МагъчIваялъе рес

Нечаевка росулъа чи кив вугевали чIезабизе кIолеб гьечIо


Гъизилюрт мухъалъул Нечаевка росулъа МухIамадов Джаба тIагIаралдаса лъабго къо баниги, гьесул щибго лъалеб жо гьечIо. БакIалъул гIадамаз лъазабулеб буго гьев автомобилалда жанив къазавун, вачун анилан.

Нечаевка росулъа 21 сон барав Джаба МухIамадов тIагIун вуго 26 февралалъ. Жиндир кIудияй эбелалъулхъа рокъеве унаго нухдасан тIагIанин гьевин лъзабулеб буго гьесул имгIал Ризван ГIалиевас. Къаде заманаялъ росулъа гIаданалда бихьун буго лъабгояз Джаба «Приора» автомобилалда жанив къазавулев, ва гьебго параялъ цо рахъалдехун унеб. Ккараб лъараб сагIат, МухIамадовасул гIага-божарал Гъизилюрт шагьаралъул Жанисел ишазул бутIаялде ун руго, амма гьениб щибго лъалеб жо батун гьечIо. Джаба ккун вачун унев вихьараз бицараб гIадаб автомобиль букIанила гьениб рагьда лъун, МухIамадовасул гIагаразул цояв телефоналда гьеб бахъизе лъугьиндал, кодоса телефонги бахъун вуханила низамцIунулезин лъазабулеб буго ГIалиевас.

Гъизилюрт мухъалъул жанисел ишазул бутIаялда баян гьабулеб буго гьесда изну гьечIого яргъидгIуцIаразулгун бухьен букIиналда шаклъи батизе рес бугин.

3 къоялъ гьев кив вугевали жидеда лъалеб букIинчIин, гIицIго 1 марталъ жидерго чиясдаса лъанила гьев МахIачхъалаялъул цIех-рехалъул бутIаялда вукIинин баян гьабулеб буго МухIамадовасул вацгIал Адамица.

МухIамадов Адам: « ГьабсагIат нижеца адвокат ккуна, гьев вугеб бакI лъайдал.ЦIех-рехалъул тадбирал тIоритIизе кколилан бицана нижеда. Гьесде цин гIайиб гIунтIизабулеб букIана изну гьечIого цIунараб ярагъ батиялда бан, гьесухъ кодоб таманча батанилан абун. Гьанже абулеб буго гьесде изну гьечIого яргъидгIуцIаразулгун бухьен букIиналда хурхун гIайиб гIунтIизабулеб бугилан. Живго гьев какги балев, диналдаги чIарав вас вуго, щибго гьес гьабураб жоги букIинчIо. Адвокатасда жеги гьев вихьичIо, амма гьесда хIал гьабун, вухун вукIиналда щаклъи буго. Лъабго къоялъ гьесул хабарцин лъалеб букIинчIо нижеда».

Джаба МухIамадов кквеялъул ва гьесде гIайиб гIунтIизабиялъул информация мухIкан гьабулеб гьечIо низамцIунулез. Дагъистаналъул Жанисел ишазул министрелъиялъул пресс-хъулухъалъ баян гьабуна Джаба МухIамадов ккун вукIиналда хурхун жидеда лъалеб жо щибго гьечIин.

«Нижехъ кинабгIаги информация гьединав чиясда хурхун гьечIо, цониги гIарзаги бачIун гьечIо гьеб цIаралда вугев чи тIагIун вугин абураб».

25 февралалъ Гъизилюрт мухъалда лъазабураб терроралда данде чIараб операциялъул низам нахъе бахъун буго 2 марталда. Гьединго рагьун бугила Гъизилюрт мухъалдасан унеб «Кавказ» трассаялъул бутIаялдасан къан букIараб транспорталъул хьвади.

XS
SM
MD
LG