МагъчIваялъе рес

Сайгидил меседил медаль


Сиднеялда тIоритIарал Олимпиялъул хIаязда меседил медаль щварав дагъистанияв Сайгид МуртазагIалиевас инкар гьабуна гьал къоязда гьеб шапакъаталдаса. Гьелъие гIиллалъун гьес баян гьабуна Халкъазда гьоркьосеб олимпиялъул комитеталъ эркенаб гугари гьел хIаязул программаялда гьоркьоса рехизе хIукму гьаби. Кинаб пикру бугеб гьелда тIасан Дагъистаналъул цогидал спортсменазул?

Гьеб мисалалдалъун жинде бокьун бугин халкъазда гьоркьосеб Олимипиялъул комитеталъул нухмалъулев Жак Роггецаги гьесул сверухълъиялъги гьабулеб хIукму мекъаб букIиналде гьел рекIеда ратизаризеян баян гьабуна жиндирго хIукму информ алатазе Олимпиялъул хIаязул чемпионас.

Сиденялда тIоритIарал олимпиялъул хIаязда цеве гьев вахъун вукIана Европаялъул ва дунялалъул чемпионлъунги. Кинин дуда кIвараб гьеб бищунго хирияб ва кIвар бугеб шапакъаталдаса махIрумлъиязеян абураб суалалъе жаваб кьолагоги Сайгид МуртазагIалиевас абулеб буго битIараб бугин гьеб, Олимпиадаялъул меседил медаль гьеб жиндие кIудияб шапакъат кколин, гьеб щвезелъун 15 соналъул захIматаб нух нахъа танин дица.

Жиндеги бигьаго букIинчIин гьеб хIукму гьабизе, амма ургъарав мехалъ жинца хIукму гьабунин Валентин Йордановасул мисал такрар гьабизеян.

Халкъазда гьоркьосеб олимпиялъул комитеталъ эркенаб гугари хIаязда гьоркьоса батIа гьабизе бугилан рагIараб мехалъ гьеб хIукмуялда рази гьечIолъи загьир гьабун меседил медаль тIоцебе нахъе кьуна Болгаразул республикаялъул эрккенаб гугариялъул рахъалъ федерациялъул нухмалъулев, олимпиялъул хIаязул чемпион Йорданов Валентиницаги.

Хас гьабун жинцаго гьабураб хIукмуялда тIасан гара-чIвари гьабизе нижер рес ккечIо Сайгид МуртазагIалиевасулгун бухьен гьабизе.

ХIакъикъаталдаги бигьагоги букIун батиларин Сайгидие гIемераб гIетги тIун чанго соналъ гьабураб хIадурлъиялъул хIасилалда щвараб, спорталда жаниб бищун кIудияблъун кколеб шапакъаталдаса ватIалъизе, амма эркенаб гугари гьеб тIолалго дагъистаниязул рекIелъ рукъккураб спорталъулаб тайпа букIинги хIисабалде босун, гIадалаб хIукму гьабизе ургъулел МОКалъул чагIи рекIеда ратизаризелъун жиндасаго бажарараб хIалтIи гьабулеб бугин гьес ва узухъда нижецаги киназго ракIразиго рахъккунин гьес бихьизабураб мисалалъулилан бицана Эркенлъи радиоялъе зркенаб гугариялъул рахъалъ Дагъистаналъул тIасабищараб командаялъул бетIерав теренер Сажидов Сажидицаги.

2004 соналъ Грециялъул тахшагьар Афиналда тIоритIарал хIаязда олимпиадаялъул мазгарул медаль щун букIана Сажидие.

Эркенаб гугари олимпиялъул хIаязда гьоркьосан нахъе гьабизе тIалаб гьаби цо хасаб пачалихъалъул мурад кколарищан абураб суал кьуна Эркенлъи радиоялъ Сажид Сажидовасе. Щайгурелъул халкъалда гьаркьоб цебго тIибитIараб хабар буго Цолъарал штатазул республикаялъ цебего тIад квер лъун бугин Олимпиялъул хIаязул тIолабго программаялдаян.

Гьедин гимнастика, тIадагьаб атлетика ва лъедеялъул рахъалъ бищунго цIикIкIун меседил медаль олимпиялъул хIаязда шола гьезул сопртсменазе. Абулеб букIана Олимпиялъул хIаязда гьоркьоб цохIо эркенаб гугари кколин гьезда конкуренция гьаун бажарулареб спорталъул тайпайилан ва гьединлъидал гIемерисезул пикру буго эркенаб гугари Олимиялъул хIаязда гьоркьоса нахъе рехи Цолъарал штатаз гьабулеб политикаялъул хIасил батизеги бегьулилан.

