МагъчIваялъе рес

Блогераз кумек гьабулеб буго унтараk лъималазе


Дагъистаналъул блоггераз сверухълъи бакΙариялдаса бахъараб, президент вищизе хΙалкъалъе ихтияр тΙалаб гьабиялде гΙунтΙун тадбирал тΙоритΙула. Гьаб нухалъ блоггераз ракалъ унтарал лъималазе кумек гьабизе гΙарац бакΙарулеб буго.

Ι7 июналдаса нахъе Дагъистаналъул твиттерчагΙаз ва блоггераз 9 сон барав, ракалъ унтарав, Рашид Угуевасе хΙажаталъе гΙарац бакΙарулеб буго.
Гьеб тадбир гΙуцΙаразул цояв Султан Рамазановасул рагΙабазда рекъон Рашид Угуевасул буго лимфобластный лейкоз, ай бидул рак унти.

Султан Рамазанов: «Дагъистаналъул блоггераз ва твиттерчагΙаз цадахъаб акция тΙобитΙулеб буго 9 сон барав Рашидие кумек гьабизе. Гьесул буго цΙакъ захΙматаб гΙемераб дару гьабизе кколеб унти. Дару гьабизе кканиги гΙемераб гΙарац хΙажалъула. Рес къотΙараб хъизан буго Угуевазул. Гьединлъидал «Живи и подари жизнь» другому абураб рахΙму-цΙобалъул фондгун цадахъ гьеб хъизаналъе дагьабниги кумек гьабизе ракΙалде ккана нижеда. Нижеца цере –цереги тΙоритΙун рукΙана гьелдаго релълъарал тадбирал.

КΙиго моцΙица цебе Гъизляралдаса Ι4 сон барай Ирина Сурмаевалъе гьабуна нижеца кумек, гьелъиеги гьанжего гΙадин твитералдасан цогидал социалиял бухьеназдасан ахΙиги бахъинабун бакΙарун букΙана гΙарац. Нижеца бакΙарарб гΙарцуде росарал дарабаз гьей ясалъул гΙумру цоги чанго моцΙица халалъана. Гьелъул инсуца цΙакъ кΙудияб баркала кьолеб букΙана киналго кумек гьабунщиназе».

Гьаб сагΙаталда жанив унтарав Рашид Угуев Пятигорск шагьаралда сахгьавулев вуго. Гьесул рак унти гурониги ДЦПги буго. Рашидил эбелалъ бицухъе гьелъул вас гьавураб мехалдаго ДЦПялъ унтун вукΙун вуго. Гьев 6 сонилаб гΙумруялде вахаравго миллиардер Сулейман Керимовас Китаялде сахгьаризе ритΙулел ДЦПялъ унтарал лъималазул къокъаялде гъорлъе ккун вукΙун вуго. Гьелдаса хадуб лъаларев хΙалалъ хисанин жиндир василан абулеб буго Эльвира Угуевалъ. Гьелъ бицухъе Китаялда бараб бащадаб лъагΙалида жаниб гьелъул вас кΙалъазе лъугьун вуго, живго кваналев вукΙун вуго, хΙатта цебе хΙатΙида вахъунчин чΙезе кΙоларев чи гьениб дару гьабун хадуб живго вилълъинегицин лъугьун вуго. Амма гьезул роххел гΙемер халалъун гьечΙо, Китаялдаса вуссун моцΙидасан тохтурзабаз Рашидил бидул рак унти бугин чΙезабун буго. Гьелдаса нахъе лъабго соналъ гьесие химиотерапия гьабуле буго, зама-заманалдасан цΙидасан гьабизе ккола гьеб. Хъизаналъул гьелъие гΙарац гьечΙо. Цебе гΙемер жий гΙодун, гьардон, бахъунлъиялда щун букΙанила «Газпром» компаниялъухъа 2,5 Рашидие дару гьабизейилан абулеб буго гьесул эбелалъ, амма гьесие жегиги гьедигΙанго гΙарац хΙажат буго.

Киса гьеб босилебалиги жидеда лъаларила, чара къосун ругила жалилан абулеб буго гьелъ. Гьабгощинаб мехалдаги батΙи-батΙиял гурхΙел-рахΙмуялъул фондаз гьединго цо-цо гΙадамаз кумек гьабун ругила жал, кисан щиб щваниги сундасаго роххулила жалилан абулеб буго Эльвира Угуевалъ.

Унтарав васасе гΙарац бакΙариялъул акция тΙобитΙулезул рагΙабазда рекъон гьеб тадбир унеб бугеб 3 къоялъ гьоркьоса къотΙичΙого бачΙулеб буго гΙадамаз гΙарац.

Султан Рамазанов: «Жакъа къоялде бакΙарун буго 23 азаргогΙан гъурущ. Гьоркьоса къотΙичΙого бачΙунеб буго гьеб. Бажарараз бажарараб къадар кьолеб буго. РакΙ-ракΙалълъидал гΙолохъабаз гьеб тадбир тΙобитΙулеб бугеб.Щибиб Ι00 гъурущалдасаги роххула ниж, баркалаги кьола. ГΙарац киви кошелекалде ва банкалъул картаялде битΙизе бегьула. Щибаб бачΙараб гΙарцул къадарги бихьизабун твиттералда хΙисабги кьола нижеца. ГΙадамазул божилъи букΙине кколелъул. Нижецаги кΙварабгΙан лъилго суалал рукΙунареб хΙалалъ гьабула гьеб иш. Нижее гΙарац бакΙаризе цΙакъго кΙудияб кумек гьабуна «Анжиялъул» болелщиказ. Гьездаго цадахъ нижеда хадурги гьединалго акциял тΙоритΙизе ракΙалда буго. ГΙадада твитерралда чΙанда хъвалел рукΙинчΙого чΙагояб ишал гьаризе къваригΙун буго»

БачΙунеб моцΙица цойги чанго унтарал лъималазе куме гьабизе гΙарац бакΙариялъе гΙоло концерт ва высткавкаби тΙоритΙизе ракΙалда руго Дагъистаналъул блоггераз. Гьеб тадбир гΙуцΙаразул цояв журналист ва волонтер Нурлан ГΙалиевас гъоркьисала июналда тΙобитΙун букΙана ракалъ унтарал лъималазул жинцаго рахъарал суратазул выставка. Гьединго выставкаялда гΙахьаллъи гьабуна жалго унтарал лъималазги. Гьез рахърал суратазу аукцион гьабун букΙана. Гьезухъ щвараб гΙарацги ракалъ унтарал батΙи-батΙиял лъималазе кумек гьабиялъе хΙалтΙизабуна.
XS
SM
MD
LG