МагъчIваялъе рес

Шамилхъалаялда хвезегIан вухун вуго гIолохъанчи


Шамат къоялъ ГIашилтIа вукъана цебесеб сордоялъ щалали лъаларев анкьго чияс хвезегIан вуханав гIолохъанчи.

Щалали лъаларел гьурмазда чIегIераб хамил маскаби хураз 15-марталъул сардилъ Унсоколо мухъалъул Шамилхъалаялда гъоркьчIелги гьабун, нусал чIван, малаца дургIун, рухI бахъиялде ккезавун ватарав ГIашилтIаса ХIайбулаев ХIайбула. Мадугьалзабаз азарханалде автомашиналда вачунаго гьев нухда хун вуго.
Гьесие гъоркьчIел гьабун рукIарал лъутун унел рихьарал мадугьалзабаз бицухъе, анкьгоял рукIун руго гьезул.
ХIайбула жиндирго инсухъ гьоболлъухъ вукIун вуго къасе сагIат 10 тIубазегIан, гьениса гьев тIадвуссун вачIиналъухъ хал ккун рукIарал куц бугин гьев вухаралин абулеб буго полициялъулаз. Гьев вухизе яги чIвазе рукIарал гIиллабазул бицунеб гьечIо.
ХIайбулагьие букIана 30 сон, санаде рахинчIел лъабго гIисинал лъималги лъадиги. Унсоколо мухъалъул полициялъул бутIаялда гьеб лъугьа-бахъиналда хурхун Эркенлъи Радиоялъе щибго баян кьечIо, абуна гIицIго цIех-рех гьабулеб бугилан, мухIканал баянал щвечIого щибго абизе кIоларилан.

Гьелдаго релъараб хIужа ккун букIана Шамилхъалаялдаса Унсоколове унев вукIарав ХарачIиса СагIидидов МухIамадхIабибиеги. МаскIаби хураз дандеги рачIун машинаялдаса гъоркьеги вахъинавун вухун вукIана гьв январалъул авалалда. МухIамадхIабиб жеги захIматго реанимациялда вуго. Полициялъ гьеб такъсирги рагьун гьечIо жеги.

Комментариял (2)

Гьаб форум къан буго
XS
SM
MD
LG