Гьелда тIасан жиндирго пикру загьир гьабулаго Сажидовасни абуна жинда кIоларин чIванкъотIун кинаб хIукматалъул гьединаб мурад бугебали абизе, жибго абулеб букIанин регби, лъадал поло гIадал цо гьедигIанго жидер машгьурлъи щвечIел, олимпиялъул программаялда гьоркьоса нахъе гьаризе хIисабалде росарал цо-цо спортивиял тайпабазда гьоркьоб рехсон бугин щаялиго эркенаб гугариги, амма гьединал гIиси-бикъинал спортивиял тайпабазда гьоркьоб рехсезе гIадаб спорт кколарин эркенаб гугари.

Сажидца рикIкIунеб буго FILA абураб эркенаб гугариялъул рахъалъ халкъазда гьоркьосеб гIуцIиялъул нухмалъулев Рафаэль Мартинетица гьабулеб хIалтIуда ракIги рекъечIого гьабураб хIукму батизе бугин гьебилан:

Сажид Сажидов: «Гьединаб хIукмуялде рачIине гIедегIун ругин ккола дида МОКалъул вакилзаби. Щайгурелъул эркенаб гугари гьеб цохIо спорталъул тайпа гуребги гьеб ккола кIудияб хъизам, кIудияб вацлъи.

Жакъа гIун бачIунеб гIелалъе кIудияб асар гьабулеб спорт. FILAялъул президент Рафаэль Мартинеттида ракIрекъечIого гьабураб хIукму батилилан ккола дида гьеб. Гьанже гьеб гIуцIиялъул нухмалъулевги хисун вугелъул, кинабго хисизе батила».

Кин букIаниги жиндир хьул бугин чIванкъотIараб хIукмуги жеги къабул гьабун геьчIелъул кингоги халкъазда гьоркьосеб Олимпиялъул комитеталъ жиндирго хIукму хисизе гьабилилан. Сажидица бицунелда рекъон гьединаб хIукму гьеб гIуцIиялъ къотIизе рагIула исана сентябралда.

Халкъазда гьоркьосеб гугариялъул гIуцIиялъул гIемерал гIунгутIаби ругин, нужеда гугариялъухъ балагьаразда ричIчIуларел, жинда гIемер лъикI лъалин гьел. Санайил гьез хисулел гугариялъул къагIидаби сабаблъун чанги цевевахъиназда къунин живилан бицана Эркенлъи радиоялъе машгьурав гугарухъан КъурамухIамад КъурамухIамадовасги:

КъурамухIамад КъурамухIамадов: «Гъоркьисала букIараб Олимпиада лъугIун хадур киназулго хьул букIана FILAялъул хIалтIуда жанир хиса-басиял ккелел ратилилан. Гугариялъухъ балагьарал чагIазда бичIчIуларо гьеб кинабго, амма мекъал жал гIемерал рукIана гьезул хIалтIулъ».

ЭР: Гьедин батани дур пикруялда гугари олимпиялъул хIаязда гьоркьоса нахъе гьабизе хIукму гьаби FILAялъулищха гIайиб, яги батIияб гIилла кинаб бугилан дуда кколеб?

Къ.КъурамухIамадов: «ХIисаб гьабураб мехалъ Мартинеттицаги хIалтIи гьабулеб гьечIилан абуни гьеб мекъаб пикруги букIина, гьабулеб гьес жиндаса бажарарабщинаб. БатIи-батIиял турниразде Грозныялде, Москваялде, гьединго ГIали ГIалиевасул цIаралда бугеб турниралде МахIачхъалялдеги вачIана гьев.

Амма нилъеда лъалареб жоги гIемераб бугелъул спорталъул политикаялда жанир, хIатта криминалияб хасияталъул гIиллабиги ратизе бегьула гъора. Гьеб гуребги гугариялда жанир санайил гьез хисизарулел къагIидаби рихьидал гIемерал спортсменазул ракIбуссунеб буго спорталдаса.

Щаяли лъалиш? Жиндаса къурав чиясе бергьенлъи кьолеб бихьидал гьеб жо унго-унгояб гугари гурилан ракIбакъван нахъе уна чанги спортсмен. Гьеб кинабго бихьидал халкъалъулги ракIбуссуна гьелдаса. Гьелъул хIасилалда гугариялъухъ балагьулев чиги дагьлъула. Гьел гурелги гIемерал руго жеги гIунгутIаби».
XS
SM
MD
LG