МагъчIваялъе рес

Ихтиярал цIунулезул ихтиярал хвезарулел руго


Инсанасул ихтиярал цIунулеб «Мемориал» централде хасал хъулухъаз жидее рахIат толеб гьечIилан гIарзагун рачIана гьал къоязда «Правозащита» гIуцIиялъул нухмалъулел Гульнара Рустамоваги ГIайша Селимхановаги.

Рустамовалъ бицаралда рекъон, ахирисел кIиго моцIида жаниб гьелъ гIумру гьабулеб минаялда хадуб халкколеб буго хасал хъулухъазул хIалтIухъабаз. Минаялда аскIобе кватIараб къаси мех щвезегIан чIун букIуна цо-кIиго автомобиль. Гьел автомобилазул гордал тонировка гьарурал руго амма салоналда жанир чагIи рукIин бичIуна, щайгурелъул мех-мехалдаса автомобилалъул нуцIа рагьула-къала. «Радал цудунго рачIуна автомобилал минаялде гIагарда», - илан абуна Рустамовалъ.

Гьелъ бицаралда рекъон, июналъул байбихьуда гьелъул рокъоб чIухь бана полициялъул хIалтIухъабаз. Гьез абун буго I маялда МахIачхъалаялда ккараб кьвагьиялда хурхун рагьараб цIех-рехалъул тадбирал тIуралаго гьабулеб бугин чIухь-бай. РакIалде щвезабила, I маялда Ирчи Хъазахъил къватIалда ккана кьвагьи. Хвана кIиго балуглъичIев. Кьвагьул алат жаниб бахчараб пакет рагьизе лъугьун руго гьел. Гьеб кьвагьул алаталдаги жиндаги гьоркьоб кинаб бухьен батарабилан Рустамовалъ гьикъиндал, полициялъулаз жаваб кьун гьечIо гьелъие.

«Минаялда жаниб къануналъ гьукъараб жого батичIо низам цIунулезе, амма нахъе унаго чIухь бараз абуна, дудаго бичIулеб батулин щай жал рачIараллъи», - ян бицана Рустамовалъ.

15 сентябралда МахIачхъалаялъул Ленин мухъалъул жанисел ишазул идараялъул хIалтIухъабаз чIухь бана Селимхановалъ гIумру гьабулеб рукъалда. Гьелда полициялъулаз абун буго МахIачхъалаялда авугсталъул ахиралда ккараб цо такъсиралда хурхун рагьараб цIех-рехалъул тадбирал тIуралаго гьабулеб бугин чIухь-бай. «Жидеца ярагъ цIехезе бугин абуна низам цIунулез, амма гьез хал-шал гьабуна диниял тIахьазул», - илан абуна Селимхановалъ.

Селимхановалъул рокъобги къануналъ гьукъараб жо батичIо низам цIунулезе. Амма гьейги гьелъул росги жанисел ишазул идараялде цадахъ рачана полициялъулаз. Гьикъа-бакъи гьабизе бугин, абуна гьез. Амма гьикъа-бакъи гьез гьабун гьечIо, протоколалде босулареб профилактикияб хабар бицине бокьун бугин абун буго. Полициялъул хIалтIухъабазе интерес ккун буго инсанасул ихтиярал цIунулезул хIалтIудалги, гIумруялъулги.

Мисалалъе, гьез гьикъулеб букIун буго «Правозащита» гIуцIиялде рачIарал гIарзабазда тIад кинаб хIалтIи гьабулеб, кин росасулгун Селимхановалъул лъай-хъвай ккараб, Исламалъул кинаб гIаркьелалде гъорлъ гьел унел, щай лъимал гьезул гьечIел. Инсанасул ихтиярал цIуниялъул рахъалъан лъикIал хIасилал ругищали полициялъулас гьикъинадал, Селимхановалъ жаваб кьуна, хIасилал рукIинчIелани РОВДеялде жий ячунароанин.

16 сентябралда Рустамавалъухъе вачIун вуго гьелда лъаларев гIолохъанчи. Амирица Малик Камбулатовасе кумек гьабеян лъазабулеб бугин гьелдаилан абун буго гьев гIолохъанчияс. Рустамовалъ абуралда рекъон, гьелда бичIана Амир цIар бугев чияс гьарулеб бугин кумек. «Камбулатовасул гIагарлъигун бухьен буго гIуцIиялъул», - ян жаваб кьунилан жинцаилан абуна Рустамовалъ. Хадув дов гIолохъанчи нахъе ун вуго.

Щуго минуталдасан довго гIолохъанчи тIадвуссун вуго ва цIидасанго абун буго добго жо. Рустамовалъ абуна, жинда кканилан гьев чи провокатор вукIин, щайгурелъул «амир» рагIи гьес «боевиказул цевехъан» рагIаби гIадин хIалтIизабулеб букIана. Рустамовалъул минаялдаса гьев нахъе ун вуго ва тонировка гордазда бугел автомобилалда жаниве кIанцIун вуго.

РакIалде щвезабила, Малик Камбулатов низам цIунулез ккуна 14 сентябралда. Изну гьечIого яргъид гIуцIаразул кумекчилъун гьев вукIанин рикIкIунеб буго полициялъулаз. Живго Камбулатовас абулеб буго, жинда гIунтIизабулеб гIайиб гьересияб бугин.

Дагъистаналда бугеб «Мемориал» офисалъул нухмалъулей Елена Денисенкоца абуна «Эркенлъиялъе» республикаялда ругел низам цIунулезул тIаса ккараб хIалтIудал лъазабизе бугин Москваялда.

Елена Денисенко: «Автомобиль жиб-жиб къоялда минаялда гIагарда чIун букIунин бицана Рустамовалъ. БукIине тейилан абулеб буго гьелъ, щайгурелъул гьездаса хIинкъизе гьелъул бакI гьечIо. Амма гьелъги Селимхановалъги хъварал гIарзаби нижеца ритIине руго Москваялда ругел низам цIунулезухъе. Россиялъул прокуратураялдаги ритIина гьел. Щиб гьезухъа къваригIун бугебали лъаларо. Амма Зарема Багьавудинова низам цIунулез ккураб къоялда хадуб, Рустамовалда хадуб хаккквезе байбихьана низам цIунулез».

Ахиралда ракIалде щвезабила, «Правозащита» гIуцIиялъул Буйнакскалда бугеб офисалъул нухмлъулей Зарема Багьавутдинова цIех-рехалъулаб заманаялъул туснахъалда ай ИВСалда йиго. Гьелъ изну гьечIого яргъид гIуцIаразул къокъабазде гIадамал цIалел рукIанин, рикIкIунеб буго низам цIунулез. Амма инсанасул ихтиярал цIунулезни рикIкIунеб буго гьеб гIайиб гьересиябни щиб, ургъунго «Правозащита» гIуцIиялъул Буйнаксалда бугеб офис къаялъе гIоло рагьун бугин такъсир гьабиялъул иш.

Зарема Багьавудинова ккола салафияй, гьелъ цIунулел рукIана салафиязул ихтиярал. Гьелъул рокъоб чанги нухалъ чIухь бан букIана низам цIунулез. Багьавудиновалъ ахирисеб чIухь-баялда хадуб абун букIана «Эркенлъиялъе», жинда низам цIунулез абунин жиндие лъикIаб букIинаанин юцIцIухIун чIани, яги гьелдасаги лъикI букIинаанин тIубан Дагъистанго толебаниян.
XS
SM
MD
LG