МагъчIваялъе рес

ГIайиб гьечIилан цоял, балагьилилан цогидал


Балахьуни росу

Унсоколо мухъалъул полициялъул идараялде вачIарав Балахьуни росулъа 11 чиясде щаклъи букIана батIи-батIияб заманалда гьез изну гьечIого яргъид гIуцIаразе кумек гьабулеб букIиналда бан. Гьезулгун гара-чIвари гьабун хадуб гьел рокъо-рокъореги риччана. Гьадин лъазабуна Дагъистаналъул жанисел ишазул министерлъиялъул пресс-хъулухъалъ.

Унсоколо мухъалъул жанисел ишазул идараялдасан нижехъе щварал баяназда рекъон, гьел чагIазде шаклъи рагIула гьез изну гьечIого яргъид гIуцIаразе кванидалъун ва цогидаб хIажаталдалъун гIиси-бикъинаб кумек гьабулеб букIиналда.

Балахьуни росдал бегавул Якъубов МухIамадрасулица бицухъе, къуваталъулал идарабазул хIалтIухъабаз щаклъи ккаразда лъазабун букIун рагIула нужеего бокьун полициялде рачIинчIони жидеца нужер рукъзабахъ чIухь базе бугин. Гьединлъидал, цохIо Балахьуниса гуребги, Майданскиялдасаги цо-цо чи жидедаго гIайиб гьечIолъи чIезабизелъун ун рукIун руго жанисел ишазул идараялдеги. Росдал бегавулас бицухъе, къуваталъулал идарабазул хIалтIухъабаз абулеб рагIула росулъа цо-цо чагIи цо кинабалиго сияхIалде росун ругин, изну гьечIого яргъид гIуцIаразе кумек гьабулел чагIи хIисабалда.

Якъубов МухIамадрасул: «Гьезда гьоркьоса цонигияс щибго тIаде босулеб гьечIо, кинха босилеб гьезда хадуб щибго гьечIеб мехалда. Цо-цо чи вукIун ватизеги бегьула кумек гьабулел, амма гIемерисел руго гIайиб гьечIел чагIи. Гьезде гIунтIизабулеб гIайибги гьечIо. Гьезда абулеб жо буго жидеца нужер доба чIухь базе бугин, гьедин чIухь банги букIана 17 минаялъуб. Гьедин арал чагIиги рукIана гIемерисел полициялде жидеда хадуб щибго гьечIолъи бихьизабизе».

Полициялъулазул сияхIалда ругелин абулезда цадахъ дунгоги ун вукIана Унсоколо мухъалъул жанисел ишазул идараялдеян лъазабуна гьеб мухъалъул мажлисалъул депутат ХIамзатов АхIмадица. Гьел изну гьечIого яргъид гIуцIаразулгун бухьен бугел чагIиги гуро. Амма гьединал чагIи росулъ ратани нижеца, ай росдал жамагIаталъ гьел рахчизеги гьечIин лъазабуна депутатас.

Гьеб масъала мухIкан гьабиялъул мурадалда бухьен ккуна Унсоколо мухъалъул жанисел ишазул идараялъул нухмалъулев ХIажи РахIматулаевасулгун. Жидеда гIайиб гьечIолъи чIезабизе полициялде рачIун рукIарал жиде-жидер рокъор ругин абун гуреб, батIияб баян гьесухъан щвечIо.

XS
SM
MD
LG