МагъчIваялъе рес

"Рагьарал нуцIабазул" къо - тIалъиялъул тадбиразул сияхIалда цIияб рагIи


Дагъистаналъул бетIер Рамазан ГIабдулатIиповасул буюрухъалда рекъон, 22 апрель Дагъистаналда лъазабун букIана тIолгореспубликаялъулаб «рагьарал нуцIабазул» къолъун. Киналго министерлъияздаги, мухъазулгун шагьаразул тIалъияздаги тIадаб букIун буго жидерго проблемабигун рачIарал гражаданал къабул гьаризе. Щиб гьеб тадбиралъул ккараб?

Республикаялда тIоцебесеб нухалъ тIобитIулеб рагьарал нуцIбузул къоялъ батIи-батIиял партиязул бутIруз гуребги Дагъистаналъул тIалъиялъул тIоцересел чагIаз, ай живго Рамазан ГIабдулатIиповасги къабул гьаризе ругин гIадамалин лъазабулеб букIана цебеккун «РИА Дагестан» сайталъ, амма 22 апрелалъ аслияб майданалде Дагъистаналъул бетIерасухъе рачIарал гIадамал, гьенисан партиязул бутIаязде ва цогидал идарабазде ритIулел рукIана, ГIабдулатIипов гьенив гьечIилан абун.

ХъахIаб рукъалъул кIалтIа кодоб плакатги ккун рази гьечIолъиялъул тадбир лъазабун букIана МахIачхъалаялдаса Багъдаева Умаца. Жий ячIун йикIанин Дагъистаналъул бетIерасухъе, ритIухълъиялда хадуй, амма гьесдасаги хьул къотIанин жиндирин абулеб буго гьей гIаданалъ. Багъдаевалъул чанго соналъ халат бахъун унеб буго дагIба гьелъул минаялда аскIоб цун балеб бугеб гIемертIалаяб мина сабаблъун.

Ума Багдаева
Ума Багдаева

Ума Багъдаева: «Дир рукъалда цун балеб буго мина, дир ракьул бутIаялдеги бачIун. ГIемертIалаяб гуреб мина буго дир, гьелда цун балеб буго гIемертIалаяб мина, киналгIаги къануналги хвезарун. Диваналде гIарза кьун, гьенийги бергьун йикIана дун, амма бугониги аскIоб цун балеб бугеб гIемертIалаяб мина бан бахъунеб буго. Шагьаралъул тIалъиялде ун гьениб хIасил кколаро дир, щайгурелъул, гьеб мина балел чагIазул чагIи гьенир рукIиналъ, ГIабдулатIиповас къабул гьайилин хьул букIана, амма гьев гьечIилан абулеб буго, гьединлъидал дица рази гьечIолъиялъул акция лъазабун буго».

МахIачхъалаялъул мэриялде рачIар гIадамазул аслияб бутIа суалазул хурхараб букIана гьединго ракьул суалалда, гIадамаз гIарз гьабулеб букIана жидер минабазда гIагар изну гьечIого ралел ругел гIемертIалаял минабазда хурхун. КъватIий чIун, иргаялъухъ балагьун чIарай Шамилова ГIайнаца бицана жидер Керимова къватIалда бугеб гIемертIалаяб минаялда цун, кIитIалаяб мина базе ругел документазда гIемертIалаяб мина балеб бугин, диваналъ гьукъаниги, гьеб хIалтIи чIезеги толеб гьечIин.

БатIи-батIиял партиязул бутIаязде ритIулел рукIана гIадамал, аслияб майданалда ругел низам цIунулез, гьедин бищун гIемер гIадамал рукIана «Единая Россия» партиялъул бутIаялда цере. Жидерго суалалгун рачIарал гIадамазда гъорлъ рукIана херал ва бахIарал, масала, Дагъистаналъул пачалихъияб Университеталъул 4 курсалъул студент Алхасова Марьям ячIун йигоан жий коммерциялъул рахъалдаса бюджеталъулаб рахъалде йоси тIалаб гьабун, цIалухъ гIарац кьезе рес гьечIолъиялда бан.

Алхасова Марьям: «Университеталъул къануназда рекъон, лъикI цIалулезул цо-цо чи гурого коммерциялъул рахъалдаса бюджеталъул рахъалде росуларо. Бюджеталъул дагь гурого бакI гьечIолъиялъ лъугьун йикIана цIализе коммерциялъул рахъалде , гьенисан лъикI цIалани доехун йосилин абун. 4 курсалда йиго дун, амма дир рес кколеб гьечIо цIалухъ лъагIа-лъагIалие гIарац кьезе, университеталъул тIалъиялде гIарза хъваниги, гьелъул хIасил ккечIо, гьелъ гьание ячIана дун гьеб гьаригун, кумек гьабилин рагIи кьуна дие, амма шагьаралъул тIалъиялдеги иней иго къабул гьаюнани».

БатIи-батIиял министерлъияз ва депутатаз гIадамал къабул гьарунин сияхI кьей гурого, тIокIаб батIияб пайда жинда бихьуларин гьединал тадбираздасайин пикру загьир гьабуна Нухазулгун транспоралъул агентлъиялда къабул гьайичIого, халкъияб Мажлисалъул депутатазухъе ячIарай Заира СалихIовалъ. Жидеца гIумру гьабун бугеб «Дагснаб» микрорайоналда нух гьабуларогон бугила чанго сонилан бицана гьелъ «Эркенлъи» радиоялъе.

СалихIова Заира: « ГIемер бакIазде ана ниж нижер мухъалде сахаб нух гьечIолъиялда бан, гIемер депутатазухъеги ана, амма гьезие жидецаго гIадамал къабул гьариялъул гурого, кинаб унтигун гьел гIадамал рачIун ругелали кIварго букIунарин ккола. Чанго сон буго бахъизеги бахъун, я асфальт тIечIого, я битIизабичIого таралдаса нух нижер мухъалда, траспорталъул агентлъиялда абулеб буго гIарац гьечIин, гьенисан кумек щвелин буго хьул, амма гьабилин аби гурого гьабулеб жо гьечIо».

Жий ячIанин хIалтIудаса йиччазеги гьаюн, хIалтIул къоялъ, гIадамал рачIине рес кколареб заманаялъ, гьеб рагьарал нуцIбузул къо гьабиялъул магIна жинда бичIчIичIилан тIаде жубана гьелъ.

XS
SM
MD
LG