Дагъистаналда «Русгидроялъул» бетIерасул рокъоб ярагъ батун буго

«РусГидро» хъулухъалъул Дагъистаналда вугев нухмалъулев Тимур ХIамзатовасул рокъоб низам цIунулез тIатинабун буго яргъил нахърател – Калашниковасул кIиго автоматги, «Сайга» абулеб карабинги, анлъго таманчаги, цогидабги. Щиб гIиллаялъе гIоло ХIамзатовасул рокъоб чIухь барабали баян гьабулеб гьечIо. Амма тIибитIизабун буго гьелда тIасан «РусГидроялъул» пресс-хъулухъалъ гьабураб лъазаби. Республикаялда ахIвал-хIал цIакъ хIалуцун бугин, дагьалъ цевегIан чIван вукIанин жидер хIалтIухъанги, гьедин Тимур ХIамзатовасул минаги хъаравуллъиялда гъоркь бугин абулеб буго гьеб лъазабиялда. Гьеб ярагъ рагIула ХIамазтовасул мина цIунулеб «Кристалл» абураб хъаравуллъиялъул гIуцIиялъул.

Тимур ХIамзатовасул эмен ккола Дагъистаналъул жамгIияб палатаялда вугев нухмалъулев ХIамзат ХIамзатов.

***

«Дагъистаналъ улка тун къватIибе битIулеб цого цо «продукт» ккола терроризм. Гьеб нилъеца гIезабула школазда, тIадегIанал цIалул идарабазда, росалъ», - гьедин абуна терроризмалда данде къеркьолеб комиссиялъул данделъиялда Дагъистаналъул нухмалъулев Рамазан ГIабдулатIиповас. Гьедин исана Шамалде ислам-дин цIуниялъе гIоло рагъизе ун ругин Бабаюрт, Болъихъ, Буйнахъск, Гъуниб, Дербент, Гъизилюрт, Гъизляр, Лаваши, Унсоколо, Хасавюрт, ЦIумада, ЦIунтIа мухъаздаса гIолохъабийин бицана ГIабдулатIиповас. Дагъистаналдаса рагъухъаби гIахьаллъулел ругила Шамалда ГIисал диналъул чагIазе гIакъуба кьеялъулъги цогидал рогьоял ишазулъги. Гьелъие ахир лъезе кколила.

***

МахIачхъалаялда байбихьун буго гIадамазе рилълъанхъизе квалквал гьабулел шлагбаумал нахъе рахъизе. Анкьго бакIалда ругин гьел лъунилан бицана журналистазе прокуратураялъул хIалтIухъанас.

***

МахIачхъала махIрумлъана исана хаслихъе «Кавказалъул хIаял» тIоритIиялъе букIараб ресалдаса. Гьедин гьел я Грозныялда, яги Пятигорскалда тIоритIизе руго. МахIачхъалаялда гьелъие шартIал гIуцIун ратун гьечIо. Гьедин абуна журналистазда Шималияб Кавказалда бугеб Россиялъул президентасул вакиллъиялъул чияс.