МагъчIваялъе рес

Лъай кьеялъул къебелъиялда «жахIдаялъул кор» боркьизехъен буго…


Дагъистаналъул Пачалихъалъулаб педагогикияб университеталъул профессоралгун мугIалимзабазул къукъа дандечIун буго гьеб цIалул идараялъул цIияв нухмалъулев ГIабдулаев МухIамадида. Гьев ккола республикаялъул хIукуматалъул вукIарав нухмалъулев.

Ректорасде дандерахъараз абулеб буго гьесул ургъел гьечIеб нухмалъиялъ кватIичIого пашманаб хIасил кьезе бегьулин, Педагогикияб университетги къан гIемерав чи хIалтIи гьечIого хутIизе вугилан. ХIакъикъаталдаги гьединаб ахIвал-хIалиш Дагъистаналда бищунго цере рагьарал тIадегIанал цIалул идарабазул цоялъуб лъугьун бугебали цIех-рех гьабуна «Эркенлъиялъ».

Аслияб дагIба гьел киназулго буго университеталъул цIияв нухмалъулев МухIамад ГIабдулаевасул кIвар гьечIолъиялъул хIасилалда гьеб цIалул идараялъул хIалтIи нахъаса нахъе унеб бугилан. Ректорлъун вачIиналде гьев хIалтIулев вукIана Дагъистаналъул хIукуматалъул нухмалъулевлъун. Россиялъул лъай кьеялъул министерлъиялъ араб соналдаго хIадурун букIана улкаялда ругел пайда гьечIел цIалул идарабазул сияхI. Гьеб сияхIалда гьоркьобе унеб букIана Дагъистаналъул Пачалихъияб педагогикияб университетги. Араб соналда гьеб университеталъул цIияв ректорлъун ШагьгIабас Шагьов вачIиндал гьес университеталъул мугIалимзабазул хасаб къукъаги гIуцун тIадкъанин букIанин 2013 -2015 соналде щвезегIан пед.университет цIебетIезабиялъул программа. Гьеб программаялъул тIоцересел хIасилал загьир гьаризе кколаанин исана сентябралдаян бицана «Эркенлъи» радиоялъе ГIалиев Ширалица. Гьев ккола ГIабудлаев МухIамад ректорлъун вачIинегIан педуниверситеталъул вукIарав проректор.

Исана февралалда ШагьгIабас Шагьовасул бакIалда ГIабдулаев МухIамад вачIаралдаса гьеб программа тIубанго чIун хутIанин, цIияв ректорасе абуни гьелъул ургъелцин гьечIин. Гьелъул хIасилин абуни цIакъго пашманаб букIине бугин, хIатта аза-азар чи жанив цIалулеб, исана жиб гIуцIаралдаса 70 сона балеб бугеб Дагъистаналъул бищун аслиял тIадегIанал цIалул идарабазул цояб тIуьанго къаялде бачIинехъан бугин ишилан рахIатхун буго Ширали ГIалиевасул.
ГIалиев Ширали гьединго рази гьечIо цIияв ректорасул хIалтIудехун бугеб бербалагьиялда. Гьес гIахьалъи гьабуларин университеталъул жамгIиябгун гIелмияб хIаракатчилъиялда жаниб, студентазул рукIа-рахъиналъул суалазулъ. Университеталъул тIолалаго мугIалимзабазе харж цIикIкIинабизецин гIолареб гIарцуде гьес ижараялъе босун бугин цIакъаго багьаяб автомобиль, гьебги жиндирго вацасухъа. ТIадеги рагьун ругин щибниги жидер хIажалъи гьечIел нухмалъиялъул бутIаби.

Гьеб киналдаго тIасан гара-чIвари гьабизе ГIабдулаев МухIамад щвечIо нижехъе гьев хIалтIул къваригIелалъ Москваялде ун ватана. Гьесул бакIалда жаваб кьезе разилъана цIалул рахъалъ проректор Дибиров Ибрагьим. Ректорасде чороклъи тIолел щинал чагIи ругин гьев вачIинегIан проректорасул хъулухъалда рукIарал, гьес хIалтIудасаги рахъарал гIадамалилан бицана гьес «Эркенлъи» радиоялъе. Лъай кьеялъул министерлъиялъ хIадур гьабураб мониторингалда хадуб гьелда тIад хIалтIи гьабун, рихьизарурал гъалатIалги ритIизарун Москваялде ун рукIанин нижер чагIи, гьелдасаги хадуб бачIанин цIияб сияхI пайда гьечIел цIалул идарабазул хIакъалъулъ, гьеб сияхIалда гьоркьоб Педагогокияб университет гьечIин бицана гьес.

Дибиров Ибрагьим, ДГПУлъул проректор
Дибиров Ибрагьим, ДГПУлъул проректор
Дибиров Ибрагьим: «Абизе бегьула гIемераб жо, гIемераб гIайиб гIунтIизабизе бегьула чиясде, амма гьеб балагьизе лъугьани батулеб гьечIоха гьез бицнеб хIалалъ. Универститет кида рикIкIунеб камилаблъун ва пайда бугеблъун? РикIкIуна гьелъул азабар-къоно цIун цIализе рачIарал студентал ругони. Дица хIалбихьиялъе гьабураб анализ буго жакъа, цIализе рачIунел гIолилал руго унго-унголъунги лъай щвезелъун рачIарал гIадамал».

