МагъчIваялъе рес

«ЧIегIераб сияхIалде» умумулги росун руго


6 маялда Буйнакск шагьаралда къуваталъул идаразбазул хIалтIухъабаз, щибго гIайиб гьечIел гIадамазул, лъабго мина кьвагьизабунин лъазабулеб буго инсанасул ихтиярал цIунулез. Къуваталъул идарабаз ургъунго салафиязе заралалъе гьарулел ишал ругин рикIкIунеб буго гIадамаз.

Инсанасул ихтиярал цIунулеб «Правозащита» идараялъул хIалтIухъан Зарема Багьавудиновалъ «Эркенлъи» радиоялъе бицана къуваталъул идарабаз къануналда рекъон гуреб жидеего бокьухъе гьабулеб бугин хIалтIийин, гьедин щибго гIайиб гьечIел гIадамазул минабиги магIишатги щущахъ биххизабунин гьезилан. Гьел минаби кьвагьизариялъе аслияб гIилла бугин гьезул бетIергьабазул лъимал салафиязул кьерулъ рукIин.

Зарема Багьавудинова: «Сон нижеда лъана Буйнакскалде гIадамазул рукъзабахъ чIухьбазе МахIачхъалаялдаса ФСБялъул ва цогидал къуваталъул идарабазул хIалтIухъаби рачIун рукIин. Гьедин радал 9ялда чIухьбалелъул нугIлъи гьабизе ахIана дун Къаранаевазул бакIалде. Дун гьений йигебгIан мехалда диде цин кIалъан рачIана ГIумаровазул мина кьвагьизабунин, хадубги Царитиловазул кIитIалаяб рукъги кьвагьизабунилан. Гьезул рокъоб къватIибе босун бажарулареб кьвагьулеб алат батанин гьединлъидал гьенибго кьвагьизабизе кканин гьебилан абулеб буго полициялъулаз».

Багьавудиновалъул рагIабазда рекъон гьей жеги чIухь балеб бугеб Къаранаевазул рокъой йикIаго гьенире рачIине лъугьун руго хехаб кумекалъул машинаби, цIасвинабулел чагIи, гIемераб рагъулаб техника ва къуваталъул идараялъул хIалтIухъаби, гьединго Къаранаевазул мадугьалихъ ругел гIадамалги рокъоса къватIире рахъинарун руго. Гьеб киналъго рукъги кьвагьизе хIадурулеб букIин бичIчIарай гьалъ жиндирго телефоналъул камераялде бахъизе лъугьун буго кинабго лъугьа-бахъунеб.

Зарема Багьавудинова: « Дица телефоналде бахъулеб букIана кинабго лъугьа-бахъунеб, цадахъго дирго рагIабаздалъун бицунебги букIана гьениб бугеб ахIвал-хIалалъул. Гьеб заманалда дида аскIове вачIана полициялъул хIалтIухъан. Дун йищилан, щиб гьабулей гIаданилан цIехолдизе лъугьана гьев дида. Дун ихтияралцIунулей йигин, нужер хIалтIухъабазда дун гьаний йикIинги лъалин, дица нижерго идараялъе бахъулеб бугин гьаниб лъугьунеб-толебилан абуна дица. Гьез дихъа телефон нахъе босана, дица бахъараб запись бацIцIинейилан лъугьана гьел цин, хадубги кIихIи телефонги, сим-картаги, флеш-картаги бекана»

Телефон бекараб гIечIого тIадежоялъе къуваталъул идарабазул хIалтIухъабаз гьениб цодагьайги информация букIине рес бугиланги абун Зарема Багьавудинова полициялде ячун йиго. Гьениб полициялъулазе хIалтIизе квал-квал гьабунин абун административияб тамихIалде цIазехъин йиго гьей.
Багьавудиновалъ «Эркенлъи» радиоялъе бицана гьел кьвагьизарурал минабазул бетIергьаби ругин салафиязул гъорлъ ругел васазул умумулилан. Гьединго гьел васазул цIара рукIун руго апрелалда Буйнакскалъул «Хвалил эскадроналъ» тIиритIизарурал «чIегIерал сияхIаздаги».

«ГIумарова ПатIимат ккола ГIумаров Заурил эбел, Къаранаева Зулейха йиго Къаранаев Ханил эбел, Царитилов Асадула ккола Царитилов АхIмадил эмен. Полициялъулаз гьаб сагIат ккун вуго 60 сон барав Асадула Царитилов, гьесде ярагъ рокъоб цIуниялъул гIайиб гIунтIизабулеб буго. Гьел гIадамал щибго гьечIого хутIанин абизе бегьула, къотIнор хутIарал гьел гIага-божараз жидехъего рачун руго. Къаранаева Зулейха инеб бакI гьечIого йикIун дица дирго дое ячана. «ЧIегIераб» сияхIалда ругел гьел гьезул лъималги дида кир ругелали лъаларо. Гьез шагьар тезе ккун тун буго, щай гурелъул кидаго гьоркьоса къотIичIого салафиязда хадуб халккун букIунелъул. Киназго абула нужее бокьухъе хьвадейила, бокьухъе динги гьабейилан, амма гIолохъанчияс мегеж тарабго , къокъал гIагал ругеб тIажу ретIарабго, гьев мажгиталде хьвадизе лъугьарабго гьесда хадуб халкквезе лъугьуна. Багьа-багьана батун полициялде рачуна гьел, гьединлъидал гIемерисел гьеб кинабго чIалгIиналъ батIиял бакIазде рахъунел руго».

Гьединго Багьавудиновалъул рагIабазда рекъон рукъзалкьвагьизарураз абулеб буго жидер минабахъ кинабниги ярагъ букIинчIин, гьеб ургъунго полициялъулаз гьабураб иш бугин, гьез жидецаго кьвагьулел жалги лъун щущазарунин жидер минабийилан.

Полициялъул лъазабиялда рекъон 6 маялда Буйнакск шагьаралда хасал тадбирал тIоритIулаго лъабго чиясул рокъоб батун буго жидецаго гьарурал кьвагьулел алатал, гьел нахъе росун бажаричIого гьеб бакIалдаго кьвагьизаризе ккун руго. ГьабсагIат кьвагьулеб жо батараб рукъалъул бетIергьан полициялда вуго, гьезул щаклъи буго гьел кьвагьулел алатал 9 маялъул байрамалда хIалтIизаризехъин рукIанилан.
XS
SM
MD
LG