МагъчIваялъе рес

ГьоцIдерие компенсацияби кьолел гьечIо


ГьоцIдерил ГЭС балеб бакIалда лъеда гъоркье унел ракьазухъ рецIалил гIарац 2015 соналъги тIубан щвей щакаб бугин баян гьабулеб буго Экономикаялъул министерлъиялъ. Кинал гIиллаби ругел 2014 соналъ бецIун лъугIизе кколеб букIараб гIарац бецIун бахъунгитIиялъе ва жалго гIадамазул гьелда тIасан пикру.

Рамазан ГIабдулатIиповасул Владимир Путинилгун букIараб данделъиялда, август моцIалъ, тIоцевесес цогидал тIурарал суалазда гъорлъ рехсана ГьоцIдерил ГЭС балел ракьазухъ гIарац бецIиялъул суалги къан бугилан, амма 2015 соналъул бюджеталдаги рецIалил гIарац лъун гьечIин баян гьабуна Экономикаялъул министерлъиялъул хIалтIухъан МухIамадов ИсмагIилица.

ГьоцIдерица тIалаб гьабулеб буго лъеда гъоркье унел ругел жидер ракьазухъ рецIалил гIарац тIубан кьун бахъинабеян. Гьедин, 11 сентябралда гьоцIдерил цо къокъа МахIачхъалаялдеги бачIун букIана Дагъистаналъул нухмалъигун дандчIвазе. Амма гьелгун дандчIвана Дагъистаналъул ЖамгIияб палатаялъул нухмалъулев ХIамзат ХIамзатов. Цеве «Дагъэнерго» абураб гIуцIиялъул нухмалъудаги вукIана гьев. Гьениса жидерго росуцоял къватIире рачIинегIан балагьун чIарал гIадамазда кIалъазе вачIана АхIмад ГIабдуразакъов. Гьенибго ХъахIаб рокъобе кьуна ГьоцIдерица президентасухъе хъвараб кагъатги, амма гьелъул чанго моцI аниги жаваб лъачIо. ХIасил калам, гьоцIдерихъе жамгIияб палатаялъ бачIана цо кагъат, гьелда хъваралда рекъон, лъазабулеб буго гьоцIдерие 400 млн гъурущ гуреб, гIицIго 220 млн. гъурущ хутIун бугин кьезе. ГьоцIалъ росулъа АхIмадова ПатIиматил рагIабазда рекъон, гьеб кколеб буго ракьал мекъса рорцун рукIиналъ тIаса араб гIарац, амма мухъалъул нухмалъулесги цин 400 млн гъурущ 2014 соналда жаниб щвезе бугин рагIи кьун букIанила жидее. ПатIиматил рагIабазда рекъон, гIадамал рази гьечIо жал бакIалъул хIакимчагIазги тIадчагIазги данбан гуккулел рукIиналдаса.

Гьеб суалалъул хIакъикъат цIехон «Эркенлъи» радиоялъ бухьен гьабуна Дагъистаналъул Экономикаялъул министерлъигун.

Гьезул баяназда рекъон, 2014 соналъ киналгIаги рецIалил гIарац щунгутIи мухIканаб буго. ТIаде соналъул хIакъалъулъ гьадин баян гьабуна министерлъиялъул вакил МухIамадов ИсмагIилица.

МухIамадов ИсмагIил: « ГьоцIдерил ГЭС балеб бугеб бакIалде гIаммаб куцалъ биччалеб буго 110 млн гъурущ. Гьеб ккола Россиялъул жанубияб рахъ цебетIезабиялъул программаялда рекъон биччалеб гIарац. ГIарац биччалеб буго гIицIго компенсациял кьезе гуребги, гьенир тIоритIулел тарихиял цIех-рехазе, нухал лъеялъе ва цогидал хIажалъалабазе харж гьабизеги. Гьединлъидал, абизе кIоларо кигIан гьелда гьоркьосан рецIалил гIарац кколебали».

МухIамадовас тIаде жубана, хутIараб гIарац - 110 млн. гъурущ «Руссгидро» гIуцIиялдаса тIалаб гьабизе ракIалда бугин тIалъиялда, амма бюджеталдаса тIокIаб гIарац биччазе рес гьечIилан.

«Эркенлъи» радиоялъе гьоцIдерица бицухъе, жакъа къоялде щвезегIан гьезул росдае щун буго рецIалил гIарцул 600 млн гъурущ. Кьезе кколеб букIун буго 400 млн гъурущ, амма гьелъул гIицIго 220 млн. гурого гьечIин кагъат бачIун буго гьезухъе. Лъел электростанция балеб бакIалде лъим биччазе лъагIел хутIидал, бецIун бахъинабилин гьеб гIарацилан рагIи кьун букIун буго энергетиказ гьоцIдерие. Амма суал тIубалеб гьечIилан гьез гIарзал рахъун руго Хунзахъ мухъалъул нухмалъиялдаса байбихьун, МугIрузул мухъалда Дагъистаналъул нухмалъулес тарав вакиласухъе, живго республикаялъул нухмалъулесде щвезегIан, амма хIасил ккун гьечIо. ХIасил калам, рихьундерил гIадаб къисмат гьоцIдерил ракьазулги ккелин хIинкъи буго гIадамазул.

XS
SM
MD
LG