъекталъул бюджетазде хIукуматалъ битIулеб буго Украиналдаса лъутизе ккаразе кумек гьабиялъул мурадалда гIаммаб къагIидаялда нусго гIанаб миллион гъурущ.
Щималияб Кавказалъул федералияб округалъул республикабазда гъорлъ бищунго кIудияб гIарцил къадар кьолеб буго Ставрополь регионалъе. Гьелдаго цадахъ Гъабардагун Балкарияги Гъалгъазул республикаги хIукуматалъул буюриялда рехсолелцин гьечIо. Щаяли гьанжеги баянлъизабулеб гьечIо. КIиябго республикаялда Украиналдаса лъутизе ккаразул руго, тIоцебеселда 200 чи, кIиабилелда – 60.
Баянлъи гьечIо гьединго 150 украиналъулав жидехъ бугеб Чачан республикаялъе 18 азарго гъурущ гурони биччалеб гьечIолъиялда банги.
250 «гьобол» жиндихъ вугеб Дагъистаналъе бихьизабун буго 648 000 гъурущ. Округалъул хутIарал республикабазе, ай, Гъарачайгун Черкессиялъе ва Шималияб Осетиялъе бихьизубун буго 837 000 ва 945 000 гъурущ. Гьел республикабазда лъутизе ккаразул рагIула 200 ва 800 чи.
Краснодар регионалъе биччалеб буго 4 миллионалде гIунтIун гъурущ, гьенив вуго 20 азарго гIанав чи. Ростов регион – 7 миллионгун 600 азарго гъурущ 53 азарго гIанав чиясе.
Россиялъул цогидал регионал рехсани, бищунго гIемер гIарац кьолеб буго Мокваялъеги Калуга регионалъеги – жиб-жибалъе анцIго миллионалде гIунтIун гъурущ. Москваялда рагIула 4 500 Украиналдаса лъутизе карав.
Сордо-къоялда жаниб щибав чиясе бихьизабун рагIула 100 гъурущ.
Гьанже «Интерфакс агентлъиялъ лъазабулеб буго, Украиналдаса лъутизе ккаразул къадар ахирисел къоязда хисулеб бугин, Минскалда гьабураб кьвагьдей чIезабиялъул къотIи-къаялде балагьун, жидерго бакIазде нахъ руссунел гIадамал гIемерлъулел рукIиналда банин. Аслияб къагIидаялда нахъ руссунел рагIула Ростовалъул регионалдаса.
Гьелдаго цадахъ Украиналъул машрикъалъул рахъалдаса Россиялъул рахъалде рачIунезул къадарги гIодобе кколеб рагIула. Гьелъул хIакъалъулъ Миграциялъул хъулухъалъул идарабазда базабун бицунеб буго инфомалатаз.
