МагъчIваялъе рес

Арифметика: "Сайга" бахъун, автомат жубан = диваналъул процесс?


7 марталда Каспийскалъул диванханалда хал гьабизе буго гьебго шагьаралдаса 38 сон барав МухΙамадгΙарип Мамаловасул рокъоб ярагъ батунин абун гьесде гΙайиб гΙунтΙизабураб уголовияб иш.

Мамаловас жинде гΙайиб къануналде данде кколареб куцалда гΙунтΙизабулеб бугин рикΙкΙунеб буго.

МухΙамадгΙарип Мамалов: «Гъоркьисала 12 октябралда дир рокъоре рачΙана жал полициялъул хΙалтΙухъаби ругиланги абун гΙадамал. Гьез дир рокъоб чΙухьбазе кколин абураб документ гуреб тΙокΙал жидерго документалги рихьизаричΙо дида. 2012 соналъул 8 августалда Каспийскалда букΙараб кьвагьиялъулъ дица гΙахьаллъи гьабиялъул щаклъи букΙиналъ балеб бугин чΙухьилан бичΙчΙизабуна гьел чагΙаз.»

ЦΙех-рехалъул идарабаз гьесде гΙайиб гΙунтΙизабулеб буго Россиялъул аслияб къануналъул 222 бутΙаялда рекъон. ЧΙухь баялъул протоколазда ругел баяназда рекъон МухΙамадгΙарипил рокъоб батун буго Калашниковасул Автоматалъул 23 гулла, кΙиго Макаровасул таманча ва гьезие дандекколеб 8 гулла.
Мамаловас бицухъе чΙухьбазе рачΙараз жидедаго цадахъ кΙиго нугΙги вачΙун вуго.

МухΙмамадгΙарип Мамалов: «Гьел жиндир мадугьа лзаби ругин полициялъулаз лъазабуниги, гьел чагΙи дида киданиги жеги рихьунцин рукΙинчΙо. Полициялъулаз цΙехана дида рокъоб ярагъ ва цоги къануналъ гьукъараб жо бугищан. Дицаги бихьизабуна дунго бетΙергьанаб чанахъабазул туманкΙ «Сайга» ва гьелъул гулби. Гьел тункΙил рукΙине кколелщинал документали ругин дихъилан рихьизаруна дица. Гьеб яргъида ва документазда чΙвазе гΙайиб гьечΙин абуна гьез».

МухΙамадгΙарипил рагΙабазда рекъон гьавги полициялъулалги «Сайгаялъул» халгьабулел ругебгΙан мехалда, цоявл полициялъулав аскΙол нугΙзалги гьечΙого живго цохΙо аскΙоб бугев рокъов вукΙин вихьун вуго рукъалъул бетΙергьанасда. НугΙзадерида ва полициялъулазда гьев чи живго цохΙо гьеб рокъов вукΙине кколарарин абуниги Мамаловасул рагΙабазухъ гΙинтΙамун гьечΙо.

МухΙамадгΙарип Мамалов: «Живго цохΙо дов полициялъулав вукΙарав рокъоб шифоньераялда жаниб батана дида тΙоцебесенух бихьулеб бугеб таманча. Гьелдаса хадуб жанире лъугьун рачΙана цоги кΙиго чи гьез лъазабуна цΙидасан ярагъ цΙунулеб сейфалъул хал-шал гьабизе кколилан. ЦΙидасан гьениб чΙухь балаго гьенир ратана автоматалъул ва тункΙил гулби. Гьел дун бетΙергьанал жал гурин, нужеца гъооркь халгьабулелъул гьениб щибго бегьулареб жо гьечΙин гурищ абурабин дун лъугьаниги дихъ гΙинтΙамичΙо».

Мамаловасул адвокат Арсен Бедерхановасул рагΙазабазда рекъон полициялъулаз чΙухь балеб мехалда Мамаловасул рокъоб букΙараб «Сайга» туманкΙ ва гулби нахъе росун руго, амма чΙухьбаяллъул хΙакъалъулъ документалда гьеб нахъе бахъиялъул щибго хъван гьечΙо. Гьединлъидал кибе арабали лъачΙого тΙагΙун буго туманкΙ. Гьеб хΙужаялда хурхун, полициялъулаз жедерго хъулухъалдаса цΙикΙкΙун пайда бан уголовияб иш гьабеян гΙарза хъван букΙун буго Россиялъул БетΙераб прокуратураялде, гьез Дагъистаналъу ЦΙех-рехалъул комитеталде битΙун буго гьеб гΙарза.

Цебехун рехсараб комитеталъ гΙайиб гΙунтΙизабизе гΙилла гьечΙин гьабун гΙарза нахъчΙван буго. Жица цΙех-рехалъул комитеталъул къотΙиялда тΙасан Дагъистаналъул ТΙадегΙанаб диванханаялда гΙарза хΙадуруле бугин лъазабулеб буго адвокат Арсен Бедерхановас.

ПатΙимат МахΙмудова
XS
SM
MD
LG