ЦIияв ректорас студентазул цIалул ва рукIа-рахъиналъул суалазул тIалаб гьабулеб гьечIин гьес тIадеги хIажат гьечIел нухмалъялъул бутIаби рагьунин ва гьел гурел цогидалги ГIабдулаевасде гIунтIизарулел гIайибаздаги разилъичIо Дибиров Ибрагьим.

Дибиров Ибрагьим: «Киналго студентазул бади-кIалдив къан вукIине кколаро университеталъул нухмалъулев, гьелъие гIоло проректораздаса бахъараб преподавательгун кураторазде щвезегIан гIемерал гIадамал руго гьел суалал тIуразе кколел, нагагь гьезухъа бажарулареб суал ккани гьелъие кумекалъе вачIуна гьев кидаго».

ПалхIасил проректорасдаса бахъараб приемный коммисиялда ятарай Ханум МухIамадовна абурай гIаданалде щун гара-чIвари гьабурал чагIаз вецца ветIун лъуна Медведевасул вукIарав однокурсник. Реторлъун вачIун араб лъабго моцIида жаниб ГIабудалев МухIамадица гIемераб хIалтIи гьабунин, гьесде гIунтIизаруле гIайибал щибниги кьучI гьечIел баянал ругин гьел киналго рази рукIана жидерго нухмалъулесдаса.

Амма тIубанго батIияб пикру буго гьелда тIасан дов тIадехун бицен гьабурав ГIалиев Ширалил. Ректорасул хъулухъалде гьев тIамулелъул жидеда лъиданиги данбараб пикруцин букIинчIин, гьесул жиндирго мурадалда рекъон лъай кьеялъул министерлъиялъ тасдикъги гьавун вачIанин гьев гьеб хъулухъалде. Амма гьесдаса вохарав чиго лъаларин жидеда гьанив, хIалтIул къваригIелалъцин гьесухъе тIаде ине щоларого ругин гIемерал гIадамал. ХIукуматалъул нухмалъуда вукIагоги гьесул букIараб хIаракатчилъи кинаб букIарабали нилъеда бихьанилан ракIрелъун абуна Ширали ГIалиевас.

ГIалиев Ширали, ДГПУялъул вукIарав проректор
ГIалиев Ширали, ДГПУялъул вукIарав проректор
ГIалиев Ширали: «Кинаб хIалтIиха гьес гьабураб хIукуматалъул нухмалъулев вукIаго? Дагъистаналъул цIияв нухмалъулев ГIабдулатIиповасул хIаракаталдалъун чанги мухъазул нухмалъулел хIалтIудаса арахъулел руго. ХIакимлъуда рукIаго гьез рикъарал миллионазул баянал щолел руго нилъехъе. Лъица гьел гьедин рикъаризе риччан тарал, хIукуматалъул нухмалъулесда тIадаб букIинчIищ гьезул хIалтIуда хадуб хъаравуллъи букIинабизе? Гьеле гьесул даража. Гьеб даража гьес дагь-дагьккун билълъанхъизабизехъан буго Педагогикияб универститеталдаги.

Лъай кьеялъул хIалтIудаса тIавунго рикIкIадав гьес хIукуматалъул нухмалъулевлъун вукIаго цадахъго тIубазабулеб букIана пед.университеталъул кафедарялъул нухмалъулесул хъулухъги, цадахъго ДГУ-лъул кафедраялъул нухмалъулесул хъулухъги, амма хIисаб гаьеб гьеб жавабияб хъулухъалда вукIго гьес цIалун гьечIо цониги лекция, къватIибе биччан гьечIо цониги цIалул методикияб тIехь, амма расги нечечIого босулеб букIана гьел хъулухъазухъ гIарац. Гьеб экономикияб такъсир кколариш? Гьеб кинабго ккола хIиллачилъи батIияб гьелда лъезе цIар дида лъаларо».

Ширалил пикру гIахьал гьабуна гьесда аскIов вукIарав ректорасул кумекчилъун вугев Исрапов Исрапицаги, магIишаталъул суалазул рахъалъ хIалтIи гьабулеб бутIаялъул нухмалъулев ГIисаев МухIамадицаги. Хас гьабун ГIабдулаев МухIамад квешав чилъун гьави гьечIин мураб жидер, гIемерал соназ ниж хIалтIараб, чанги махщел токIав лъай кьеялъул хIалтIухъан къватIиве виччарав республикаялъул бищун кIудиял тIадегIанал цIалул идарабазул цоялъул ургъел гьабулел чагIи ругилан бичIчIизабуна.

ТIоцебесеб ноябралда 70 сон тIубалеб буго Дагъистаналъул пачалихъияб педагогикияб университеталъ. Амма гьеб байрам кIодо гьабиялъул бакIалда пайда гьечIеб цIалул идара хIисабалда гьебги къан къотIнор хутIизеги бегьулин дагъистаниялин абулеб буго ректорасул хIалтIудаса рази гьечIел мугIалимзабаз.
XS
SM
MD
LG