МагъчIваялъе рес

«Анжиялъул" анищ - премьер-лига


МахIачхъалаялъул «Анжи» клуб махIрумлъана Россиялъул кубокалда тIоритIулел хIаязда гIахьаллъизе. АрбагI къоялъ гьеб дандчIвана Санкт Петербургалдаса «Зенит» командагун ва гьелъухъа къуна.

Петербургалъул командаялдаса бергьине «Анжиялъе» бигьаго букIинчIин абулеб буго футболалъул экспертаз. Гьез рикIкIунеб буго МахIачхъалаялъул командаялда цебечIараб бищун аслияб масъала кколин премьер лигаялде нахъбуссине. Кинал ругел гьелъие Анжиялъул ресал?

24 сентябралда Санкт-Петербургалъул «Зениталъулгун» «Анжиялъул» букIараб хIаялде рачIун рукIана 15 азарго гIанасев дагъистанияв. «Анжиялъул» квешал ресал рукIинчIин бергьине, дандиясул кавабахъе торгIо тIоцебе кьабизеги рес щун букIанин гьезие, амма кингоги битIккечIин бицунеб букIана гьеб хIаялъул хIакъалъулъ нахъиял къояз. Гьеб хIаялдаса хадуб «Анжи» махIрумлъана Россиялъул кубокалъе гIоло тIоритIулел хIаязда гIахьаллъизе.

Исана маялдайин абуни «Анжи» махIрумлъун букIана Россиялъул Премьер лигаялда хIазеги. Гьелдаса хадув командаялда хисана бетIерав тренерги. Гьанже гьелъие нухмалъи гьабулеб буго Сергей Ташуевас. ЦIияв тренерасул нухмалъиялда гъоркь «Анжиялъ» хIаял квешго байбихьичIин, Россиялъул Кубокалдаса махIрумлъиги кIудияб ракIбакъвайлъун кколарин, гьелъ кинабго къуват бакIаризе кколин Премьер лигаялде нахъбуссинеян бицунеб буго «Эркенлъи» радиоялъе МахIачхъалаялдаса ХIапизов Юсупица.

ХIапизов Юсуп: «Россиялъул Кубокалъ гьезие кьезе жо букIинчIо, гьезие лъикI буго Росиялъул чемпионаталде ишанги босун гьеб масъала гIумруялде бахъинабизе. Гьелъие лъикIал ресалги руго гьезул, лъикIав тренерги вуго. Бащадалдасаги цIикIкIун командаялда ругел чагIи ккола цIиял футболистал, гIицIго хIажат буго гьезул хIай цолъизабизе»

Киналаха ругел «Анжиялъул» Премьер лигаялде тIадруссине ресал? Ресал кигIан кIваниги чIахIиял ругин рикIкIунеб буго ГIамрхIамзаев Гьиматица. Гьев ккола «Анжи Спорт» абураб газеталъул нухмалъулев. Футболалъул ТIадегIанаб лигаялда бищун цебесеб кьерда бугеб «Зениталда» данде МахIачхъалаялъул командаялъ бихьизабунин лъикIаб хIай. Амма кин бугониги «Зенит» гьеб бугин тIубан батIияб команда гьелъухъа бергьине цIакъ захIмат бугин. Амма Гьиматицаги такрар гьабуна Анжиялда цебечIараб кIвар бугеб масъала кколин Премьер лигаялъул хIаязде тIадбуссине ва хIатта къокъаб заманалда гьеб мурад тIубазабизеги кIолеб хIалалдацин бугин МахIачхъалаялъул клубилан абулеб буго гьес.

ГIамирхIамзаев Гьимат: «Кинабго хIажатабщинаб сурсат буго «Анжиялъул» Премьер лигаялде нахъбуссине. Футболисталги руго, бажари бугев тренерги вуго. Сундулъха гIилла бугебилан гьикъани, Анжиялъул щибаб хIаялде дандияб команда жанисанго хIадурун букIуна цIакъ жидее дандекколареб, захIматаб командаялде гIадин. Гьелъ квал-квал гьабулеб буго нилъер клубалъе» .

Гьедин букIана ахирисел хIаяздеги. Премьер лигаялде борчIизе ккани, турниралъул сияхIалъул кIиабилеб бакIалде борчIизе ккола гьеб ва дида ккола «Анжиялда» кIвелин гьеб масъала рагIалде бахъинабизе. Ругел захIмалъабазухъ балагьичIого команда цебехун ине букIиналда божарал руго киналго. Жеги кинабго цебе буго ва гьеб заманалда Анжиялъул рес буго хIатта къокъаб заманалдацин Премьер лигаялде борчIизе. Футболалъул миллияб лигаялда ругел хIаял киналго ккола захIматал. Гьел захIмалъаби руго цогидал командабазулги. Нилъецайин абуни щиб кканиги рахъкквезе ккола гIагараб клубалъул, гьелда барабги гIемер букIунелъул».

2011 соналда «Анжиялъул цIияб тарих» абураб ахIиялда гъоркь клубалъ байбихьун букIана цIияб куцалда хIазе. Гьеб букIана олигарх Сулейман Керимовас клуб босараб заман. Амма 2013 соналда циндаго хиса-басиял ккана команаялда гъорлъ. Керимовас цIакъ кIудияб багьаги кьун командаялде росун рукIарал легионерал цо-цоккун командаялдаса нахъе ана. Доб мехалъ чангияз абулеб букIана гьанже «Анжиялъул» иш лъугIанилан. Амма легионерал гьечIониги кквезе бугин командаялда жиндирго цIар машгьур гьабизе, нилъергоги ругин цIиял футболистал гIезаризе ресилан абулеб буго экспертаз. Гьелъул кьучIалда Анжиялда цебе рагьараб «Академия Анжи» абураб школалда ругьун гьарулел руго гIун рачIунел дагъистаналъул футболистал. Гьезде гIемер кIудияб хьул буго футбол бокьулел дагъистаниязул.

XS
SM
MD
LG