МагъчIваялъе рес

Полициялъулазде полициялъул гьужумал


Анлъабилеб апрелалда Дагъистаналда тIобитIизе буго 24 марталда тIобитIизе ракIалда букIараб митинг. Гьелъие гIиллалъун кколеб буго низам цIунулез МахIачхъалаялъул полициялъул нухмалъулев Раип ГIашикъовасда сверун байбихьарал тадбирал. Гьединго жидергун махщелцоязул кIичIикье ккун вуго полковник СалихI ХIажиевги. Чанго къоялъ цебе гьес Москваялда пресс-конференция кьун букIана Дагъистаналъул жанисел ишазул министерлъиялда ругел гIунгутIабазда тIасан.

Дагъистаналда байбихьун буго жанисел ишазул министерлъиялъул кIуди-кIудиял хIакимзабазде гьужумал гьаризе. Масала, гьел ккола Раип ГIашикъовги СалихI ХIажиевги. Раип ккола МахIачхъалаялъул полициялъул нухмалъулев. Гьал къоязда гьесул рокъоб чIухь бана низам цIунулез. Гьесул хъаравулзабиги рачун, туснахъалъур лъун руго.

Раип ГIашикъовасда сверухъ батIи-батIияб хабар буго бицине лъугьун. Дагъистаналда Рамазан ГIабдулатIиповас цIияб хIукумат гIуцIизе байбихьидал, "Черновик" газеталъ гьабун букIана жанисел ишазул министерлъиялде мустахIикъал гIадамазул сияхI. Гьенив цебесеб кьерде вачIун вукIана ГIашикъов. Гьедин гьев жанисел ишазул министрлъун тIамизе гурилан хIинкъиялъ низам цIунулез ургъунго гьарулел хIаяллъун рихьулел руго гьел Раип ГIашикъовасул рахъккуразда. Масала, адвокат Сапият МухIамадовалда.

МахIамадова Сапият, адвокат
МахIамадова Сапият, адвокат
Сапият МухIамадова: "ГIашикъов ккола министрлъиялдеги цогидаб хъулухъалдеги бигьаго ворчIулев чи. Гьединлъидал лъие бугониги квал квал буго гьесул. Гьединго ГIашикъов гьал гIагарал къоязда УСБ абулеб бутIаялъул нухмалъулевлъун тезе хIадурулев вукIана. Гьенив гьев тезе бокьичIел чагIаз хIадурун руго гьесда хурхун гьересидокументал".

Раип ГIашикъов гьабсагIат, унтун вугин кагъатги босун, хIалтIулев гьечIо. ЦIех-рехчагIаз гьесде гIунтIизабулеб чIванкъотIараб гIайибги гьечIо, амма цо-цо баяназда рекъон, низам цIунулезул щаклъи рагIула гьев цо чIвай-хъвеялда гьоркьор вукIиналда. Амма жидергун махщелцоясдехунгицин низам цIунулез бихьизабулеб бугеб чIванкъотIи гьечIолъиялда гIажаиблъи гьабулеб буго Шамилов МухIамадица. Гьев ккола жанисел ишазул министерлъиялъул хIалтIухъабазул махщалилаб цолъиялъул нухмалъулев.

Шамилов МахIамад, жамгIияв хIаракатчи
Шамилов МахIамад, жамгIияв хIаракатчи
Шамилов МухIамад: "Гьабихъги корохъги бицунеб къорол руччабазул гIадинаб хабарищ букIунеб диванчиясулги, прокурорасулги, цIех-рехалъул комитеталъулги? ГIайибги гIунтIизабун, документалги щула гьарун, квердаги бохдаги маххал ралеб къагIида букIунаха хIукуматалъулги магIна бугел гIадамазулги. ГIахьуч-чагIиян гурони гьезда щибин абилеб? Гьесде гIунтIизабулеб гIайибги гьечIо. Гьесул хъаравулзабилъун рукIарал 11 полициялъулав вукIун рагIула жанив лъун. Гьезул ункъоял рагIула жеги ругеб бакI лъаларого. ГьабсагIаталда ахIун бачIана дихъе гьезул цояв Гъизилюрталда вугилан. Гьевги вугила кьабун, тIаде чиги виччалев гьечIила гьесухъе. Гьединал жал гьарулел ратани, гьеб жо хIукумат гуроха, гьеб жо хIалтIи гуроха".

