МагъчIваялъе рес

Динияв хIаракатчи ватун вуго полициялъухъ


Викъун аравлъун рикIкIунев вукIарав динияв хIаракатчи Надыр абу Халид ватун вугилан лъазабулеб буго адвокатас. Гьесухъ изну гьечIого цIунараб ярагъ батиялъул хIужа сабаблъун гьев ккун вуго. Амма гьев кквеялъе гIиллалъун рикIкIунеб буго гьесул хIаракатчилъи.

Дагъистаналда цIар рагIарав вагIзачи ва динияв хIаракатчи Метедов Надир викъун вугилан лъазабуна 8 октябрялъ гьесул гIагарлъиялъ. Гьебго къоялъ , къасиялде, гьев Киров мухъалъул Жанисел ишазул идараялда ккун ватун вуго. Ккурасде изну гьечIого ярагъ цIуниялъул гIайиб гIунтIизабулеб буго, амма гIага-божаразул баяназда рекъог, гьеб рехараб жо буго гьев кквезе вукIине. Гьедин баян гьабуна «Эркенлъи» радиоялъе адвокат Увайсов Зиявудиница.

Киназдаго Надыр абу Халид абураб цIаралда гъоркь лъалев, Метедов Надыр кколев вуго салафиязул бищун лъикIазул цоявлъун рикIкIунев вагIзачилъун. Живго жанубияб Дагъистаналдаса кколев вуго гьев, амма Кабардаялда гIун вуго. ГIемер соназ Мадинаялда шаригIат лъазабун хадуб, гьев тIад вуссун вуго Дагъистаналде. Цин живго гIураб, жанубияб Дагъитсаналда бугеб росулъе, заманаялдаса МахIачхъалаялде вахъун вуго. ТIолго Россиялда ва хIукумат биххун хадуб лъугьарал улкабазда бищун цIар рагIарал вагIза-насихIат гьабулезул цоявлъун кколин Надырилан баян гьабуна «Эркенлъи» радиоялъе» ХIажиев ГIабдулмуъминица.

Адвокат Молаев Мурадил рагIабазда рекъон, Надырица бичулеб букIун буго жиндирго машина, гьеб бичулеб бугилан лъазибиялда хурхун гьесухъе кIалъан рачIун руго гьеб босизе къваригIараб куцалда. Гьел чагIигун дандчIвазе араб бакIалдаса тIагIун вуго гьев. МухIканал гурел баяназда рекъон, цадахъ вацги вукIун вуго. Надыр тIагIун вукIиналда ракIчIараб мехалъ, гьесул гIагарлъиялъ лъазабун буго гьеб. Амма къасиялдехун, гьев Киров мухъалъул РОВДялда ватун вуго. Гьесухъе гIадамал риччалел рукIинчIин, амма ихтиярал цIунулев гIадин ворчIанин жив гьесухъейилан баян гьабуна «Эркенлъи» радиоялъе Молаев Мурадица. Гьесухъе ярагъ рехун бугила ва киннго гьев виччаларин лъазабулеб бугила низамцIунулез.

Молаев Мурад:

«АдвокатгIадин виччачIо гьесухъе. Гьесул адвокат вуго Гададов Исрапил, доб параялъ жеги адвокат ккун вукIинчIо гьесие. Дунги цойги ихтиярал цIунулевги райотделалъул нухмалъулес къабул гьаруна. Гьес абуна жинца гьев виччаларин, жив къануналда рекъон хIалтIизе вугилан. Гьесухъ ярагъ батидал, гьев кIиго къоялдаса диван гьабун жанив тIамизе вугилан баян гьабуна гьес. Живго Надырги гьесда цадахъ вацги рухун яги зулму гьабичIого руго. Заманаялдаса гьенире гIадамал ракIаризе лъугьана, гьез гьесул цIар ахIизе лъугьана. Гьенире ОМОНалъул рагъулал рачIун, Урал машин бвчIун, гьениб багъа-башари ккезе хIинкъи букIиналъ, ниж нахъе анна гьениса, гIадамалги нахъе рачана. Гьесухъ ярагъ бати буго аслияб гIайиб гIунтIизабулеб хIужа».

Надыр ккун заман иналде, гьесул рокъоре рачIун руго гIемерал низам цIунулел ва рагъулаз сверун ккун буго мина. Гьез гьениб чIухь бан буго, амма щибго батун гьечIо гьениб. Молаевасул рагIабазда рекъон, Надырил рокъоса компьютер ва цогидал алатал рахъун ун руго.

Гьединго чIухь бан буго Надыр хIалтIулеб бакIалда . Гьеб кколеб буго Salyaf.ru абураб интернет-сурсаталъул офис. Жалго интернет-сурсаталъул вакилзабазул рагIабазда рекъон, кинабгIаги экстремистияб яги батIияб гьукъараб хIаракатчиялъулъ гIахьаллъи гьабиялъулъ гIайиб гIунтIизабун букIун гьечIо гьезде. Амма Надырил рокъоб чIухь балеб мехалъ, гьебго заманаялъ хIалтIудаги, киналгIаги нугIзал гьечIого чIухь бан бугила. НуцIида мугьру чIвараб кагъатги седон бугила. Щиб гьениса ун бугебали хал гьабизе рес гьечIила

Гьединго туснахъалъубе кинабгIаги ретIел-кун ва гьединго квен боун индал гьеб биччачIила. Экспертазул пикруялда Гьев кквеялъе яслиб гIиллалъун кколеб буго гьесул вагIза-насихIатал ва гьесул жамагIаталда жаниб къимат букIин. Гьесде гIунтIизабизе кинабгIаги гIайиб букIинчIолъиялъ, кквезе гIилла букIине ярагъ рехун ккун вуго гьев. Адвокатасул рагIабазда рекъонги гьесухъ ярагъ батиялъе нугIлъи гьабулев цогIаги чи гьечIо, жалго низам цIунулел гурел.

Журналист ва динияв хIаракатчи ГIабдулмумин ХIажиевасул рагIабазда рекъон, киналгIаги Надыр абу Халидил вагIза-насихIатал руго гIицIго малъа-хъваялъул, тарби кьеялъул хIакъалъулъ. Гьел киналго, бокьарав чияс хал гьабизе, интернеталда тIиритIунги руго.

XS
SM
MD
LG