Талат къоялъго туснахъалъуса къватIиве виччазе кколев вукIарав «Союз справедливых»абулеб жамгIияб идараялъул гIахьалчи МухIамадов МухIамад жеги туснахъ гьавун теялдаса разигьечIолъи загьир гьабулеб буго гьесул адвокатас. Гьесул рагIабазда рекъон гьеб иш къанун хвезаби кколеб буго.
РакIалде щвезабилин гьев 23 маялда МахIачхъалаялда ХIажиевасул къотIнов щалали лъаларел чагIаз хIалицаго автомобилалъув къазавун вачун ун вукIана. Гьебго къоялъул къаси вухизеги вухун гьев ватана Каспийскалъул заманалъ гIадамал жанир тIамулеб туснахъалда. Изну гьечIеб ярагъ батанин гьесухъин гьелъ ккун вугилан хъвай-хъвагIай гьабун буго низам цIунулез.
Гьедин 3 июналда МахIачхъалаялъул туснахъалъул кIалтIе ракIарун рукIана республикаялъул жамгIиял идарабазул вакилзаби ва туснахъазда хадур халкколеб комиссиялъул гIахьалчагIи. МухIамад эркен гьавейилан тIалаб гьабун гьесул адвокатги цебеххун рехсараб комиссиялъул гIахьалчаги Шамилов МухIамадги, Борисова Неллиги ун рукIана тусхъалъул нухмалъигун дандчIвазе.
МухIамадов МухIамад: «Дица туснахъалъул бетIерасул цIаралда къагъат хъван буго МухIамад эркен гьавейин абун. Щай гурелъул диваналъул хIукмуялда рекъон гьев жанив тIамураб заман лъугIун буго. МахIачхъалаялъул Ленинский мухъалъул диваналъул хIукмуялда рекъон гьев ккуралдаса нахъе I0 сордо-къоялъ туснахъ гьавизе бихьизабун буго. КIиабилеб июналъ гьел болжал ахиралде щола, амма гьев къватIиве виччалев гьечIо. Гьаб сагIат гьелъие багьаналъун бихьизабулеб буго туснахъалъул чагIаз гьеб хIукмуялда хъван бугила МухIамадов ккуралдаса нахъе I0 сордо-къоялда жаниб гьесде гIайиб гIунтIизабичIони гьев къватIиве виччазе кколилан, амма гьеб гIайиб гIунтIизабун щиб гьабизе кколебали хъван гьечIо. Диваналъул хIукмуялда мухIканго хъван букIине кколаан гьев цойги кигIан заманалъ жанив тIамун тезе кколевали. Гьебги хъван гьечIо, жанив тIамураб заман лъугIараб мехалда цIидасан диванги гьабичIо. Гьебги сонго гьабизе кколаан, щай гьеб гьабичIебалиги лъалеб гьечIо, диеги гьелъул рахъалдасан цониги баян кьечIо лъицаниги. Гьединлъидал дица лъазабулеб буго диваналъ хIукмуги къотIичIого, жанив тIамураб заманлъи лъугIун вугев МухIамадов сон къасиялдаса нахъе жанив тIамун тей гьеб къанун хвезаби кколилан».
Гьединго адвокатас бицана МухIамад МухIамадовасде гIунтIизабулеб бугила гьес къануналде дандекколареб хIалалъ ярагъ цIуниялъул ва гьеб гьабиялъул гIайиб. Гьеб гIайиб тIад чIезабуни Россиялъул къануналда рекъон гьев 8 соналде щвезегIан туснахъ гьавизе бегьулев буго.
Гьаб сагIат адвокатас МахIачхъалаялъул прокуратураялде гIарза хIадурулеб буго жамгIияв хIаракатчи МухIамадов МухIамад къануналде данде кколаредухъ жанив тIамун вугин абун.
Туснахъазда хадуб халкколеб Дагъистаналъул комиссиялъул вакилзабаз ва республикаялъул жамгIиял идарабазул «Отечество» цолъиялъул рахъалдасан Россиялъул президентасда цебе гIуцIараб инсанасул ихтиярал цIунулеб идараялъул нухмалъулей Элла Панфиловалъул цIаралда МухIамадил ихтиярал цIунейилан тIалаб гьабун кагъат битIизе бугин жидецайилан бицана «Эркенлъи» радиоялъе жамагIатчи Шамилов МухIамадицаги.
Шамилов МухIамад: «Гьаб сагIат магIна гьечIеб, бичIчIизе захIматаб диваналъул хIукмуги хIалай ккун жанив тIамун хутIун вуго МухIамадов МухIамад. Жеги халат бахъинин гьев жанив тIамиялъул ишилан ккола дида. Гьел киналго жал ургъунго гьарулел руго низам цIунулез. Нилъер гьаниб гIадатлъун билълъун ун буго гьеб. Адвокаталцин ахIичIого диваналги гьарула гьанир, бокьа-бокьарал хIукмабиги къотIула. Гьеб иш гьедин тезе гьечIо нижеца , ахIи-хIурги бахъинабизе буго, гьесул ихтиярал цIунеян тIалабги гьабизе буго. Жакъа живго МухIамадги вихьана нижеда, батIаго гьедин квешаб хIалалда гьечIоан гьев. Цеве вухиялъул лъалкIалги тIагIун инел руго, тIокIаб гьев вухунги гьечIо, амма цеве гьев вухун хадуб тохтурас гьабизе кколеб букIараб хал-шал гьабун гьечIо. Гьев вухун вукIанин абураб хъвай-хъвагIайги гьечIо гьабун».
МухIамадов МухIамадил сверухълъиялъ ва 3 июналд туснахъалъул кIалтIе ракIарун рукIарал жамагIатчагIаз лъазабулеб буго гьев щибго гIайиб гьечIого туснахъ гьавун вугилан ва гIагараб заманалда гьев эркен гьавичIони жидеца кIудияб митинг тIобитIизе бугилан.