Гьеб ахIвал-хIалалда бан ЭР-ялъ хIалбихьана Дагъистаналъул жанисел ишазул министерлъиялъул официалиял вакилзабазухъа баян босизе. Амма бегьулеб батани жал тейин, жидеда лъалеб жо щибниги гьечIин жаваб кьолеб буго гьез.
Раип ГIашикъовасул рахъкколел гIадамазда ракIалда букIана 24 марталда Хасавюрталда кIудияб митинг тIобитIизе. Низам цIунулез дагъистаниязда аскIоб гьабулеб мекълъиялда дандечIеялъул магIнаги букIана гьелъул. Амма гьеб митингалда гIахьаллъизе бокьарал чагIи гIемер ратиялъ, хIукму ккана гьеб нахъбахъизе. Интернеталдайин абуни батIи-батIиял харбал раккана гьеб нахъбахъиялда тIасан. Масала, Дагъистаналъул жанисел ишазул министерлъиялъулги хас гьабун Раип ГIашикъовасулги хIалтIул хал гьабизе ревизия бачIунеб бугила. Амма гьелда бараб жо щибниги гьечIин бичIчIизабуна ЭР-ялъе адвокат Сапияn МухIамадовалъ.

Сапият МухIамадова: "Гьеб буго гIадатияб ревизия".
Раип ГIашикъовасдего гIадин махщелцояз гьужум гьабулев полициялъулав ккола СалихI ХIажиевги. Гьев ккола вневедомственниябин абулеб хъаравуллъиялъул нухмалъулев хисулев. Чанго къоялъ цеве СалихI ХIажиев Москваялдеги ун Росиялъул журналистазе пресс-конференция кьолев вукIана. Гьес бицана Дагъистаналъул жанисел ишазул министерлъиялда ругел гIолел-гIоларел рахъазул. Дагъистаналде нахъвуссун вачIингун СалихI ХIажиев МахIачхъалаялъул кIиабилеб азарханаялда вегизавун вукIана. Амма 25 марталда гьесда гьениса нух босизабун буго. Гьединго гьев къабул гьавун гьечIо жанисел ишазул министерлъиялъул медсанчаcть абулеб азарханаялдеги. Гьединго СалихI ХIажиевасда гIайиб кканинги абун, хIалбихьиял гьарулел рагIула гьев хъулухъалдаса нахъе рехизеги."

Гьадин бицана ЭР-ялъе Шамилов МухIамадица. СалихI ХIажиевгун цадахъ гьевги ун вукIана Москваялде пресс-конференция кьезе.

Шамилов МухIамад: "Гьесда гъоба абун буго министрасдаги дудагоги гьоркьоб бугеб жо азархана гьоркьобе бачинчIого тIубайилан. Гьединго бичIчIизабун буго гьев азарханаялде восугеян лъазабураблъиги. ХIасил-калам, Москваялдеги ун, министерлъиялда бугеб чороклъи къватIиб чIвазабунилан, СалихIида хурхун хIалтIи гьабулеб буго. Партиялъул заманалда гIадин, гIадамазул гьан кваналел тайпаялъул чагIиги ракIарун гьаракь кьола чи хъулухъалда телищ теларищали. Гьединаб хIукмуги гьабун СалихI хъулухъалдаса рехизе хIалтIи гьабулеб буго (Москваялдеги ун жанисел ишазул министерлъиялъул хъублъи къватIибе бахъизе хIалбихьи гьабунилан)".
XS
SM
MD
LG