МагъчIваялъе рес

Изну гьечIого яргъид гIуцIаразул кьерал лъедерлъана


Цо сордо-къоялда жаниб Дагъистаналда полициялъул хIалтIухъабазде тIаде кIанцIи гьабурав 5 чи чIван вуго. Къуваталъул идарабазул баяназда рекъон гьел киналго кколел руго Гъадаралъулин абулеб изну гьечIого яргъид гIуцIаразул къокъаялъул гIахьалчагIи.

Дагъистаналъул жанисел ишазул министерлъиялъ кьурал баяназда рекъон 24 сентябралъул сардилъ анцIго тIубараб мехалда МахIачхъалаялдаса Хасавюрталде бугеб нухда полициялъул хIалтIухъабаз ВАЗ 2114 автомобиль чIезабизе къасд гьабуна, гьелде данде автомобилалъусан кьвагьдезе лъугьана полициялъулазде.

Низам цIунулез дандеги кьвагьдон автомобилаъув вукIарав кIиго чи чIвана. Гьел кколел руго Буйнакск мухъалъул Карамахьи росулъа ТIагьир Сулейманов ва МухIамад Дадаев.

Сулейманов «Гъадаралъулаб»-илан абулеб изну гьечIого яргъид гIуцIаразул къокъаялъул бетIер вукIанин лъазабулеб буго Дагъистаналъул цIех-рехалъул идараялъ.

Гьебго къокъаялъул гIахьалчи вукIун вуго Дадаевги. ЧIваразул автомобилалда жаниб батун буго Калашниковасул автомат ва кIиго кверзулаб граната.

Гьебго сордоялъ Хъумторхъала мухъалъул Тюбе абулеб росдада аскIоб полициялъул хIалтIухъабаз автомобиль чIезабейин лъазабураб мехалда гьенисан кьвагьдон руго низам цIунулезде.

Полициялъ дандеги кьвагьун Калина автомобилалда жанив вукIарав 60 сон барав Карамахьи росулъа Сулейманов Резван чIван вуго. Къуваталъул идарабазул баяназда рекъон гьебго сордоялъ чIварав «Гъадаралъул» ян абулеб изну гьечIого яргъид гIуцIаразул къокъоялъул бетIер ТIагьир Сулеймановасул эмен кколев вукIун вуго гьев.

Гьединго талат къоялъ Буйнакск мухъалъул Эрпели росдада аскIор чIван вуго кIиго чи.

Тероризмалде данде чIараб идараялъ кьурал баяназда рекъон Эрпели росдада аскIоб бугеб рохьоб хал-шал гьабулаго къуваталъул идарабазул хIалтIухъаби яргъид гIуцIарал гIадамазул къокъаялде тIаде ккун руго.

Низам цIунулез жалго сверун ккун рукIин лъарабго гьел кьвагьдезе лъугьун руго, кIиябго рахъалда гьоркьоб ккараб кьвагьиялъул хIасилалда яргъид гIуцIаразул кIигояв чIван вуго.

Терроризмалде данде чIараб идараялъ гьел чIварал Буйнакскалъул изну гьечIого яргъид гIуцIаразул къокъаялъул хутIарал чагIи ругин лъазабулеб буго, амма цIех-рех лъугIизегIан гьезул цIарал баян гьаричIо гьез.

Рехсарал лъугьа-бахъиназда хурхун Дагъистаналъул цIех-рехалъул идараялъ Росиялъул такъсиралъухъ тамихI гьабиялъул кодексалъул полициялъул хIалтIухъабазде тIадекIанцIи гьабиялъухъ ва изну гьечIого ярагъ цIуниялъул, хIалтIизабиялъул ва гьабиялъул бутIабазда рекъон такъсиргьабиялъул иш рагьун буго.

Гьединго изну гьечIого ярагъ цIуниялъул ва гьеб хIалтIизабиялъул бутIаялда рекъон рагьараб такъсиргьабиялъул ишалъул цIех-рех гьабулаго , къуваталъул идарабазда, 25 сентябралда Каспийскалъуласул рокъоб ратун руго гранатаби, гулби, кьвагьулел жал гьаризе хIажалъулебщинаб.

Гьединго экстемистиял тIахьал, гьединалго записал ругел видео кассетаби. Гьеб кинабго батана гъоркьисала Хасавюрталда хасаб операция тIобитIулеб мехалда чIварав 21 сон барав МухIамадов МухIамадил рокъоб. Хасал идарабазул баяназда рекъон гьев кколев вукIун вуго Каспийскалъул изну гьечIого яргъид гIуцIаразул къокъаялъул гIахьалчилъун.
XS
SM
MD
LG