ХIукуматалда кIудиял хиса-басиял ккеларо

Амма бищун хисизе ватани, лъабго-ункъо министр хисизе вугила. Гьел рукIине бегьулила информациялъулгун басмаялъул министр, миллияб политикаялъул ва росдал магIишаталъул. Дагьалъ цебе хIукуматалъул вакилзабазулгун букIараб данделъиялда республикаялъул нухмалъулев Рамазан ГIабдулатIиповас абун букIана жиндир ракI рекъолев министр лъабго гурони гьечIин – гьел кколин сахлъи цIуниялъул, культураялъул ва социалияб цебетIеялъулгун захIматалъул министрал. Хас гьабун росдал магIишаталъул министр Башир Байтемиров хъулухъалдаса вахъизе магIнаялда гьабураб гьужумищали лъаларин, амма гьеб данделъиялда ГIабдулатIиповас кутакаб кьаби гьесда щвезабунин бицунеб букIана гьенир рукIарал цо-цояз.

Гьединго информациялъулгун басмаялъул министерлъиялда хиса-басиял ккезе рукIиналъул хIакъалъулъ баянал церегоялдасаго руго. Амма, цо-цо баяназда рекъон, президентас гьев хисулев гьечIо гьесулго миллаталъул чи – лъарагIав - ватизегIан. Лъалеб букIахъе, Дагъистаналда хъулухъал рикьулелъул хIисабалде босула чиясул миллатги. Дагъистаналде нухмалъизе вачIаралдаса гьанжелъагIанги гьоркьор къотIун рукIинчIо Рамазан ГIабдулатIипов сурун вихьизавизелъун интернеталде хьвагIулел макъалаби. Гьезие жаваб кьезе живго ГIабдулатIипов вахъун гурони, информациялъул политика тIад къарал чагIаз гьабулеб хIалтIи букIинчIо. Гьединлъидал гьелда бухьинабулеб букIана информациялъул министр хисулев вугин, президент гьесдаса рази гьечIин цо-цо чагIаз риччарал харбалги.

Хисизе рес бугел министразул лъабабилев ккола Алексей ХIасанов – миллияб политикаялъул министр. Аслияб куцалда мугIалим хIисабалда лъалаан гьев. Гьесул буго живго бетIергьанаб школаги. Гьедин МухIу ГIалиев президентлъун вугеб мехалда лъай кьеялъул министрлъунги тун вукIана. Гьанже миллияб политикаялъул министерлъиялдаса вахъун, гьев Гъизляралде витIулев вугин бицунеб буго. Гьебги – Гъизляр шагьаралъул муниципалияб гIуцIиялъул нухмалъулевлъун. ГьабсагIаталда гьенив вугев Паламарчук кIудияб ригьалде вахун вуго.

Президент вищараб къоялъго хIукуматалъул нухмалъулевги гъоркь вукIарав ГIабдусамад ХIамидов тасдикъ гьавун гурони, гьенире гъорлъе рачунел чагIазда тIасан жеги щибго баян гьабичIо Рамазан ГIабдулатIиповасги. Абуна гIицIго гъоркь рукIарал вакилзаби киналго инчIониги цIияб хIукуматалде, гьезул щивав хIалтIизе кколин Дагъистаналъе пайдаялъе.

Рамазан ГIабдулатIипов: «Нилъер киназдаго бичIчIизе ккола нилъ церетIеялъул батIияб этапалде щун рукIин. Гьединго Къилбаялъул рахъалда Россиялъул форпостлъун нилъ рукIине кколеблъи. Гьелъие гIоло нилъ рукIине яргъид рорчун гурелги, экономика цебетIезабулеллъунги. Гьеб мехалда дагъистаниялги рукIине руго цIуна-къараллъун».

Дагъистаналда хIукуматалда кIуди-кIудиял хиса-басиял ккунгутIиялда ракIчIун буго гIемерисезул, щайгурелъул гьабсагIаталда бугеб хIукумат исана июль моцIалда бищун букIиндал.