МагъчIваялъе рес

Херасул адаб тараб хlужа


КIиго соналъ цебе Дагъистаналъул Гумбет мухъалда ккараб хIужаялъул хал гьабулеб буго гьабулеб буго республикаялъул прокуратураялъ. Гьеб хурхараб буго полициялъул капитанас кьвагьул алатги чанго гуллаги 80 сон барав чиясул рокъобе рехиялда.

Полициялъул хIалтIухъанасда тIад рагьун буго лъабго статьялда рекъон такъсир гьабиялъул иш.

Рехсараб лъугьа-бахъин ккаралдаса кIигониги сон бан буго. Гумбет мухъалъул жанисел ишазул идараялъухъа кинал ругониги баянал щвечIо нижехъе. Гьел разилъизе гьечIин гьеб хIужаялъул хIакъалъулъ кинал ругониги комментариял кьезецинилан бицана нижеда гьенисаго чияс. Дагъистаналъул прокуратураялъ байбихьун буго гьелда сверухъ цIех-рех. Гьезул баяназда рекъон Гумбет мухъалъул жанисел ишазул идараялдаса полициялъул капитанас Гъоркьаинхоса 80 сон барав пенсионер ГIабдулгъаниев ХIамзатил рокъобе рехун батун буго ярагъги чанго кьвагьул алатги. Хадуб жиндицаго ахIи-хIурги бахъинабун буго гьев чиясул рокъоб ярагъ бахчун бугилан. Кин щибали цIех-рех гьабидал баяналъун буго пуланаб заманалда жаниб гьарурал такъсиразул рахъалъ хIисаб кьолеб мехалъ цIикIкIун хIалтIи гьабунин жинцаян абизе гIололъун ургъунго гьабун букIин полициялъул хIалтIухъанас гьеб такъсир.

Бицен гьабулев полициялъулав кIиго соналъ цеве жидер росулъ участкаялъул полициявлъун хIалтIулев вукIанилан бицана нижее Гъоркьаинхоса СайгидахIмадов ГIабдулатIипца. Гьеб лъугьа-бахъиналъул хIакъалъулъ жиндаго лъалеб жо нижее бицине разилъана гьев.

СайгидахIмадов ГIабдулатIип: ЦIех-рех гьабизеян прокуратураялдеги ахIун вукIун вуго гьев сон. Дида битIараб бицанин лъаларо кинаб къагIидаялъ гьеб ярагъги жоги гьесул рокъобе полициялъулас рехун букIарабали, гьедин бицунеб рагIун гурони. Гьев Рашидбегида (бицен гьабулев полициялъулав) тIасан гIарзаги хъван бугин ХIамзатицаян абулеб буго».

ЭР: Прокуратураялде ахIун хадуб щибилан гьесда абун бугеб?

ГIабдулатIип: «Гьеб битIараб бицани лъаларо»

Гьеб цIех-рехалъул хIасил кинаб ккарабали гьикъизе полициялъулас жинде къор гъурав ГIабдулгъаниев ХIамзатилгун бухьен гьабизе рес щвечIо нижее. Гьев гьабсагIат росулъги рагIуларо.

Гьесие рекIкI гьабурав полициялъул хIалтIухъанасда тIад лъабго статьялда рекъон уголовияб иш рагьун буго: рекIкIаб куцалда хъулухъалдаса пайда боси, изну гьечIого чиясул рокъове жаниве лъугьун гьесие зарал гьаби ва къануналда рекъечIеб куцалъ ярагъ ва кьвагьул алаталдаса пайда боси.

Хъулухъалдаса пайдаги босун такъсир гьабулел полициялъул хIалтIухъабаздехун совет хIукуматалъул заманалда кьварараб бербалагьи букIанин ва гьезие гьабулеб тамихIги къвакIараб букIанилан бицана «Эркенлъи» радиоялъе рехсараб лъугьа-бахъиналда тIасан пикру загьир гьабулаго хIалхьиялда вугев юрист ГIумаров ГIусманица. ГIемерал соназ республикаялъул прокуратураялда хIалтIарав хIалбихьи бугев юрист ккола гьев. ГIусманица рикIкIунеб буго полициялъул хIалтIухъанас такъсир гьабун букIин мухIканго чIезабизе кколин цин гьелдаса хадуб хал гьабизе кколин кинаб тамихI гьесие къотIилебали:

ГIумаров ГIусман: «Жакъа гьединал такъсирал гьабулел низам цIунулел хIалтIухъабазда хадуб кIудияб хъаравуллъи бугин нухмалъиялъул рахъалдасаян абизе нух гьечIо. ХIакъикъаталдаги гьедин буго иш. Амма гIамм гьабун киналго гьединал полициялъул ретIел ретIарал чагIи ругин жакъа хъачагълъудаян батизеги бегьуларо, гьеб гIантаб пикру букIина. Нилъ ругьунлъун руго жакъа низам цIунулезул рахъалдаса кинаб бугониги гъалатI бихьани гьел киналго такъсирчагIи ругилан гьезда мугьру чIвазе. Амма нилъ ралагьизе ккола цогидаб рахъалдасаги. Цогидаб рахъ буго хIужаби, чIванкъотIарал далилал. Гьел далилал гьечIого чиясде такъсирчи вугиланги абизе бегьуларо».

Гумбет мухъалда херав пенсионерасул рокъобе ярагъ рехун батиялъул темаялда тIад руссунаго гьаниб тIаде жубазе ккола херасе рекIкI гьабурав Гумбет мухъалдаса полициялъул капитан гьабсагIат республикаялъул кIудияб хъулухъалда вугев чиясул гIагарав чи кколев рагIулин гьев, гьединлъидал гьеб хIужа къватIибе бахъичIого хутIизе кIвараб хIаракат бахъулеб бугин гьев полициялъуласул гIагарав чиясилан буго бицунеб.

XS
SM
MD
LG