МагъчIваялъе рес

ЕГЭязда видеокамераз хал кквезе буго


Цогояб Пачалихъалъулаб экзамен кьеялда жанир исана раккун руго цо-цо хиса басиял. Гьанже экзамен кьолеб куц бахъизе буго видеокамераялде. Гьединго Дагъистаналъул шагьаразда цIалулел рукIун экзамен кьезе гIололъун росулъе рачIарал цIалдохъабазда хадуб халкквезе буго хасаб коммиссиялъ. Щиб кьезе бегьулеб гьел хиса-басиял гьариялъ?

Цогояб пачалихъалхул экзамен кьеялъул тадбирал видеокамераялде рахъизе рукIиналъул мурад бугин араб соналда гIадинал гьеб тадбиралда сверун загьирлъарал гъалмагъирал такрарлъунгутIиян бичIчIизабуна Россиялъул лъай кьеялъул министр Дмитрий Ливановас. Исана Москваялда улкаялъул батIи-батIиял регионазул нухмалъулелгун букIараб дандчIваялда абуна гьес гьедин. Экзаменал кьолеб бакIазда хIалтIизаризе рагIула президетасул рищиял тIоритIулаго рищиязул участкабазе кьун рукIарал веб камераби.

Цогояб пачалихъалхул экзамен кьолеб бакIалда гьел камеразул кумекалдалъун гъалмагъир гьабиялъул хIужа тIатани, экзамен босулезул ихтияр рагIула гьев цIалдохъанасул хIалтIи хIакъикъияб гуреблъун рикIкIине.

БакI ккун букIаго абила араб 2013 соналъ Дагъистан бищунго машгьурлъана ЕГЭ кьеялъул рахъалъ гьарурал гъалатIазул рахъалъ. Дагъистаналъул Кули мухъалда цогояб пачалихъияб экзаменалъул 20 хIалтIи тIубанго кьезе кIвечIеблъун рикIкIана республикаялъул лъай кьеялъул министерлъиялъ. гIагарал къоязда гьал лъимал ЦIидасан гьеб экзамен кьезе тIамизе ругилан абулеб букIана доб мехалъ. 27 маялда ЕГЭялъул заманалда тIатинабуна 61 гъалмагъир. Гьединго Бабаюрт мухъалъул Татаюрталдаса кIиго цIалдохъанас жидерго хIалтIаби интернеталда лъун ратиялъ, хIалтIабазда тIасан хIуччги цIан, цогидал экзаменаздеги риччазехъин гьечIин гьел.

Гьанже видеокамеразул кумекалдалъун гьединал хIужаби тIатинаризе къасд буго ЕГЭ тIобитIулел чагIазул.

Амма щибниги хIасил гьелъул ккезе гьечIилан рикIкIунеб буго гIемерал соназ Хъумторхъала мухъалд гIурус мацIалъул мугIалмилъун хIалтIарай ГIалимирзаева Зайнабица. Зайнабица бицаралда рекъон гьей хIалтIулей заманаялъго, 2007 соналъ хIалбихьиялъулаб ЕГЭ кьолеб тIоцебесеб соналъго рукIанин гьел видеокамераби жидер дора рекъезарун. Амма гьелъ щибниги жо тIатинабичIин. Гьелъие гьадинаб баянги кьуна гьелъ.

ГIалимирзаева Зайнаб: «ГIицIго ЕГЭялъул заманалда телефонал цадахъ росизе гьукъизе бегьулаха гьез, амма гьелъги пайда кьелилалан абураб жоялда цIакъ кIудияб щаклъи бачIунеб буго. ХIалбихьизе бегьула гьединал нухал ралагьизе, гьале 5-6 сон буго ЕГЭ кьолеб бугелдаса, амма гьелдалъун цIалл иш нахъаса нахъе ун гурони батIияб жо кколеб гьечIо. Бокьарал ресал ралагьулел руго лъималаз ЕГЭ кьолелъул къватIиса кумек щвезе. Гьеб гьукъун бажаричIелъул жеги».

Гьединго исанасеб ЕГЭ кьолелъун хIисабалде босун рагIула мугIрузул мухъазда ругел щколазда ЕГЭ кьезелъун шагьаралдаса рачIарал цIалдхъабазда хадуб хал кколеб хасаб коммиссия тезе. Араб соналъ ЕГЭ кьолеб гIужалъ кIудияб ахIи-хIур гьабуна «ЕГЭ туризм» абураб цIаралда гъокь машгьурлъараб хIужаялъ. МагIарухъ ругел школазда экзамен кьезе бигьаяб букIуниланги абун шагьаралда цIалулел рукIарал, хIатта Москваялда рахъаралцин гIолилал рачIунел рукIана гIумруялда жанив жив цониги нухалъ щун вукIинчIеб эбелалъул яги инсул росулъе. Исана гьединаздехун гьарулел тIалабал дагьал кьваризаризе ракIалда буго лъай кьеялъул министерлъиялда.

Амма гьеб мисалалъулги къисмат букIунин видеокамераби лъезе рукIиналдаго релълъараб букIинилан кколин жиндаян абуна гьелда тIасанги ГIалимирзаева Зайнабица.

ГIалимирзаева Зайнаб: «Жакъа школазда ЕГЭ кьеялъул тадбир тIубанго бахчун буго ришватчилъиялъ. Дунги йикIана щуго-анлъго соналъ цебего гьеб цогояб пачалихъалъул экзамен кьолеб мехалъ хIалтIулей, дида бихьана гьенир гьарулелщинал жалги. Гьеб комиссиялъе гIицIго гьениса щазе бугеб жо ккола къокъаб заманалда жаниб чанта цIараб гIарац бакIари, тIокIаб гьумерхъахIаб жо гьелъ кьезе гьечIо. Узухъда диеги бакьина гьедин букIинчIого букIине, дирги вуго гIолев вас, диеги бакьинаро чанго соналдаса ЕГЭ сабаблъун гьесул бугеб лъаялда рекъон гьевги цIализе ворчIичIого цо кинавалиго гIарац гIемерав угъращ университеталде ворчIизе. Бокьилан гьеб кинабго битIараб мухъде бачIине. Амма жакъа гьеб цIакъ захIматаб масъала буго. Гьеб хисизабун бажарулеб хIал гьечIо жакъа я комиссиялъул, я веб-камеразул кумекалдалъун».
XS
SM
MD
LG