МагъчIваялъе рес

ЦIидаса журналист чIвана Дагъистаналда


9 июлалъул радал анкьгоялда жиндирго рукъалда цеве щалали лъаларел чагIаз чIван вуго журналист АхIмаднаби АхIмаднабиев. ЦIех-рехалъул идарабаз гьев чIваялъе аслияб гIиллалъун рикIкIунеб буго АхIмаднабиевасул хIалтIи.

МахIачхъалаялда аскIоб бугеб Семендер абулеб бакIалда жиндирго рокъосаги вачIун автомобилалъув рекIунев АхIмаднабиевасул ботIролъ речIчIун буго чанго гулла. Журналист гьеб бакIалдаго хун вуго. ЧIвадарухъаби хъахIаб «Лада-Приора» автомобилалдаги рекIун тIурун рорчIун руго, чан чи гьезул вукIарабали къуватазул идарабаз жеги чIезабун гьечIо.

МахIачхъалаялъул Малыгинил цIаралда бугеб мажгиталдасан къадекакал ран хадуб шагьаралъул аслиял къватIаздасан АхIмаднабил жаназаги босун кIинусгогIан чи ана. Гьел зикруги бачунаго Ленинил къотIносанги ун тахшагьаралъул аслияб майданалдасан ана. Гьедин ГIахъущиясул ва Калининил къватIал цолъулеб бакIлде щвезгIанги восун гьенисан автомобилалдаги лъун вукъизе КIаратIе ана восун.

Жидее Рамазан ГIабдулатIиповасда рагIизе бокьун бугилан жидер ахIийилан абулеб букIана майданалдасан унаго гьел гIадамаз. Цин гьенисан риччаларин лъугьун рукIарал полициялъул хIалтIухъабиги хадуб хабар тун гIадамазда цадахъ рилълъана.

Дагъистаналъул журналистазул сюзалъул бетIер ГIали Камаловас АхIмаднаби АхIмаднабиев чIваялда хурхун ахIараб пресс-конференциялда лъазабуна журналистал чIвай къуваталъул идараби лъикI хIалтIугутиялъул хIасил бугилан. КидалъагIанила журналистал чIвазеги ругел, гьел такъсирал рагьичIогоги хутIизе ругелилан лъазабуна гьес. Гьелде тIадеги низам цIунулезда чIвадарухъаби щалали лъаниги гьел кквеялъе хIаракат бахъулеб гьечIинги абуна Камаловас.

Исана соналъул январалда АхIмаднаби АхIмаднабиевасде гьесул рукъалда цере щалали лъаларел чагIи кьвагьдон рукIана, гьеб мехалда журналистасе щибго къварилъи ккун букIинчIо. ЧанцIулго жиндие чIвазе хIинкъаби кьолел ругинги лъазабулеб букIана хварас.

АхIмаднабиевасул адвокат Абдурашид Шайховас къуваталъул идарабаз букIине кколеб кIвар кьечIин гьесде кьвагьдеялда ва хIинкъалаби кьеялда хурхунилан лъазабулеб буго. Гьесул пикруялда рекъон чIварав инжит гьавулеб гIадаб бербалагь букIун буго МахIачхъалаялъул Кировский мухъалъул диванханаялъ хал гьабизе кколеб букIараб гьесул ишалде. 10 июлалъ АхIмаднабиевасул гIарзалъул халгьаби букIине кколааниланги бицана адвокатас.

Чанги соналъ АхIмаднабида цадахъ хIалтIарав «Новое Дело» газеталъул вукIарав бетIерав редактор Маркъо ШагIбановас «Эркенлъи» радиоялъе бицана жиндир пикруялда рекъон Дагъистаналда бугеб ахIвал-хIал хIалуцинабизе чIван вугин гьевилан.

please wait

No media source currently available

0:00 0:00:57 0:00
Интернет-мухъ

2009 соналъ Дагъистаналда тIиритIизарурал чIегIерал сияхIаздаги букIана АхIмаднаби АхIмаднабиевасул цIар. Гьеб лъица гIуцIарабали лъалареб балагьаб сияхIалде росун рукIана нилъер республикаялда хIалтIулел батIи-батIиял журналистал, адвокатал, инсанасул ихтиярал цIунулел. ЧIварал полициялъул хIалтIухъабаздаса рецIел босун чIвазе ругин гьелде цIар босаралин хъван букIана сияхIалда. Гьенире росаразул кьерулъа тIоцеве 20II соналъул декабрь моцIалъ чIвана «Черновик» газеталъул бетIергьан ХIажимурад Камалов. АхIмаднабиев ккола чIегIераб сияхIалда рекъон чIварав кIиабилев чи.

АхIмаднаби АхIмаднабиев живго тохтур вукIаниги анцIгоялдаса цIикIкIун соналъ батIи-батIиял информалатазда журналистлъун хIалтIилев вукIана. Ахирисеб 7 соналъ гьев хIалтIана а «Новое Дело» газеталда, чанго соналъ гьеб газеталъул бетIерав редактор хисулевлъунги вукIана гьев.

Комментариял (1)

Гьаб форум къан буго
XS
SM
MD
LG