МагъчIваялъе рес

Цо сон цебеккун гIуцIана Шималияб Кавказалъул ишазул министерлъи


Кавказалъул ишазул министр Лев Кузнецов Дагъистаналъул нухмалъиялъул вакизабигун Дербенталъул Дунялалъул культурабазул тарихалъул музеялда. 2014 соналъул 23 декабрь.

ЛъагIел данде щун буго Шималияб Кавказалъул ишазул министерлъи гIуцIаралдаса. Цогидаб икълималъул гьечIеб, гьеб тайпаялъул министерлъи гIуцIун букIиналъ бихьизабулила Шималияб Кавказалъул бугеб кIваралъулин рикIкIунеб буго экспертас. Социалиябгун экономикияб ахIвал-хIал лъикIлъизабизеян гIуцIараб гьеб идараялъул кинабгIаги рехсезе бегьулеб хIасил гьечIила гьеб сфераялда.

Шималияб Кавказалъу ишазул министерлъи гIуцIизе хIажат букIиналъул тIоцебе бицана Россиялъул тIалъиялъул нухмалъулев Дмитрий Медведевас. КиналгIаги Шималияб Кавказалъул регионазда тIибитIун бугеб ришватчилъи ва цогидал гIунгутIаби тIагIинаризе хасав чи хIажат вугин лъазабуна гьес. 2014 соналъул 12 маялъ, Россиялъул президентасул хIукмуялда рекъон гIуцIана Шималияб Кавказалъул ишазул министерлъи. Гьелдехун бугеб аслияб тIалаб бугин икълималлда социалиябгун экономикияб ахIвал-хIал лъикIлъизаби ва федералиял программаби гIумруялде рахъиналда хадуб хал кквейилан лъалъазабуна Владимир Путиница.

Гьеб идара гIуцIун лъагIел тIубайдал абизе кIолин регионазул нухмалъиязе гьелъул бугеб кумекалъул. Хас гьабун Дагъистналъул абунани, республикаялда социалиялгун экономикиял проектал гIумруялде рахъинариялъе квербакъи гьабулеб бугин министерлъиялъин хъвалеб буго Дагъистаналъул бетIер Рамазан ГIабдулатIиповас Фейсбукалда жиндирго гьумералда.

Цо лъагIел цIакъ дагьаб заман бугин бокьараб идараялъул гьабулеб хIалтIулъ лъалеб хиси ккезе. Амма гьеб министерлъиялъул регионал церетIеялъе гьабизе бугеб кинабгIаги хIалтIи нахъбахъун бугин 2017 соналде щвезегIан. Гьеб заманаялъ лъагIан рагIалде бахъинабулеб бугин федералиял программаби гIумруялде рахъинарийин баян гьабуна хас гьабун «Эркенлъи» радиолялъе «Кавказский узел» сайталъул бетIерав редактор Григорий Шведовас. Гьесул пикруялда араб соналда жаниб лъидагIаги гьеб министерлъи гIуцIиялдалъун ккараб хиса-баси бихьун бати щакаб буго.

Григорий Шведов: « Шималияб Кавказ цебетIеялъе министерлъиял гьабизе бугеб кинабгIаги хIалтIи 2017 соналдаса гурго байбихьизе гьечIо. ГьабсагIат регионазда федералиял программабазда рекъон ралел ругел азарханаял рукIаниги, школаби рукIаниги ран рахъинарулел руго. Гьел проектал министерлъи гIуцIиялде гIумруялде рахъинаризе байбихьарал рукIиналъ. Гьелдаго цадахъ, 2017 соналдаса байбихьун икълималда «Юг России» абураб федералияб программа гIумрулде бахъинабизе биччалеб гIарац чанго нухалъ цIикIкIинабизе буго. 2014 соналъ программаялда харж гьабизе бихьизабун букIана 5 млрд. гъурущ, 2017 соналъ гьеб 35 млрд. гъурщиде бахинабизе ракIалда буго. КинабгIаги бицине бегьулеб хIасил гьеб идара гIуцIаралдаса жакъа къоялде бугин абизе кIоларо».

Аслияб ккараб хиси бугила Шималияб Кавказалда президентасул ишал кодосесда ва Шималияб кавказалъул министерлъиялда гьоркьор гьаризе тIадал ишал рикьи. Президентасул ишал кодосесухъ цебеккун социалиялгун экономикаялъул суалалги полотикиял суалаги рукIун ратани, жакъа гьесухъ гIицIго политикиял суалал ругила. ХутIарал суалазул жавабияб кколила министерлъи. Амма цуцада цере гьабураб хIалтIул хитIабал гьари бугила тIибитIун бугеб гIунгутIи.

« Нилъеда бихьула президентасул ишал кодосесул Дербент юбилеялде хIадуриялъулъ бугеб кIваралъул. ХIатта, жиндирго халкквеялда гъоркье босунцин буго гьеб суал. Шагьаралъул тIалъиялда Дербенталда лъим бачиналъул суал цойиде ккезабизе кIвечIогон, гьеб суал тIубалеб буго Меликовас. Гьелдасан бихьула жакъа хIакимчиясул бугеб кIваралъул киналгIаги сфераязда жаниб ва гьелдаго цадахъ идарабаз гьабулеб хIалтIул цуцада цере хитIабал гьари».

Дагъистаналда ГьоцIдерил ГЭС бай лъугIизаби, батIи-батIиял мухъазда нухал къачIай ва азарханаби ралел рукIиналъул хъвалеб буго Министеръиялъ 2014 соналда жаниб гьабураб хIалтIул хIасилазул бицунаго жидерго хитIабалда. Амма гьел киналгох Iасилал гIицIго кагътида хутIулел ругин гIемериселин баян гьабулеб буго журналист Тамерлан МухIамадовас « REGNUM» сайталъе. Министерлъи букIин лъалел чагIи кколин гIицго тIалъиялъул вакилзаби ва журналистал, гьелдасан бичIчIулин гьеб идараялъул жамгIияталда гъорлъ кIвар гьечIолъийин бая гьабулеб буго гьес.

XS
SM
MD
LG