МагъчIваялъе рес

Терактазул къадар цIикIкIунеб буго Дагъистаналда


Гьаб соналъул январалдаса байбихьун октябрялде щвезегIан Шималияб Кавказалда изну гьечIого яргъид гIуцIаразде гъорлъе унев кIинусгояв чIвана низам цIунулез.

ЧIваразд гъорлъ ратана рохьилазул 30 цевехъанги. Гьединал лъазабиял гьаруна гьал къоязда генералияб прокуратураялъул Шималияб Кавказалъул федералияб бутIаялда бугеб идараялъул нухмалъулев хисулев Андрей Медведевас.

Гьесул рагIабазда рекъон, изну гьечIого яргъид гIуцIаралгун низам цIунулезул дандечIеял ккана Дагъистаналда, Гъалгъаязул республикаялда, Чачаназул республикаялда, Кабардино-Балкариялда. ИчIго моцIида жанию къуваталъулаз ккун вуго 250 рохьилав. Гьезда гьоркьор руго изну гьечIого яргъид гIуцIарал къокъабазул ункъго цевехъанги.

Низам цIунулел чIваялъул хIалбихьиял Шималияб Кавказалда цIакъ цIикIкIарал руго ва гьедин гьеб иш тезе бегьулароян, абуна прокурор Медведевас. Гьесул рагIабазда рекъон, полициялъул хIалтIухъаби чIвазе хIалбихьун буго низам цIунулез лъабнусго нухалъ. Нусго полициялъулав чIван вуго Шималияб Кавказалда, лъабнусгояв лъукъун вуго. Бищун гIемер низам цIунулел чIван руго Дагъистаналда (70 чи) ва Чачаназул республикаялда (20 чи).

Прокурор Медведевас бицаралда рекъон, араб соналъул ичIго моцIги ва гьаб соналъул ичIого моцгIи дандеккун халгьабийдал, абизе бегьула экстремизмалъул таксхирал Шималияб Кавказлда 40% цIикIкIанилан. Экстремизмалъул центрлъун Шималияб Кавказалда ккола Дагъистанилан абуна прокурорал. Терроралъул бищун вахIшиял такъсирал гьарулел руго Дагъистаналда.

«Кавказалъул политика» сайталъул бетIерав редактор Максим Шевченкол пикруялда рекъон, Дагъистаналда ахIвал-хIал хIалуцунеб буго гIемерисала республикаялъул нухмалъиялъул политика сабаблъун. Гьес абуна, жинда бичIулеб гьечIилан, ракълилаб гIумруялде рохьилазе тIадруссиналъе кумекалъе гIуцIараб комиссия щвай хвезабурабали. «Гьеб комиссия квешаб яги лъикIаб букIанин абулеб гьечIо, амма гьеб букIана», - ян абуна журналистас.

ТIадежоялъе, Исламалъул батIи-батIиял гIаркьелазул буссурбабазда гьоркьоб байбихьараб ракълилаб диалог гьоркьоб къотIизабун буго ва гьеб цIигьабиялъе кинабгIаги хIалтIи гьабулеб гьечIилан, абун Шевченкоца. Гьединго гьес абуна Дагъистаналда рахIат толеб гьечIилан салафиязе. «БатIалъи гьечIо къуваталъулазе рохьилазул рахъ кколелищ ругел салафиял яги кколарелищ», - илан абуна Шевченкоца.

Политикаялъул механизмал хIалтIизарочIони рагъулал операциял гIададаго гьарулел жаллъун рукIунаян, рикIкIунеб буго «Кавказалъул политика» сайталъул редакторас.

Максим Шевченко: «ЦохIо къуваталъ щибго гьабуларо. Нилъеда бихьулеб буго къойидаса къойиде Дагъистаналда ахIвал-хIал хIалуцунеб букIин. ЦIияб къо – цIиял чIваял, кьвагьиял, кьвагьдеял, хасал операциял. НекIого бичIана къуват хIалтIизабун гьел хIужжаби тIагIинарзие кIолеб гьечIеблъи. Низам цIуниялъул системаялдаса хIакимазги, республикаялъул хIукуматалдаса хIакимазги, Дагъистаналъул преиздентасги чIечIого бицунеб буго терроралде данде чIезе кколин къуват гуреб, цогидал нухалги ралагьун. Амма ратун рукIарал нухалги къалел руго. Гьелдалъун, гьединаб политика бичIизе захIмалъулеб буго. РакIалде кколеб буго, ахIвал-хIал ургъунго хIалуцинабулеб бугилан».

Шевченкол пикруялда рекъон, Дагъистаналъул хIукуматалда яги бичIулеб гьечIо, яги бичIизе бокьун гьечIо, кин тIуразе бегьулел республикаялда терроралъул ва экстремизмалъул масъалаби.
XS
SM
MD
LG