АнцIго къоялдаса цIикIкIун заманаялъ араб бакI лъачIого тIагIун вукIарав Пашаев Замир МахIачхъалаялъул моргалда ватун вуго. Гьев кколин КъурахI мухъалда тIобитIараб хасаб операциялда чIваразул цоявин лъазабун буго низам цIунулез чIварасул эбелалда.
Жий гьесул жаназадухъ балагьидал, гьесул къаркъалаялда хIал гьабиялъул гIужал рукIанин, полициялъулас абухъе, гьев сверун ккураб бакIалдаса лъутизе хIал бихьулаго чIван вугила, амма жий божуларила гьелдайин бицана «Эркенлъи» радиоялъе Замирир эбел Айханумица.
Айханум Къадирова: «Гьесул я паспорт, я телефон, я машина батун гьечIо, гьеб кибеха ине кколеб, рохьилазда гьоркьов вукIун ватанани дир вас. Нижехъе цебесеб къоялъ щвана информация гьев Белиджиялда Жанисел ишазул бутIаялда ватизе рес вугин, амма гьенире индал, щибго лъазе кIвечIо, гьенив гьев гьечIилан абуна нижеда. Нахъияб къоялъ КъурахI мухъалде чIвазеги чIван рехун буго гьесул къаркъала. Гьев вукIана салафияв, кинго вагьабиявги вукIинчIо. Гьанже гьесул жаназацин кьоларогон буго. Дун божулароан, бицунеб рагIараб мехалъ, жаназа кьуралъухъ гIарац кьезе кколин абулеб жоялда, амма гьанже дидаго бихьулеб буго гьеб. Гьенир ругел экспертиза тIобитIулел тохтураз абуна васасул жаназа нахъе босейин, къучIбухъ лъурал жаназабазул цIун бугин гьаб бакIин, амма низам цIунулез цин гьаб гIилла бачун, цин доб гIилла бачун кьолеб гьечIо жаназа».
Гьев террорист вукIанин абулеб бугила, амма гьесие кинабгIаги зарал гьабизе бокьун букIарабани анцIго соналдаса цIикIкIун маххун нухаздда хIалтIулеб мехалъ гьабилаанила кинабгIаги квешлъийилан абулеб буго чIварасул чIужу Зайнабица. Гьев чIваразда гъорлъ вугин хабар бачIараб къоялдаса нахъе гIагаразухъе витIун вугила вас, гьесда щибилан абилебали лъаларого йигила жий.
Зайнаб Пашаева: « 20 гIанасеб гулла речIанин гьесда тIурулагойин хъвалеб буго сияхIазда, амма гьесда тIад бугеб ратIлида бидул тIанкIцин букIнчIо, гьелдасанго бичIчIулеб буго гьев чIвазеги чIван тIад гьеб ретIелги ретIун рехун вукIин гьениве. Гьев тIагIун вукIарав анцIабго къоялъ нижехъе киналго мадугьалзаби рачIунел рукIана хабар лъачIищали цIехезе, гьанже рачIунел руго гIодулаго, я гIурусал, я лезгиял, я магIарулал руго нижер мадугьалихъ, гьел щалниги божулел гьечIо дир рос такъсирчи вукIанин абулеб жоялда. Гьев вагьабияв вукIаравани тIоцкбе эбелалъ бадибе тулаан гьесда».
Гьанже салафиязда квер бан бугин, вагьабиязул цIарги чIван чIвалел ругин гIадамалин тIаде жубанаЗайнабица.
Моргалда ругел жеги кIигоязул жаназа батIа гьабизе лъалеб хIал гьечIин, амма гьел цогидал тIагIарал МухIамадджавад Хизриевасул ва Давуд Саруханов ратизе рес бугин лъазабулеб буго «Кавказский узел» сайтада. Пашаев тIагIун чанго къоялдаса араб бакI лъачIого рилун рукIана гьелги. 28 маялъ моргалде щварай МухIамадджавад Хизриевасул чIужу Перица жинда бихьараб жаназадул сипат-сурат батIа бахъизе кIолеб хIал букIинчIила бицана «Эркенлъи» радиоялъе. Генетикияб анализ тIобитIун гурого лъаларила хIасилин абунила полициялъулаз. Пашаев Замир ва МухIамадджавад Хизриев кколел руго мадугьалдазби, гьел цадахъ хьвадулел рукIун руго Дербенталъул салафиязул мажгиталде. Чанго нухалъ кIияздагоги улка тун айин, нуж гIаднал Сириялда ругин абун букIананилан лъаабулеб буго гьезул гIага-божараз.
