МагъчIваялъе рес

Мисралда тун вуго заманалъулав бетΙер


Мисралъул Конституциялъулаб диваналъул бетΙер ГΙадли Мансурица гьа балеб буго улкаялъул заманалъулав президент хΙисабалда.

Мисралъул Конституциялъулаб диваналъул бетΙер ГΙадли Мансурица гьа бана улкаялъул заманалъулав президент хΙисабалда. Гьеб ккола цебесеб нухалда Хосни Мубарак тΙаса рехарал рагъулаз цΙидаса нухмалъиялде данде протест тΙобитΙулезе кумек гьабиялъул хΙасил.

Хамис къоялда Мисралъул заманалъулав президент хΙисабалда гьа бана улкаялъул Конституциялъулаб диваналъул бетΙер ГΙадли Мансурица. Гьа баялъул церемониялда гьес беццана армия ва президент МохΙамад Мурси тΙаса рехараб протесталъул гΙахьалчагΙи. Мансурица лъазабуна, мисралъулаз цо чиясе бетΙер къулизабиялъул бакΙалда, цΙунизе кколин 20ΙΙ соналъул революциялъул хазинабийин.

ГΙадли Мансур: «Революциялъул хазинаби цΙунялъул гарантиялъ нилъер хьулал хутΙизарулел руго, гьеб революциялъул идеяби гΙумруялде рахъине рукΙиналъул. Гьелъул аслияб мурадги ккола лидерасе бетΙер къулун чΙун рукΙиналдаса инкарги гьабун, бокьа-бокьараб гьабизе бугеб ресазе ахир лъей.»

Гьес гьединго жубана, Мурсил «Бусурбаби-вацал» гΙуцΙиялъул гΙахьалчагΙиги халкъалъул бутΙа кколин ва миллат гΙуцΙизе кумек гьабулеб бугони, гьелдаса жив вохарав вукΙине вугин.

Амма МЕНА абураб мисралъул пачалихъияб информациялъул агентлъиялъ лъазабуна, прокуратураялъ буюри кьунин гьеб гΙуцΙиялъул тΙадегΙанав кΙиго лидер аресталде гъоркье восиялъулин. Гьезде гΙайиб гΙунтΙизабулеб буго демонстрантал чΙваялде жидерго рахъ ккурал гьесизариялъул.

Демократияб къагΙидаялда тΙоцебесеб нухалда вищун вукΙарав президент МохΙамад Мурси тΙаса рехиялда бан Цолъарал миллатазул гΙуцΙиялъул генералияв секретарь Пан Ги Муница ахΙи бана республикаялда гражданияб нухмалъиялъул институтал щула гьариялде. Гьелдаго цадахъ гьес загьир гьабуна гьединго, мисралъул халкъалъул къануниял ва ритΙухъал тΙалабазул рахъ кколеб букΙиналъул пикру.

Цолъарал штатазул президент Барак Обамаца лъазабуна, жиндир администрациялъ мисралъул рагъулал ахΙулел ругин, хехаб къагΙидаялда демократияб къагΙидаялда бищараб нухмалъиялъухъе улкаялъул кверщел буссинабиялдеян. Гьес жубана гьединго, жиндир администрациялъ заманалъ гьоркьоб къотΙизабулеб бугин Мисралъе гьабулеб кумекин.

Британаиялъул премьер-министр Дэвид Кэмероница мисралъул халкъ ахΙана демократиялде нух халат бахъинабиялде.

Евроцолъиялъул къватΙисеб политикаялъул идараялъул бетΙер Кэтрин Эштоницаги киналго рахъал ахΙана нахъ тΙамичΙого демократияб процессалде нахъ руссиналде.

Германиялъул къватΙисел ишазул министр Гидо Вестервеллеца лъазабуна, Мисралда лъугьа-бахъараб букΙанин демократиялъул нухдаса гΙагсаб рахъалде сверараб гΙадаб жойин. Берлиналъ гьелда хадуб кΙудияб кΙваргун ва ургъелгун хал ккун бугин. Гьес рахъал ахΙана зулмуялдаса инкар гьабиялде ва демократияб диалогалда гΙахьаллъиялде.

Россиялъул къватΙисел ишазул министерлъиялъ пресс-секретарь Александр Лукашевичица лъазабуна, Москва кΙудиб кΙваргун балагьун бугин Мисралда загьирлъулеб ахΙва-хΙалалъухъин ва россиялъул туристал ахΙана хΙинкъи бугеб бакΙаздаса дорегΙан чΙун рукΙиналде.

Президент Мурси тΙаса рехи Туркиялъ лъазабуна демократияб гуреб къануназде данде кколареб актлъун.

Сириялъул президент Башар Асадица Мурси хъулухъалдаса махΙрум гьави гΙагсалда къабул гьабуна мисралъулазе щвараб кΙудияб икъбал хΙисбалада.

ГΙарабазул гΙемерисел улкабазги гьелъие лъикΙаб кьумат кьолеб буго, гьез баркана заманалъ президентасул хъулухъалде тΙамурав ГΙадли Мансурида.

(ЭР)
XS
SM
MD
LG